Misissuinermi kingullermi ersertoq: Naartusut najukkaminni ernerusupput, ajuissortoqarsinnaaneranulli sioorallutik
Nunatsinni naartusut 90´-ikkunni najukkaminni ernisarput, illloqarfinnilli annerni pingasuni, tassa Nuup Sisiumiut Ilulissallu avataani inunngortartut ullutsinni akuttusiartuinnarput.
Tamanna Peqqinnissqarfiup qullersaqarfiata kisitsisaataani erserpoq. Kisitsisit taakku naapertorlugit nunatsinni 2021-mi naartusut 88 procentiisa missaat Ilulissani, Nuummi Sisimiuniluunniit ernipput, aamma 2021-mi naartusut affangajaat ilaquttatik najugartillu qimallugit illoqarfimmut allamut erniartortariaqarsimapput.
Tamanna Naalakkersuisoqatigiit allanngortikkusuppaat. Naartusummi najukkaminni erninissamik orniginninnerulernissaat, Naalakkersuisut kissaatigaat.
Isumannaatsumilli ernineq pingaarnerpaasoq ilaqutariit naartusortallit Peqqinnissaqarfimmilu sulisut isumaqartut, misissuinermi kingullermi erserpoq.
- Ernisut isumannaatsumik toqqissisimasumillu isumagineqarnissaat pingaarnerpaasoq, naartusut Peqqinnissaqarfimmilu sulisut isumaqarput. Assersuutigalugu aapparisaq najorlugu erninissaq naartusut toqqissisimanartittarpaat, sillimasoqarnissaalu pingaartillugu.
Misissuinermi kingullermi ingerlatsisoq ilisimatusarnermilu ataqatigiissaarisoq nunatsinni innuttaasut peqqissusiannik ilisimatusarfimmeersoq, Ingelise Olesen, taama oqarpoq.
Nakorsaqarpa?!
Pinartoqarsinnaaneranut sillimaneq pineqartillugu pinngitsoornani ilisimajunnaarsitsisinnaasumik peqqissaasoqarnissaa, pilattaanermik misilittagalimmik nakorsaqarnissaa, aaviisartoqarnissaa ernisussiortoqarnissaalu pingaarluinnartoq, naartusut Peqqinnissaqarfimmilu sulisut isumaqarput.
Erninermi sillimasut pikkorissuunissaat naartusunik pingaartinneqartoq, naartusut misissuinermi peqataasut ilaata issuarneqarnerani ersarissumik oqariartuutigineqarpoq.
- Angerlarseraluarlunga, ernininni pinartoqarsinnaanerani uannik meeqqannillu isumaginnissinnaasunik eqqanniittoqarnera amerlanerat nuannaarutigaara.
Peqqinnissaqarfiulli ernininermi isumannaatsumik sullissisinnaasunik qulakkeerinninnissani ataatsimut isigalugu ajornakusoortippaa.
2012-mi Maniitsumi ernisoqarsinnaajunnaarpoq, 2017-milu Uummannami ernisoqarsinnaajunnaarluni. 2019-mi isumannaatsumik ernisitsisinnaaneq qulakkeerneqarsinnaajunnaarmat Aasianni nunap immikkoortuani ernisarfik kingullertut matuneqarpoq.
Pissutsip ilungersunartut taakku pissutigalugit ernisarfiit nunatsinni marluinnanngortinneqarnissaat ukiup matuma ingerlanerani Peqqinnissamut Ataatsimiititaliarsuup innersuussutigaa. Innersuussulli taanna peqqissutsimut naalakkersuisup Mimi Karlsenip akerlilerpaa:
- Nunap immikkoortuata napparsimavia Qaqortumiittoq pisinnaasamigut ilanngaavigineqarnavianngitsoq, taassuma oqaatigaa.
Ilaquttat qimannerat toqqissisimananngitsoq
Erninermi sillimaneq pingaaruteqaraluartoq, ajornanngippat sumiifiit maanna erniviusinnaasut periarfissaaginnarnissaat naartusut peqqinnissaqarfimmilu sulisut aamma isumaqatigiillutik oqariartuutigaat.Ilaquttammi qanillugit naartuneq toqqissisimanarneruvoq.
Arlaleriariarlutik ernisimasut, pingaartumik nalinginnaasumik ajoquteqanngitsumilllu najukkaminni ernereersut allami erninissartik akueriuminaatsittaraat misissuinermi aamma erserpoq. Isumannaatsumillu ernisitsisinnaasut naammanngimmata, peqqinnissaqarfimmi sulisut naartusut isumaannik tamatigut allannguisitsisinnaasarsimapput.
Naartusut aallarlutik erniartortarnerat suli pisariaqarmat, nunatsinni inuit peqqissusaanik misissuisut, ilaqutariit toqqissillutik meerartaariartortarnissaanmut arlalinnik siunnersuuteqarpoq.
Naartusut erniartornerminni ingiaqateqarnissamut periarfissinneqartalersinnaanerat ilaatigut siunnersuutigineqarpoq.
- Toqqissisimatitsiniaraanni aapparisap ingiaqatilluunniit allap erninermi ilaanissaa pingaaruteqarpoq.
Allami ernissagaanni ingiaqateqarsinnaaneq periarfissaariinnginnami?
- Naagga, ilaqutariit ilaanissaat pisariaqartinneqartoq aatsaat nalilerneqarpat taamaaliortoqassaaq, Ingelise Olsen oqarpoq.
Taanna neriuppoq misissuineq najukkami ernisarfiit pillugit oqallinnermut tunngavilersorluakkamut ukiuni aggersuni iluaqutaajumaartoq, aamma naartusunut ilaqutaanulllu toqqissisimanerulernermik kinguneqarumaartoq.
