Qaqortumi ernisoqarsinnaaleqqissasoq – Ernisussiortut Kattuffialli suli ernumasoq
Ukioq nutaaq nutaarsiassamik nunatta kujataani naartusunut eqqissiallannartumik aallartippoq.
Qaqortup Napparsimmavianimi ernisarfik jannuaarip ulluisa aqqarnannit marsip ulluisa 24-ata tungaanut ammassaaq, taamaalilluni naartusut Nuummukarlutik erniartortariaqassanngillat.
Tamanna aamma Ernisussiortut Kattuffiannit nuannaarutigineqartoq, kattuffimmi siulittaasuugallartoq, Charlotte Bøgelund oqarpoq.
- Atorfimmut inuttassarsiuisartut pilattaasartumik nassaarsimanerat soorunami nuannaarutigilluinnarparput, taanna oqarpoq.
Qaqortumi ernisarfik 2023-mi januaari tikillugu matugallarneqartoq Peqqissutsimut Naalakkersuisoqarfiup aggustimi nalunaarutigaa.
Peqqinnissamut aqutsisut piffissami sivitsortumi nunap immikkoortuani napparsimmavimmut pilattaasartumik atorfinitsitsiniarnerat iluatsissimanngilaq.
Napparsimmavimmi pilattaalluni ernisitsisinnaanisunik, aanaarnermik isumaginnissinnaasunik kiisalu meeraaqqami inoorlaami allatut naatsorsuutiginngisanik isumaginnissinnaasumik pilattaasussaqanngilaq.
Tassunga taarsiullugu nunatta kujataani naartusut Nuummut Dronning Ingridip Napparsimmavissuanut ukiortaap tungaanut erniartortassapput.
Qaqortumi ernisarfik napparsimmavimmi ernisoqarnerani pilaallunilu ernisoqarnerani ikiuisinnaasumik pilattaasartoqannginnera pissutigalugu aggustimi matuneqarallarpoq.
AAMMA ATUARUK Qaqortumi ernisarfiup matugallalernera juumuut nalugaat
Ernisussiortut Kattuffiata Qaqortumi Napparsimmaviup peqqissaavinngortikkiartoqalernissaa taamaalilluni Qaqortumi napparsimmavimmi ernisoqarsinnaajunnaarnissaa ernumassutigaa.
Illoqarfinni allani napparsimmavinni ernisarfiit arlallit matorarnikuupput – kingullermik Aasianniittoq 2019-imi matuneqarpoq. Taannalu ammaqqinneqarnikuunngilaq.
- Tamanna suli ernumanarpoq, tassami pilattaasartumik suli atorfinitsitsivittoqanngilaq, tassungalu ataavartumik suli aaqqiissuteqartoqarani. Taamaammat ernumajunnaartugut oqaatigisinnaanngilarput, Qaqortumi Napparsimmavimmi ernisussiortoq, Charlotte Bøgelund oqarpoq.
Erseqqissaasoqartariaqartoq
Naartusut marsiutinnagu ernisussat illoqarfigisami immikkoortortaqarfiani ernisinnaanissartik oqiliallaatigigaat, Charlotte Bøgelundip ilanngullugu oqaatigaa.
Arnanulli marsip kingorna erninissamut killeqartunut tamanna allaaneruvoq.
- Taakkua susoqarnissaanik erseqqissaasoqarnissaa suli pisariaqartippaat. Tamannalu paasinarluinnarpoq, taakkuami erninissaminnut piffissaqarluarlutik piareersarnissartik pisariaqartippaat, aamma aallartariaqarnerminnut tassanngaannartumik naleqqussartariaqassanatik, Charlotte Bøgelund oqarpoq.
Taamaammat Ernisussiortut Kattuffiata politikerit peqqinnissamulu aqutsisut suli oqaloqatigiissuteqarfigai.
AAMMA ATUARUK Marîna juulimi ernisussaavoq – taassumalu Qaqortumi ernisinnaanissani neriuutigaa
- Oqaloqatigiinnerup naammassisaqarfiunissaa neriuutigaarput, Charlotte Bøgelund oqarpoq.
Marîna Anthonsen Nanortalimmi najugaqartoq juunimi ernisussat ilagaat.
Taassuma Qaqortumi ernisinnaanissani suli neriuutigaa.
- Aallaqqusaasaratta pinngitsoornata, pitsaanerpaassagaluarpoq Qaqortumi, taanna KNR-imut oqarpoq.