Naalakkersuisut kaammattuuteqartut: Nutaarsiassat qamillugit pisuttuaritsi
Nutaarsiassat qamillugit. Pisuttuaritsi. Ilaquttasi ilagisigit kalaaliminertorlusilu.
Tusagassiortunik katersortitsinermi 'piffissami nalorninartoqarfiusumi isumassuineq atugarissaarnerlu'-mik qulequtaqartumi kaammattuutit ilaat tamakkuupput.
Peqqissutsimut naalakkersuisoq Anna Wangenheim (D) aamma meeqqanut, inuusuttunut, ilaqutariinnut, nunamut imminermut, kulturimut, timersornermut ilageeqarnermullu naalakkersuisoq, Nivi Olsen (D) taama oqariartuuteqarput.
Coronap nalaani piffissamut eqqaanartoq
Coronap nalaani piffissaq suli eqqaamagaanni tusagassiortunik ullumikkut katersortitsineq 2020-mi 2021-milu tusagassiortunik katersortitsinerpassuarni innersuussutinik pitsaasunik amerlasuunik uteqqiineruvoq.
Anna Wangenheim taamani coronap nalaata ilaani peqqissutsimut naalakkersuisutut aamma saqqummisuuvoq – taassumalu assingunera ullumi nammineq eqqaavaa:
- Pissutsit coronap nalaanut assingupput, taakku ataatsimoorluta oqartussallu innersuussutaanik malinninnikkut qaangerpagut.
- Corona imminut ungasillisimaarluta qaangerparput, maannali ataatsimoornissarput oqariartuutaavoq, Anna Wangenheim oqarpoq.
Meeqqanut qanoq oqartoqassava?
Tusagassiortunik katersortitsineq naalakkersuisut oqaaseqalinnginneranni Johannes aamma Pipaluk Berthelsen erinarsukkamik atuinerisigut allatut aallartinneqarpoq. Nivi Olsenilu angajoqqaanut toqqissisimanngitsunut tooqqaannartumik oqaaseqarpoq:
- Naalakkersuisut tungaanniit meeralinnut oqaatsinik qanoq ittunik atuinerlutik eqqarsaatigilluassagaat oqaatigerusupparput.
- Paasissutissat nuanniissinnaasut amerlapput. Nutaarsiassat qamillugit isiginnaagassamik nuannarisamik isiginnaarnissaq isumatsialaavoq.
Tassami meeqqanut qanoq oqaluttuartoqassava? Qanoq annertutigisumik nassuiaasoqassava? Meeqqap toqqissisimajunnaarsinnissaa pinaveersaarniarlugu qanoq iliortoqarsinnaava?
- Naalakkersuisuinit innersuussutit inernernik eqqortunik nalunaarsuiffiunngilaq, tapersiinerullunili taanna oqarpoq.
- Nunarsuarmi pisut nassuiaqqissaarneqarnissaat pineqanngilaq, pineqartorli tassaavoq meeqqap qanoq inneranik eqqumaffiginnilernissaq, apeqqutinik ammasunik aperisarnissaq meeqqallu oqaatsinik paasisinnaasaanik akisarnissaq. Nivi Olsen oqarpoq.
Taassuma Paarisamit inoqatinut attaveqaatitigut angajoqqaanut innersuussutitsialaat innersuussutigai.
Unicef aamma piffissami unamminartumi meeqqavit qanoq tapersersorsinnaanera pillugu atortussanik suliaqarsimavoq. Quppersakkat illoqarfinnut nunaqarfinnullu nassiunneqassapput taakkulu Pilersuisumi aamma nassaassaajumaarlutik.
Tusaanngami sulisut amerlanerusut
Pissutsit pillugit oqaloqateqarnissaq pisariaqartikkukku Tusaanngamut 80 11 80-imut sianersinnaajuaannarputit. Sulisunillu amerlanerusunik sulilersitsisoqartoq, Nivi Olsenip oqaatigaa.
- Pissutsit qanimut malinnaaffigaagut, taamaammat inunnik amerlanerusunik Tusaanngamut inissiivugut, taanna oqarpoq.
