Pilattaasussaaleqisoqarmat Qaqortumi ernisarfik ukiup sinnerani matoqqassaaq
Nunatta kujataani arnat ukioq manna ernisussat angalangaatsiartariaqarput.
Qaqortumimi napparsimaviuk ernisarfik maannakkumit 2023-mi januaarip tungaanut matugallarpaa. Tamanna napparsimmavimmi pilattaalluni ernisitsisinnaanisunik, aanaarnermik isumaginnissinnaasunik kiisalu meeraaqqami inoorlaami allatut naatsorsuutiginngisanik isumaginnissinnaasumik pilattaasussaqannginneranik pissuteqarpoq.
Taamaammat ernisussat Nuummukartinneqartassasut, Namminersorlutik Oqartussat tusagassiuutinut nalunaarummi allapput.
Kalaallit Nunaanni peqqinnissaqarfik sumiiffinni tallimaasuni ernisarfeqarpoq:
Nuna tamakkerlugu nakorsiartarfik Dronning Ingrids Hospital
Nunap immikkoortuini napparsimmavik Ilulissat
Nunap immikkoortuini napparsimmavik Sisimiut
Nunap immikkoortuini napparsimmavik Tasiilaq
Nunap immikkoortuini napparsimmavik Qaqortoq - taannalu maanna januaarip tungaanut matugallarneqarpoq
Qaqortup napparsimmaviani aappaagu januaarimit ernisoqaqqissinnaalernissaa neriuutigineqarpoq.
Pilattaasartoqanngitsoq
”Piffissami sivitsortumi ilungersorluni sulisussarsiortoqaraluartoq, ajoraluartumik 2022-mi ukiakkut piffissat ilaanni, Peqqinnissaqarfik Kujataani nakorsanik qulaanilu taaneqartunik pilattaanermik piginnaasaqartunik misilittagalinnillu sulilersitsinissaq ajornarsimavoq”, Namminersorlutik Oqartussat nalunaaruteqarput.
- Peqqinnissaqarfik ernisarnermi sullissinermi piffissaq sivikitsoq atorlugu kalerriinikkut naleqqussaasariaqalernera ajuusaarnarpoq, peqqinnissamut naalakkersuisoq, Mimi Karlsen (IA) oqarpoq.
AAMMA ATUARUK Naalakkersuisoq: Nunatsinni naartusut aallarlutik erniartortariaqanngikkaluarput
- Ilaqutariinnut sunnerneqartunut allannguinerup toqqissisimannginnermik pilersitsisinnaanera paasisinnaangaarpara. Peqatigitillugu eqqaamassallugu pingaaruteqarpoq, erninermi piareersimasunut piumasaqaatit, erninerup nalaani ernereernermilu anaanaasup meeqqallu isumannaatsuunissaat qulakkeerniarlugu aalajangersarneqarnikuummata.
Peqqinnissaqarfik pilattaasartunik ernisoqarnerani upalungaarsimasinnaanermut piginnaasaqartunik suli atorfinitsitsiniarsarivoq.
Toqqaannartumik nalunaaruteqassasut
Ilaqutariit sunnerneqartut tamarmik peqqinnissaqarfimmit toqqaannartumik nalunaarfigineqassapput.
KNR-ip Mimi Karlsen, peqqinnissamut aqutsisut, Qaqortumi nakorsat pisortaat kiisalu nunatsinni ernisussiortut peqatigiiffiat oqaaseqartinniarsarigaluarpai. Tamannali ajoraluartumik iluatsinngilaq.
Peqqinnissamut naalakkersuisuusimasup, Kirsten Fenckerip (N) naartusunut ernisussanullu atugassarititaasut pitsanngorsarneqarnissaat siorna maajimi oqaatigaa.
- Nalilersuineq soorunami innersuussutinik imaqartussaassaaq. Najugaq qimannagu ernisinnaaneq iluatsissappat qanoruna iliortariaqartugut, taava politikikkut eqqartornissaa tullinnguutissaaq.
Taava imaappa ernisarfiit matuneqarsimasut ammaqqinneqassasut?
- Politikkikkut tamanna ukkatarineqarluni kissaatigineqarpoq, aap.
AAMMA ATUARUK Ernisussiortut Kattuffiat: Aallarlutik erniartortariaaruttariaqartut
Ernisarfimmik kingullermik Aasianni 2019-imi matusisoqarpoq. Pisariaqartinneqartunik sulisussarsisinnaannginneq tamatumani pissutaavoq.
Uummannami ernisarfik 2017-imi matuvoq, Maniitsumilu ernisarfik 2012-imi matulluni.