Marîna juulimi ernisussaavoq – taassumalu Qaqortumi ernisinnaanissani neriuutigaa
Qaqortumi napparsimmaviup ernisarfiani aggustimili matoqqatinneqarallalerpoq.
Napparsimmavimmi pisariusumik ernisoqarnissaanut ikiuussinnaasumik pilattaasussaqanngilaq. Taamaammat nunatta kujataani naartusut Nuummut Dronning Ingridiup Napparsimmavianut erniartortinneqartalerput.
Qaqortumi ernisarfik 2023-mi januaari tikillugu matugallarneqartoq Peqqissutsimut Naalakkersuisoqarfiup aggustimi nalunaarutigaa.
Peqqinnissamut aqutsisut piffissami sivitsortumi nunap immikkoortuani napparsimmavimmut pilattaasartumik atorfinitsitsiniarnerat iluatsissimanngilaq.
Napparsimmavimmi pilattaalluni ernisitsisinnaanisunik, aanaarnermik isumaginnissinnaasunik kiisalu meeraaqqami inoorlaami allatut naatsorsuutiginngisanik isumaginnissinnaasumik pilattaasussaqanngilaq.
Tassunga taarsiullugu nunatta kujataani naartusut Nuummut Dronning Ingridip Napparsimmavissuanut ukiortaap tungaanut erniartortassapput.
Peqqinnissamut aqutsisoqarfimmit nalunaarut utaqqiuarneqarsimasoq ippassaq takkuppoq: Napparsimmavimmi pilattaasartuugallartussamik januaarip 11-anit marsip 24-anut atorfinitsitsisoqarallarpoq.
Marsip 24-anit atorfinissinnaasumik suli pissarsisoqanngilaq. Ernisarfiulli marsip 24-anit ammaannarsinnaanissaanut pilattaasartunut atorfimmik suli pilerisaarisoqartoq, peqqinnissamut aqutsisut pisortaata, Tina Amondsenip ippassaq nalunaarutigaa.
Qaqortumit Nuummiit qaninnerusoq
Marîna Anthonsenillu atorfinitsitsisoqarnissaa neriuutigaa. Taanna Nanortalimmi najugaqarpoq juulimilu ernisussaalluni. Taanna ernereernikuuvoq – maannakkullu erninissaata sisamaralugu. Taassuma aallarluni erniartortarneq sungiusimavaa. Kisianni:
- Aallaqqusaasaratta pinngitsoornata, pitsaanerpaasagaluarpoq Qaqortumi, taanna KNR-imut oqarpoq.
AAMMA ATUARUK Fødestedsfadæse: Johanne og Paula er de første, der blev sendt til Nuuk
Illoqarfinni allani napparsimmavinni ernisarfiit matorarnikuupput – kingullermik Aasianniittoq 2019-imi matuneqarpoq. Ernisarfiillu ammaqqinneqarnikuunatik.
Marîna Anthonsen. Assi: Johansinnguaq Olsen/ KNR.
Ernisussiortut Kattuffiata aamma Peqqinnissaq Pillugu Kattuffiit Qaqortumi napparsimmaviup siunissaa ernumassutigaat. Napparsimmavik peqqissaavinngoriartornialeqimmat taakku ernumapput.
Kalaallit Nunaanni peqqinnissaqarfik sumiiffinni tallimaasuni ernisarfeqarpoq
Nuna tamakkerlugu nakorsiartarfik Dronning Ingrids Hospital
Nunap immikkoortuini napparsimmavik Ilulissat
Nunap immikkoortuini napparsimmavik Sisimiut
Nunap immikkoortuini napparsimmavik Tasiilaq
Nunap immikkoortuini napparsimmavik Qaqortoq - utaqqiisaagallartumik jaanuarip tungaanut matugallarpoq.
Peqqissutsimulli naalakkersuisup, Mimi Karlsenip (IA) KNR-imut taamaaliortoqassannginnerarpaa.
Ilaquttat qimallugit aallarusunngikkaluartoq
Marîna Anthonsenili kissaateqarpoq.
Taanna qanorluunniit illoqarfigisani qimallugu Qaqortumut Nuummulluunniit erniartussaaq. Taassumali uini ilaatikkusukkaluarpaa – taamaaliussagunilli ilaqutariit namminneerlutik akiliissapput.
AAMMA ATUARUK Qaqortumi napparsimmaviup ernisarfia januaarip aqqarnanit ammaqqissasoq
- Tassa ilaqutakka uanga qimakkusunnginnakkit. Qimallugit assorunnartarami, meeqqat maqaasisut uanga maqaasigikka, uiga maqaasisoq, tamatta maqaasisugut, ila erloqinartaqaaq.
Ernisarfiit matoorartut:
- Kingullermik Aasianni ernisarfik matuvoq. Tassani sulisussanik naleqquttunik piginnaasalinnik amigaateqarneq pissutaavoq. Siullermik matugallarneqartoq nalunaarutigineqarpoq.
- Uummannami ernisarfik 2017-imi matuvoq.
- Maniitsumi 2012-imi ernisarfeqarunnaarpoq.
