Peqqinnissaqarfik peqqissaasunik filippinerinik atorfinitsitserusussinnaasoq
- Tamatuma ajunngitsortaqarnera takusinnaavarput.
Peqqissaasunik Filippinerineersunik sulilertitsinissamut siunnersuut pillugu, Nunatsinni Peqqinnissaqarfiup qullersaqarfiani nunap ilaanut pisortap tullersortaa Ella Skifte taamak oqarpoq.
Nunani amerlasuuni atorneqartup, peqqissaasunik suliatigut piginnaasunik amigaateqarnermi, Peqqissutsimut inunnullu Innarluutilinnut Naalakkersuisup Anna Wangenheimip (D) aaqqiissutitut soqutigaa.
Peqqinnissaqarfimmi ilungersunartorsiorpoq, sulisullu suliinnarnissaannik sivitsortumik ajornartorsiuteqarpoq.
Kalaallit peqqissaasutut ilinniagallit affaat sinnerlugit 2023-mi peqqissaasutut suliunnaarsimasut, Peqqinnissaq pillugu Ataatsimiititaliarsuup isumaliutissiissutaani kisitsisit takutippaat.
- Inuttalersuiniarneq unammillernartumiippoq. Nunatsinnukartunik paarlatserpassuaqarpoq taakualu ilai sivikitsuinnarmik paarlattaasarput. Taamaattoqarneratalu aalaakkaasunik atorfilittaqartitsinissatsinnut tunngatillugu unamminartorsiortippaatigut, Ella Skifte oqarpoq.
Taanna 2006-imili pisortap tullersortaavoq. Tanna naapertorlugu, paarlatsit sivikitsuinnarmik atorfilinnik atuineq pisariaqartitsinerlu piffissap ingerlanerani nikerarput. Peqqinnissaqarfimmilu ilungersunartorsiornerpassuit aamma taamaapput.
- Piffeqartarpugut ajunngitsunik ilaannilu ajornerulaartunik, Ella Skifte oqarpoq.
Ilaanneeriarluni taartaasussarsiorfinniit sulisoqarnissaq pinaveersaartinniarlugu iluatsilluartunik suliniuteqartoqartartoq, taanna oqarpoq.
- Kisianni piffissaq ingerlertarpoq ajorseriaqqittarlunilu, taanna oqarpoq.
Filippinerit maaneereersut
Nunanit allaneersunik peqqissaasunik allatigullu peqqinnissamik sulialinnik atorfinitsitsinissaq, inuttalersuiniarnermut ajornartorsiutip aaqqiissuteqarfigiarnissaanut iliuusaalluarsinnaasoq, Ella Skifte isumaqarpoq.
Taannali isumaqarpoq, sulisussarsiornermi inuit nunatsinni najugaqareersut siullertut ujartuiffigineqartariaqartut. Assersuutigalugu inuit Filippineriniit nunatsinnut nuunnerit.
Filippinerit 1110-t nunatsinni ukiup aallartinnerani najugaqartut Kalaallit Nunaanni Naatsorsueqqissaartarfianit kisitsisit takutippaat. Ella Skifte naapertorlugu Filippinerinik peqqissanermut tunngasuni ilinniagalinnik arfineq-pingasut qulilluunniit missaani ilisimasaqarpoq.
- Nunami maani najugalinnik arlalinnik nalunngisaqareerpugut, taakkunanngalu ataasiakkaat peqqinnissaqarfinni suliffiit pillugit saaffiginninnikuupput, Ella Skifte oqarpoq nangillunilu:
- Nunami maani arlaat aallartisissinnaasuuguni ajunngitsorujussuussagaluarpoq iluaqutaallunilu.
Filippinerinik peqqinnissamik sulialinnik ilinniartitsillutik peqqinnissaqarfik aallartereerpoq, Nunatsinni Peqqinnissaqarfimmi sulilernissaannut piareerniassammata.
- Ilaatigut Filippinerit peqqissaasut pingasut ilinniartinneqarnikuupput, taakkualu maani piginnaatitaalerlutillu peqqissaasunngornikuupput, pisortap tullersortaa oqarpoq.
Ilinniartitsineq sivisusarpoq
Naak Ella Skiftep misilittagaqarfigereernikuugaluaraa, sulisut Filippinerit sungiusarlugillu ilinniartinneqareeraangamik suliffimminniiginnarsinnaaneri anguniarlugit, sivisusinnaallunilu aningaasartuuteqarfiuvoq.
Filippinerit peqqissaasut taakku pingasut nunatsinni peqqissaasutut atorfilittut ukiut marluk ilinniarteqqaarlugit sulisinnaanngorput, taanna oqarpoq.
- Arlalippassuit eqqarsaatigisariaqaratsigit soorlu sunik suliaqartinneqarnissaat pillugit, taanna oqarpoq.
Aamma sivittajaamik nunatsinni najugaqareeraluarpataluunniit. Nalinginnaasumik oqaatsinut tunngasut unammillernarnerpaasarput.
- Peqqinnissaqarfimmi oqaatsit atortakkavut qallunaatuujupput, taamaalilluni qallunaatut oqalussinnaasariaqarpoq paatsoortoqarnissaa pinngitsoortikkumallugu, Ella Skifte oqarpoq.
Tamatuma saniatigut kalaallisut qallunaatulluunniit oqalussinnaanngitsunik sulilersitsisoqarnissaanik naatsorsuuteqartoqassagaluarpat tatituumik tapersersortissaqartariaqartoq, taanna isumaqarpoq.
- Nunatsinnut tikippata inummik ingiaqateqartinneqassapput. Sungiusartinneqassapput, ilitsersuisulerlugit nunatsinni napparsimmavinni peqqinnissaqarfinnilu qanoq suleriuseqartoqartarnera pillugu ilinniartinneqassapput.
Assersuutigalugu filippinerinik maaneereesuinnarnik Peqqinnissaqarfinni sulilersitsinissaq kisimi naammassava?
- Tamanna sunik tamanik aaqqiinavianngilaq. Atorfinni aalajangersimasuni amerlasuunik amigaateqarpugut, Ella Skifte oqarpoq.
- Taamaammat eqqarsarpunga, tamanna suliassarujussuusoq taamaalilluni Skandinaviamiit Danmarkimiillu suli sulilersitsisariaqartassasoq, taanna oqarpoq.
Nunatsinneersut peqqissaasutut ilinnialernissaannik qulakkeerinissamut sulissutigineqarnerunissaa neriuutiginerpaagaluarlugu, naggasiutigalugu erseqqissaatigaa.
- Soorunami nunaqqatitta ilinniartinneqarnissaat aamma ingerlatiinnassavarput. Tassanittaaq misilittakkat aallaavigalugit ilinniakkamik sivikillisaavigineqarsinnaanissaq sulissutigineqarnissaa periarfissaasinnaavoq, assersuutigalugu peqqissaanermi assistenti peqqissaasutut ilinniakkamik ingerlatseqqissinnaanngorlugu.
