Ernisarfiit nunatsinni marluinnanngornissaat Mimi Karlsenip ilumuunnginnerarpaa
Naartusut nunatsinnni sumiiffinni arlalinni 2035-mi aamma ernisisnnaassapput.
Peqqissutsimut Naalakkersuisoq Mimi Karlsen (IA) naapertorlugu taamaassaaq.
Anna Wangenheim Demokraatineersoq naapertorlugu ernisarfiit 2035-mi marluinnanngortinneqarnissaat Peqqinnissamut Aqutsisut pilersaarutigaat, tamannali MImi Karlsenip ilumuunnginnerarpaa.
- Nunatsinni ernisarfiit 2035-mi marluinnanngortinneqarnissaanik pilersaarummik Peqqinnissamut Aqutsisunit Naalakkersuisunut saqqummiusisoqarnikuunngilaq, Mimi Karlsen allappoq.
AAMMA ATUARUK Qaqortumi ernisoqarsinnaaleqqissasoq – Ernisussiortut Kattuffialli suli ernumasoq
Ernisussiortut Kattuffiat Peqqinnissamut Aqutsisut ukiut aqqaneq-marluk ingerlanerani ernisarfinnik marluinnanngortitsinissamik pilersaaruteqarnerarlugit Sermitsiaq.AG-kkut decembarimi isornartorsiuivoq, tamannalu maanna Mimi Karlsenip akissuteqarfigaa.
Peqqinnissamut Aqutsisut seminareqarnerminni pilersaarummik saqqummiusisimasut Sermitsiaq.AG allappoq.
Mimi Karlsenillu tamanna ilumuunnginnerarpaa, Peqqinnissamut Aqutsisut iluminni, Ernisussiortut Kattuffiata peqataaffiginngisaannik seminareqarsimasut paasissutissiissutigaa. Kisianni tassa ernisarfiit marluinnanngortinnissaanik pilersaarut Naalakkersuisunik uppernarsarneqarsinnaanngilaq.
Ernisarfiit misissorneqarlutillu nalilersorneqassasut
Nunap immikkoortuani napparsimmaviup Qaqortumiittup ernisarfia ukiup sinnerani matuneqarallassasoq Naalakkersuisut aggustimi nalunaarutigereeraallu, ernisarfiit pillugit oqallinneq aallarteqqippoq.
Pilertortumik passuttariaqarlutik ernisut pillugit pilattaasinnaasumik nakorsassaaleqineq pissutigalugu ernisarfik matuneqarallarpoq.
Nunatsinni peqqinnissaqarfiup ernisarfiit tallimat:
Dronning Ingridip napparsimmavissua
Ilulissani Peqqinnissaqarfik Avannaani qitiusumik napparsimmavik
Sisimiuni Peqqinnissaqarfik Qeqqani qitiusumik napparsimmavik
Tasiilami Peqqissaavik
Qaqortumi Peqqinnissaqarfik Kujataani qitiusumik napparsimmavik
marsip tungaanut ammagallassaaq
Pilattaasinnaasumillu atorfinititsisoqarallarnera juullinngitsiartoq KNR-imit oqaluttuaraarput. Taannali marsip 24-ata tungaannaanut atorfeqassaaq. Taamalilluni upernaap ingerlanerani ernisussat kujataani najugallit Nuummukaratik Qaqortumi ernisinnaapput.
Naalakkersuisulli nunatsinni ernisussanik sullissinermik misissuititsipput. Mimi Karlsen naapertorlugu peqqinnissaqarfimmi sulisut aamma naartusut ilaqutaasalu atugaat aallaavigalgut 'periarfissat aporfiillu' pillugit ilisimasaqarnerulernissaq misissuinermi siunertaavoq.
AAMMA ATUARUK Marîna juulimi ernisussaavoq – taassumalu Qaqortumi ernisinnaanissani neriuutigaa
Misissuineq politikerit siunissamut pilersaarusiornissaanut atorneqassaaq.
Qaqortumi Aasiannilu ernisarfiit 2019-miilli matoqqasut atuinnarnissaat pilersaarutaasoq Mimi Karlsen Demokraatinut akissummini paasissutissiivoq.
- Aap, ernisussanut upalungaarsimasussanik pilersitsisoqarsinnaappat, tassanilu pineqarpoq tassanngaannartumik erninermi assigiinngitsunik ajornartorsiuteqalissagaluarpat, soorlu aanaarujussuarnerit, pilaanerit aamma naalungiarsuk ajoquteqassagaluarpat tamakkuninnga isumaginnissinnaasunik sulisoqarnissaq. Erninerlunnerit ajornerpaamik anaanaasup meeqqallunniit inuunerannik annaasaqarfiusinnaapput, Mimi Karlsen allappoq.
Nakorsamik pilattaanermik misilittagalimmik, peqqissaasumik ilisimajunnaartitsisinnaasumik, aaviisartumik kiisalu ernisussiortumik sulisoqarnissaa ernisarfeqarnissamut piumasaqaataapput