Ernisussiortut Kattuffiat: Aallarlutik erniartortariaaruttariaqartut
Nunatsinni naartusut 40-miit 45 procentiinut erniartorlutik aallartarput.
Arnat kisimiillutik aallakkajupput aatsaallu qitornaat sapaatit akunnerini arlalinnik utoqqaassuseqaleraangata angerlartarlutik.
Pissutsit taamaattut Ernisussiortut Kattuffianit ernumanartinneqarlutillu suaarutigineqartariaqarsoraat.
- Naartulernermi tamanna aallartittarpoq. Naartunerup nalaani qanoq misigineq qitornap inuuneriumaagaanut sunniuteqartarpoq. Naartuunerup nalaa pingaaruteqarpallaanngitsutut isiginiarneqartaraluarpoq. Massakkulli paasinarsivoq inuunerisa pingaarnersaannut ilaasoq. Ilaatigut inuunerup ingerlaneranut qanoq uippakajaarneq ernumassuteqarnerlu inuunermut sunniuteqapilussinnaatiginersoq, Anne Schurmann nassuiaavoq.
Kalaallit Nunaanni peqqinnissaqarfik sumiiffinni tallimaasuni ernisarfeqarpoq
Nuna tamakkerlugu nakorsiartarfik Dronning Ingrids Hospital
Nunap immikkoortuini napparsimmavik Ilulissat
Nunap immikkoortuini napparsimmavik Sisimiut
Nunap immikkoortuini napparsimmavik Tasiilaq
Nunap immikkoortuini napparsimmavik Qaqortoq
Taanna Ernisussiortut Kattuffianni siulittaasuuvoq, taannalu isumaqarpoq arnarpassuit angerlarsimaffitsit ilaquttatillu qimallugit, sumiiffinnut ernisarfinnut tallimaannaasunut erniartortariaqartarnerat tunngavissaqarluanngitsoq.
- Sinerissami naartusunit ilaquttat qimannissaat eqqarsaatigineqartarpoq, allaalluunniimmi suli ernisussiortumiinnikuusaratik. Apeqquterpassuit akineqarneq ajorput. Imaassinnaavoq illoqarfigisamut ernisussiortumik tikittoqartussaagaluarluni taamaatiinnarneqarsimasoq. Tamakku akunnattoornerit naartunermut sunniuteqarnerluttarput.
Nukittullunilu qajannartoq
Sinerissami ernisarfiit ernisussiortullu ikiligaluttuinnartillugit arnarpassuit naartunerminni kisimiittarput.
Tamanna naleqqutinngilaq, Anne Schurmann oqarpoq.
AAMMA ATUARUK Borgere i Aasiaat demonstrerer mod lukning af fødested
- Naartunermi itsaq inuusimasut assigalugit nukittunarsinnaasarpoq, tamannalu misigisaq imaanaanngitsuusarpoq. Tamaakkaluartorli aamma eqqarsaaterpassuit ernumassuterpassuillu naartunerullu nalaani allannguuterpassuit misigineqartarput. Naartusoq kinaluunniit qajannarlunilu mianernartuusarpoq, kaammattorneqarnissamut isumagineqarnissamullu pisariaqartitsisoqartarluni. Naartusullu ernisussiortuniit isumassorneqarsinnaanissaat Kalaallit Nunaanni ajoraluartumik periarfissarineq ajorpaat.
Ernisarfiit matuneqartut
Ernisarfik matuneqartoq kingulleq Aasianniippoq.
Piumasaqaatinut naammassinnissinnaasunik sulisussaqannginnerat pissutaalluni 2019-mi matuvoq. Matusigallarnerusoq nalunaarutigineqarpoq.
Aasianni ernisarfiup ammaqqinneqqarnissaanut Aningaasaqarnermut inatsisissatut siunnersuumi allaqqavoq.
2017-mi Uummannami ernisarfik matuvoq.
2012-mi Maniitsumi ernisarfik matuvoq.
Avannaani illoqarfinnut nunaqarfinnullu naartusunik misissuiartorluni ukiumut arlaleriarluni angalasarlunilu, Anne Schurmann nammineerluni Ilulissani ernisussiortuunikuuvoq.
