Qaqortumi napparsimmaviup ernisarfia januaarip aqqarnanit ammaqqissasoq
Aggustimi nalunaarutigineqarpoq: Qaqortumi napparsiviup ernisarfia matugallalerpoq.
Napparsimmavimmi pisariusumik ernisoqarneani ikiuussinnaasumik pilattaasussaqanngilaq. Taamaammat naartusut Nuummut Dronning Ingriud Napparsimmavianut erniartortinneqartalerput, napparsimmavimmili ernisarfik januaarimit ammaqqissasoq nalunaarutigineqarpoq.
AAMMA ATUARUK Fødestedsfadæse: Johanne og Paula er de første, der blev sendt til Nuuk
Maanna aaqqiissutaagallartussamik nassaartoqarpoq, arnat taamaalillutik Qaqortumi januaarip aallaqqaataani ernisinnaanngorlutik.
Qaqortumi ernisarfik 2023-mi januaari tikillugu matugallarneqartoq Peqqissutsimut Naalakkersuisoqarfiup aggustimi nalunaarutigaa.
Peqqinnissamut aqutsisut piffissami sivitsortumi nunap immikkoortuani napparsimmavimmut pilattaasartumik atorfinitsitsiniarnerat iluatsissimanngilaq.
Napparsimmavimmi pilattaalluni ernisitsisinnaanisunik, aanaarnermik isumaginnissinnaasunik kiisalu meeraaqqami inoorlaami allatut naatsorsuutiginngisanik isumaginnissinnaasumik pilattaasussaqanngilaq.
Tassunga taarsiullugu nunatta kujataani naartusut Nuummut Dronning Ingridip Napparsimmavissuanut ukiortaap tungaanut erniartortassapput.
Peqqinnissaq pillugu aqutsisut oqarnerat naapertorlugu pilattaasinnaasumik napparsimmavimmi januaarip aqqarnanit marsip 24-ata tungaanut atorfinitsitsisoqarallarpoq.
Pilattaasussamik marsip 24-anit amigaateqassasoq
Pilattaasunut suli ussassaarisoqarpoq, ernisarfik taamaalilluni marsip ulluisa 24-ata kingorna ammaannarsinnaassalluni, peqqinnissaq pillugu aqutsisoqarfimmi pisortaq, Tina Amondsen nalunaaruteqarpoq.
Matusigallarneq naartusunut napparsimmavimmilu sulisunut pakatsissutaavoq. Illoqarfinni allani napparsimmavinni ernisarfinnik matoorisoqarnikuuvoq - kingullermik Aasianni ernisarfik 2019-imi matuvoq.
Ernisussiortut Kattuffiata aamma Peqqinnissaq Pillugu Kattuffiit Qaqortumi napparsimmaviup siunissaa ernumassutigaat. Napparsimmavik peqqissaavinngoriartornialeqimmat taakku ernumapput.
AAMMA ATUARUK Mimi Karlsen: Qaqortumi napparsimmaviup peqqissaaviinnanngornissaa pilersaarutaanngilaq
Tamannali pilersaarutaanngitsoq, peqqissutsimut Mimi Karlsenip (IA) oqaatigaa.
Kalaallit Nunaanni peqqinnissaqarfik sumiiffinni tallimaasuni ernisarfeqarpoq
Nuna tamakkerlugu nakorsiartarfik Dronning Ingrids Hospital
Nunap immikkoortuini napparsimmavik Ilulissat
Nunap immikkoortuini napparsimmavik Sisimiut
Nunap immikkoortuini napparsimmavik Tasiilaq
Nunap immikkoortuini napparsimmavik Qaqortoq - utaqqiisaagallartumik jaanuarip tungaanut matugallarpoq.
Suliaq imaannaanngitsoq
Nunatta kujataani pilattaasunik atorfinitsitsiniarneq ajornakusuungaatsiartoq, taassuma KNR-imi septembarimi oqaatigaa.
Taassuma piffissami tassani nunatsinni peqqinnissaqarfimmut sulisussanik Danmarkimi atorfinitsitsiniarnermik suliaqartoq pulaaqqammerpaa.
- Suleqatigiit taakku Danmarkimi sulisut peqatigiiffiinik A-kassinillu suleqateqarput, atorfinissinnaasunik sulisussarsiorlutik angalasarput soorlu Odensemi Universitetshospitaimut Rigshospitalimut allanullu. Taamaammat pilattaasartunik Qaqortumi atorfinissinnaasunik pissarsiorneq assorooruppaat, Mimi Karlsen oqarpoq.
Ernisarfiit matoorartut:
- Kingullermik Aasianni ernisarfik matuvoq. Tassani sulisussanik naleqquttunik piginnaasalinnik amigaateqarneq pissutaavoq. Siullermik matugallarneqartoq nalunaarutigineqarpoq.
- Uummannami ernisarfik 2017-imi matuvoq.
- Maniitsumi 2012-imi ernisarfeqarunnaarpoq.