Erniartortitaasartut: Nunagisanni ernerusukkaluarpunga
Nunatsinni illoqarfiit erniviusinnaasutut nalunaarsukkat tallimaapput, Ilulissat, Sisimiut, Qaqortoq, Nuuk kiisalu Tasiilaq.
Ernisuttoqartillugu nakorsat sinitsitsisinnaasut, pilattaasinnaasut juumuullu najuunnissaat piumasaqaataagaluartoq, tamatigut taama piginnaasalinnik sulisoqarneq ajorpoq.
Taamaammat amerlasuut Nuummut erniartortoqartariaqartarpoq.
Taamatullu nunagisaq ilaquttallu qimallugit erniartortariaqartarneq naartusumut misigissutsitigut attuisarpoq.
Uummannamiit Aasianniillu erniartorniarlutik Nuummukartussat KNR-imiit oqaloqatigaagut. Taakku erniartornermi pitsaanerusunik atugartarnissamik kissaateqarput.
- Ilaqutariinngulerluni imaluunniit meerartaalerluni nalunngilarput soorlu Nuummigooq najugaqaraluaruma Nuummilu meerartaarlunga ilaqutariippassuit ataatsimoortarput ornigullutik najuullutik, taava avinngarusimasut uagut taamatut atugassaqartitaanata, Uummannamiit erniartortoq, Uiloq Rosback taama oqarpoq.
Aasianniit Nuummut erniartortussaq, Thrune Amassen Rafaelsen, qanigisani ilagalugit erniartortussaagaluarluni Uiloq Rosbackimut isumaqataavoq.
- Ilaa, eqqaamasaqarfigigakku Aasianni ernisuttarallarmata ilaquttakka arlaat ernilertoq napparsimaveqarfiliakaasarnikuugatta ilaqutariiulluta, taava eqqaamasaqarfiga nuannersuaaramik taava uanga nammineq taamatut enisullunga misigerusussinnaagaluarakku, taanna oqarpoq.
Nalorninermiinneq
Sinerissamiit Nuummut erniartortartut tikikkaangamik portørinit mittarfimmut aaneqartussaallutik naluneq ajorpaat.
Tikereerminnili susoqarumaarneranik iluamik ilisimatinneqarneq ajorlutik arnat taakku marluk oqaluttuarput. Tamannalu aamma toqqissisimajunnaassutaasartoq taakku oqaluttuarput.
Naartusunut atugassarititaasut qiviassagaanni aappaasup immikkut isiginiarneqartannginnera naartusumut aamma kipiluttunartuusoq Thrune Amassen Rafaelsen oqarpoq.
- Uanga isumaqarpunga taamatut nunagisarput qimallugu aallarluta erniartortassagutta suli taava immaqa aapparisarluunniit billitsia taperneqalaartarluni taavalu ineqatigisinnaasariaqarparput aapparisaq toqqissisimasumik.
Tamanna Uiloq Rosbackip aamma ilalerpaa.
- Taavalu aamma ineqartitaaneq, soorlu kisima akiliunneqassaanga uiga ilaaniaruni nammineq billetsi akilertariaqarpaa imaluunniit arlaat ilaquttat qanigisat ilaaniarunik namminneq akilertariaqarpaat billetsillu nalunngilarput qanoq akisutigisut, taanna oqarpoq nangillunilu:
- Taava nammineq akilerlugu uera ilaassaaq, aningaasarpaaluit atorlugit, taava aamma paasitinneqarnikuuvunga erniartortut najugaqatigeqqusaanngikkaat aappatik nammineq aamma inissamik ujaarlertariaqassalluta, aamma anigaasartuuteqarluta immikkut.
Taakku arnat marluk Nuummut erniartortut erniartortussallu napparsimmaveqarfinni sulisunik ernisorsiornermi peqataasinnaasunik amigaateqartoqanngitsuuppat nunagisartik qimannagu ernisinnaanissartik orniginartinnerugaluarlugu KNR-imut oqarput.
Naartunermi toqunartoqalersoortoqarneratigut, erninissamik ulloq killigititaq qaangersimagaanni, arlaannik inuunermut ulorianartorsiorsinnaappat kiisalu 35-it sinnerlugit ukioqartut Nuummut erniartortinneqartartut Ilulissani napparsimmaveqarfik ilisimatitsivoq.
