Akerliussutsimik takutitsinerit: Peqqinnissaqarfimmi sulisut aamma angajoqqaat akerliussutsimik takutitsisut

Ullumi maajip aallaqqaataanni sulisartut ulluanni erfalasoq amuneqarpoq. Tamannalu Nuummi Qaqortumilu akerliussutsimik takutitsinermik aamma malunnartitsiffiuvoq.

Nuummi SANA-mi sulisut isumaqatigiissutip kingulliup qaangiunneranit – tassa ukioq ataaseq sinnerlugu qaangiuttoq - nutaamik suli isumaqatigiissuteqartoqannginnera akerliussutsimik takutitsiffigaat.

Isumaqatigiissuteqartoqannginneratigut akissarsianut, sulinngiffeqarnissamut soraarnerussutisiassanullu tunngatillugu ersarissumik sinaakkuteqartoqanngilaq. Tamanna qularnermik pilersitsillunilu sulisunik attassiniarnermut sulisussarsiniarnermullu ajornakusoortitsivoq – tamannalu naggaterpiaani napparsimasunut eqquinerpaasoq, peqqinnissaqarfimmi sulisut eqimattat tusagassiuutinut nalunaarummi allapput.

Taartaasunut millionerpassuit atorneqartut

Peqqissaasutut atorfillit taartaasunut sanilliullugit akissarsiaat nikingangaatsiarput, taartaasut akissarsiakkaanerupput, akeqanngitsumik ineqartinneqarput angalanissamullu akiliunneqartarlutik. Tamatuma saniatigut aalajangersimasumik atorfeqartut napparsimasunik paarsinissamut isumannaatsuutitsinissamullu akisussaaffeqarnerpaapput, peqqinnissaqarfimmi sulisut tusagassiuutinut nalunaarummi allapput.

- Naak akissarsiatigut nikingasoqaraluartoq aalajangersimasumik atorneqartut napparsimasumik paarsinissamut passussinissamullu akisussaassuseqarnerpaapput, taakku allapput.

2024-mi taartaasussarsiornermut 63 millionit koruunit atorneqarput. Sulisut aningaasat annertussusaat "ingasappallaarnerarpaat", taakkulu sulisut suli amerlanerusut suliffitsik qimallugu nunani avannarlerni allani akissarsiarissaarneruffiusunut atugassarissaarfiunerusunullu suliffissarsiulernissaat ernumassutigaat.

Isumaqatigiinniarnerit pakatsinartut

Peqqissaasut Kattuffiata (PK) peqqinnissaqarfimmi sulisunut isumaqatigiissutit pillugit isumaqatigiinniarnerit sivitsortoorutaanerat nassuerutigaa.

- Isumaqatigiissuteqartoqannginnera pissutigalugu pakatsisoqarnera nassuerutigissavarput, kattuffimmit tusagassiuutinut nalunaarummi allassimavoq.

Tamannali kattuffiup tungaanit isumaqatigiinniarnissamut piareersimasoqannginnertanik pissuteqanngilaq.

- Isumaqatigiinniarnissamut piareersimavugut Sulisoqarnermullu
Aqutsisoqarfik uatsinnik naapitsinissamut inuttassaqanngitsutut misigaarput, kingunerluutaasullu ajorneruleriartuinnarput, kattuffik tusagassiuutinut nalunaarummi allappoq.

Qaqortumi angajoqqaat akerliussutsimik takutitsisut

Qaqortumi angajoqqaat akerliussutsimik takutitsipput. Akerliussutsimik takutitsinissamik aaqqissuisut Viivi S. Lyberthip aamma Pilunnguaq Poulsenip Kommune Kujallermi pingaartumik meeqqeriveqarnermi sipaarniarnerit erseqqissaatigaat.

- Aqqalu (meeqqerivik aaqq.) ukiut sisamassaani nutarterneqanngilaq. Meeqqat ininut allanut sulisunut meeqqanullu pitsaanngitsumik atugassaqartitsiviusunut inissinneqaqqapput. Pinnguartarfeqanngilaq, sulisut amigarput, meeqqallu atortuni nungullarnikuni pisoqqani naleqqutinngitsuni natermi sinittarput, Pilunnguaq Poulsen oqarpoq.

Akerliussutsimik takutitsineq Tissaluttup eqqaanit nalunaaqutaq 11.30 aallartippoq, angajoqqaallu allagartarsualisarlutik kommunip tungaanut ingerlaaqatigiillutik.

- Kommunalbestyrelsit nutaat Demokraatinit siuttuuffigineqartut iliuuseqarnissaat neriuutigaarput. Neriuppugut ilimagaarpullu aaqqiivigineqassasoq. Naammaleqaaq. Maannakkut iliuuseqarfigineqartariaqarpoq, Pilunnguaq Poulsen naggasiivoq.