Naalakkersuisoqatigiit ernisarfiit pillugit: Kissaatigigaluarpara amerlanerussasut

Tallimaniit marlunnut.

Erniartortarfiit nunatsinni isorartuumi marluinnanngornissaat siunniunneqassappat, Siumut Inuit Ataqatigiillu akerliupput.  

- Isumaqarpugut taanna siunertaq torrallataanngitsoq.

Mala Høy Kuko Siumumeersoq taama oqarpoq, Agathe Fontainilu Inuit Ataqatigiinneersoq isumaqataavoq:

- Kissaatigigaluarpara amerlanerussasut.

Agathe Fontain, Inuit Ataqatigiinneersoq taama oqarpoq.

Najukkami ernisinnaanissaq kissaatigaat

Naalakkersuisoqatigiit partiivi isumaqarput illoqarfinni ikinnerusunut erniartortoqarsinnaalissappat tulluartuunngitsoq.

- Tassa, Inuit Ataqatigiinninngaanniit isumaqarpugut, naartusoq juumuuminngaanniit naartunermini misissorneqartassasoq, siunnersorneqartassasoq ilitsersorneqartassasoq taamaammat sapinngisaq tamaat, allamulluunniit erniartussagaluaruni juumooqartarnissaa taanna sapinngisamik angorusuttorujussuugaluarparput, Agathe Fontain oqarpoq.

Najukkamilu ernisoqarsinnaanissaa orniginarnerusoq Siumut isumaqarpoq:

- Tassa periarfissaasariaqarpoq, nunatsinni tamani amerlanerpaani ernisinnaaneq nuna qimannagu, illoqarfik qimannagu. Taanna pingaartittorujussuuarput. Aamma anguniartariaqarpoq tamakkiisumik.

Mala Høy Kuko, Siumumeersoq, taama oqarpoq.

Nunatsinni 2021-mi 766 inunngorput, taakkua affangajai illoqarfitsik nunaqarfitsilluunniit qimallugu inunngorsimasut Nunatsinni Nakorsaaneqarfiup  kisitsisaataani erserpoq.

Innersuussutigineqartoq malinneqarli

Erniartortarfiillu marluinnanngortinneqarnissaannik innersuussineq Atassummit ilalerneqarpoq.

- Piviusorsiortumik misissuineruvoq tamakkiisumik, taannalu tusaaniartariaqarparput, Atassutip siulittaasua Aqqalu Jeremiassen taama oqarpoq.

Peqqinnissaqarfiup, aningaasanut inatsimmi atuiffiunerpaanera maluginiaqquaa.

Peqqinnissaqarfimmummi ukioq manna 1,7 milliardit koruunit immikkoortinneqarput. Aningaasallu taakkua naammannginnerannik oqallittoqartareersorlu erniartortarfinnik ikisilisaanissamik innersuussut malinneqassasoq Atassummiit isumaqarput.

- Suliassaqarsimavugut taava aaqqiiviginissaanut, aningaasat amigartut. Ukiut tamaasa taamannak inissinneqartartut. Taamaatsillugit allatut ajornaqaaq, innersuussutaat tassa taamannak oqariartorpoq. Piviusorsiortumik misissuineruvoq, tamakkiisumik. Taannalu tusaaniartariaqarparput.
Aqqalu Jeremiassen taama oqarpoq.

Nunatsinni erniartortarfiit illoqarfinni tallimani ullumi inissisimapput, tassa Nuummi, Ilulissani, Sisimiuni, Qaqortumi Tasiilamilu.