Mimi Karlsen: Qaqortumi napparsimmaviup peqqissaaviinnanngornissaa pilersaarutaanngilaq
- Qaqortumi napparsimmaviup nunap immikkoortuani napparsimmavittut atuunneranut annikillisaanissamik pilersaaruteqanngilagut.
Nunap immikkoortuani kujataani napparsimmaviup siunissaa pillugu taama ersaritsigisumik Peqqissutsimut naalakkersuisoq Mimi Karlsen (IA) oqariartuuteqarpoq.
Qaqortumi ernisarfik 2023-mi januaari tikillugu matugallarneqartoq Peqqissutsimut Naalakkersuisoqarfiup aggustimi nalunaarutigaa.
Peqqinnissamut aqutsisut piffissami sivitsortumi nunap immikkoortuani napparsimmavimmut pilattaasartumik atorfinitsitsiniarnerat iluatsissimanngilaq.
Napparsimmavimmi pilattaalluni ernisitsisinnaanisunik, aanaarnermik isumaginnissinnaasunik kiisalu meeraaqqami inoorlaami allatut naatsorsuutiginngisanik isumaginnissinnaasumik pilattaasussaqanngilaq.
Tassunga taarsiullugu nunatta kujataani naartusut Nuummut Dronning Ingridip Napparsimmavissuanut ukiortaap tungaanut erniartortassapput.
Nunap immikkoortuata napparsimaviata siunissaa pillugu Ernisussiortut Kattuffiat aamma Peqqinnissaq Pillugu Kattuffiit, PKK ernumassuteqarlutik oqariartuuteqarput.
Napparsimaviup peqqissaaviinnartut atortariqalersinnaanera ernumassutigaat.
AAMMA ATUARUK Ernisussiortut ernumasut: Qaqortumi napparsimmavik peqqissaavinngorsinnaavoq
Nakorsanik pilattaasinnaasunik atorfinititsiniarnerup ajornakusoornera pissutigalugu aappaagu januaarip tungaanut ernisarfik matuneqarallarpoq, ernisarfimmi ammassappat pilattaasinnaasunik nakorsaqartariaqarpoq. Tamannalu ernumalersitsivoq.
Taamaammat naartusut Nuummi Dronning Ingridip Napparsimavissuanut erniartortaqariaqalerput.
Nakorsanik pilattaasinnaasunik kujataani napparsimavimmut atorfinititsiniarneq peqqinnissaqarfiup ilungersuullugu sulissutigigaa Naalakkersusoq Mimi Karlsen oqarpoq.
Nunatsinnut peqqinnissaqarfimmut atorfinititsiniaallutik suleqatigiit Danmarkimiittut taassuma tikeraaqqammerpai.
- Sulqatigiit taakku Danmarkimi sulisut peqatigiiffiinik A-kassinillu suleqateqarput, atorfinissinnaasunik sulisussarsiorlutik angalasarput soorlu Odensemi Universitetshospitaimut Rigshospitalimut allanullu. Taamaammat pilattaasartunik Qaqortumi atorfinissinnaasunik pissarsiorneq assorooruppaat, Mimi Karlsen oqarpoq.
Ernumassut: Ataatsip soraarnera tuniluuttarpoq
Napparsimavimmi ernisarfiup matuneqarnera Ernisussiortut Kattuffianik PPK-millu kisimi ernumanartinneqanngilaq.
Sulisut aalajangersimasut assersuutigalugu nakorsat pilattaasartut soraaraangata, aalajangersimasumik allamik suliallit aamma soraartarnerat ilimanaateqarpoq.
Sulisullu aalajangersimasut suleqatigiinnissaat katsorsaanerni amerlasuuni pinngitsoorneqarsinnanngilaq, taamaammat aalajangersimasumik suliallit arlaannaalluunniit amigaataaleraangata sullissineq kipiluttunarsisarpoq.
Piffissami qaninnerpaami ernisarfik sulisut pisariaqartinneqartut sulisoralugit ammaqqinngippat, Qaqortumi nunap immikkoortuatut napparsimaviup peqqiissaaviinnartut atuuttariaqalersinnaanera peqqinnissamik suliallit peqatigiiffiissa aarleqqutigaat.
AAMMA ATUARUK Pilattaasussaaleqisoqarmat Qaqortumi ernisarfik ukiup sinnerani matoqqassaaq
Sulisullu kissaataat ernumassutaallu Mimi Karlsenip paasilluarsinnaanerarpai.
- Suliffimmi suleqateqarnissamik kissaateqarneq eqqumiiginanngilaq. Tamanna tamani atuupput aamma Nuummi. Kisianni tassa sulisut Qaqortumi pisariaqartinneqartut atorfinitsinniarlugit suli ilungersuuteqarpugut, Mimi Karlsen oqarpoq.
Uummannami Aasiannilu ernisarfiit 2017-imi aamma 2019-mi matugallarneqarnerisa kingorna ammaqqissimannginnerat, ernisussiortut siulittaasuata tikkuarpaa.
Kujataani aamma taama pisoqarnissaa taassuma aarleqqutigaa.
Qaqortumi taama pisoqannginnissaa Mimi Karlsenip KNR-imut neriorsuutigerusunngilaa, Kisianni ima oqarluni:
- Politikeritut qulakkeerinnissinnaanngilanga, kisianni Qaqortumi pilattaasinnaasumik nakorsaqalernissaa ilungersuutigaarput.
