Ernisussiortut Kattuffiat: Ernisarfiit ikilissappata ajussaaq
NAQQIINEQ: Ilanngutassiami siusinnerusukkut Anna Wangenheim ernisarfiit ikilisinneqarnissaannut siunnersuuteqarnikuusimasoq allassimagaluarpoq. Tamanna kukkuneruvoq. Anna Wangenheimip ikilisitsisoqarnissaa isornartorsiungaatsiarnikuuaa. KNR-ip kukkuneq ajuusaarutigaa.
- Sinerissami ernisarfiit amerlanerit matuneqassappata annertuumik kingunipiloqaarsinnaavoq. Peqqinnissaqarfiup siunissaa pillugu eqqarsarluarnerunngilaq.
Ernisussiortut Kattuffiani siulittaasoq, Charlotte Bøgelund Peqqinnissaq pillugu ataatsimiititaliarsuup nunatsinni ernisarfiit siunissami marluinnanngornissaannut siunnersuutaa pillugu taama oqarpoq.
Angajoqqaanngortussat ungasissumut aallarlutik erniartortartut amerlareeqaat. Taamaammat pissutsit taakkununnga ajornerulersinneqannginnissaat aamma pingaaruteqarpoq.
Tamannami piffissami ulapaarfioreersumi atukkanik ajornerulersitsisinnaavoq.
- Ilisimavarput erniartorneq anaananngortussanut ernumarujussuarnermik uippakajaarnermillu kinguneqartartoq, aamma tamanna naartuumut sunniuteqartartoq ilisimavarput. Timimmi hormonii qisuariartarput tamannalu naartuumut sunniuteqartarpoq, Charlotte Bøgelund oqarpoq.
Ernisarfiit aatsaat siullermeertumik isumaqatigiinniutigineqanngitsut
Ernisarfiit amerlassusaat decembarimi aamma oqallisaavoq.
Mimi Karlsenillu tamanna taamani itigartitsissutigaa ernisarfiillu qanoq amerlatigisut pisariaqartinneqarnersut misissorneqarnissaat oqaatigaalu. Taamaammat Peqqissutsimut ataatsimiititaliap ernisarfinnik ikinnerulersitsinissamut siunnersuuteqarnera Charlotte Bøgelundip aamma ernumanartippaa.
- Mimi Karlsenip decembarimi nalunaarutaanut politikkikkut tunngavilersuisoqassaaq uppernarsarneqassallunilu Peqqinnissaq pillugu ataatsimiititaliarsuulli nalunaarusiaanit ernisarfiit ikinnerulersinneqarnissaannik innersuussuteqartoqaraluartoq paasissutissat suut taama innersuussuteqarnermut tunngaviunersut misissorneqarsinnaapput.
Ernisussiortut allarpassuarnik suliassaqarput
Charlotte Bøgelundip oqarnera naapertorlugu ernisussiortut ernisussiuinnarneq ajorput, inuiaqatigiinni suliassarpassuit allat ernisussiortunit suliarineqartartut puiorneqartarput. Kinguaassiutitigut nappaatit, naartunaveersaatit, ilaqutariinnik sullissisarput mianernartullu pillugit siunnersuisarlutik. Unammillernartut taakku Peqqissutsimut ataatsimiititaliarsuup nammineerluni aamma aaqqiissuteqarfiginiarsarai.
Taassuma ernisussiortut erninermi kisimi najuuttussatut amerlasuunit isigineqarpallaartarsorai, suliassanik annertuunik, ernineq sioqqullugu kingornalu suliassanik pingaarnerusinnaasunik annertunerusinnaasunillu suliaqartarnerat puiorneqartarnerarpaa.
- Ernisussiortut qanoq atorneqarsinnaaneranik soqitiginninnginneruvoq. Siammasinnerusumik kivitsisinnaavugut, inuiaqatigiinnullu pitsaasumik tunniussaqarsinnaalluta. Ernisussiortut taama kivitsisinnaapput, kisianni sumiiffimmiinngikkutta taamaaliorsinnaanngilagut.