- Angalaninni pisoqartuaannangajappoq. Ilaatigut ernisoqariasaartarpoq. Iluatitsinermik misiginarsinnaasarpoq ernisumik ikiuisinnaalluni. Tamaakkaluartoq pisariaqartumik piareersaasimanissaq amigaataasarpoq.
Taamaalinerani ernisussiortutut piareersimaffiginngisanik suliaqarataarsinnaaneq nammineerluni aaqqiisariaqarnarsinnaasarpoq.
Erniartornissamut inatsit
Naartusut erninerminni ajornartorsiuteqalersinnaasutut nalilerneqartut tamarmik Nuummut erniartornissamut innersuunneqartarnissaat 2000-ikkut aallartinneranni aalajangiunneqarpoq.
Tamatumunngalu peqatigitillugu ernisarfinni ernisussiortup imaluunniit ernisussiortumut ikiortip saniatigut allanik sulisoqarnissaa piumasaqaatigineqalerpoq. Pilaanikkut ernisitsineq, aanaartoortoqarneranik ikiuineq naalungiarsummillu uummarsaaneq tamatumani pineqarput.
- Nammineerlunga aaqqiissuteqarniartussaasariaqartarpunga. Silamillu tunngaveqartumik apuuffissamut qulimiguulimmik tikissinnaajunnaaraanni, ilaqutaasunut oqarasuaatikkut kalerriinissaq ajornakusoorsinnaasarpoq.
Soormi ajuissorsimappat arnarpassuarniit naammagittaalliutigineqarneq ajortoq?
- Ernisorpassuit meerartaareeraangamik misigisallu qaangiutereeraangata suna tamaat aaqqittutut misiginartarsimassasoq isumaqarpunga. Misigisimasat oqaluttuarinissaannut isumalluutit amigaataasarput. Immaqa ilaatigut aperineqarnissaq pisariaqartarpoq. Aamma oqaaseqartartoqarnissaq ilaatigut pisariaqarsinnaasarpoq. Taamaammat qineqqusaarnerup nalaani ukkatarinnittoqarnissaa piffissaalluarpoq.
Pissutsit naartusut akornanni aamma akuerineqartartut Anne Schurmannip aamma maluginiarpaa.
- Ilaat assersuutigalugu oqartarput: Ilisimareerparami. Nunaqarfinni najugaqarpunga. Taamaammat uanga qinigaraara. Nalunngilara aallarlunga erniartortussaallunga. Taamaammat imaassinnaavoq tamanna torraginerpaanngikkaluarlugu pissutsit taamaannerat ilisimaneqartoq, Anne Schurmann oqarpoq, nangillunilu:
- Akuersineruleraluttuinnartoqarporli, ungasilliartuinnarlunilu.
Aningaasat atorneqartussatut aalajangikkat
Ernisussiortut kattuffiata ajornartorsiutip qaammarsaassutigineqarnissaa siorna sulissutiginiarsaraa, tassani arnat misigisaminnik oqaluttuaqquneqarput.
AAMMA ATUARUK Ingen garanti for genåbning af fødested
- Arnat uku nipaallutik aallarnissaat kissaatiginngilarput. Oqaluttuat inunnit ilisimaneqartikkusuppagut, politikerit taakkuninnga atuagaqartikkusuppagut. Taamaalillutik ajornartorsiutaasumut ikiuiniarnissamut periarfissanik isumaliutiginnitsilerlugit.
Politikerit qanoq iliorsinnaappat?
- Sineriammi ernisussiortunut aningaasat atorneqartussatut aalajangikkat periarfissaassapput. Aamma ernisussiortunik atorfinitsitsiniarnerup pitsanngorsarnissaanut iluaqutaassapput, taamaalilluta ernisussiortut sulisoriinnarnissaannut pitsaasumillu suliffimmi atugassaqartinnissaanut periarfissagissaarnerussalluta, tamannami pisariaqartippaat. Kiisalu illoqarfinni erniartortarfinni ilaqutariinnut illunik sanaartortoqarsinnaanersoq misissussavarput erniartortullu ilagisaqarsinnaajuaannarnissaanik neqeroortassalluta, taamaalillutik kisimiillutik angalasassanngillat.
