Aasianni akerliussutsimik takutitsineq: Ernisussiortugut annaarusunngilagut

Aasianni ernisarfik matuneqarpat ernisussiortut tikikkumajunnaassasut, Aasiannilu ernisoqarsinnaaleqqinissaa qularnarsisinnaasoq, akerliussutsimik takutitsinissamik aaqqissueqataasoq, Ivalo Thorin oqarpoq.

- Nakorsat paarlakaajaakkaluartut piffissami aalajangersimasumi akisussaasoqarsinnaasoq isumaqaratta, taava erninissaq periarfissaasinnaalluni.

Aasiaat napparsimmavianni Qeqertarsuup Tunuani qitiusumik napparsimmaviusumi juunip aallaqqaataaniit aalajangersimasumik nakorsaqarunnaassaaq. Tassalu piffissami aalajangersimasumik sivisussusilimmik taamaallaat nakorsaqartassaaq. Taamaalippat tassani ernisoqartarunnaassasoq pilersaarutavoq.

Kisianni taamaakkaluartoq, Aasianni erninissaq ajornartariaqanngitsoq, akerliussutsimik takutitsiniartut isumaqarput.

Aasianni ernisussiortoqarpoq, taannalu Aasianni nakorsaagallartumit ikorfartorneqarsinnaassasoq, akerliussutsimik takutitsiniartut isumaqarput.

AAMMA ATUARUK Aasianni ernisarfiup matuneqarnissaanik nammineq isumaqatigiissutigisani IA-p akerlilersoraa

Aasiaat erniffiusinnaajunnarpat kingunerusussat ernumassutaapput.

- Siunissami juumuut Aasiannut suliartornissartik orniginartikkunnaassammassuk, suliassavitsik suliariunnaassammassuk. Soorlu Uummannami ernisinnaanerup matoreerneqarnerata kingorna juumuut Uummannamut suliartorusukkunnaarnikuupput, uagut tamanna maani nalaakkusunngilarput, juumooqartuaannarusuppugut, Ivalo Thorin akerliussutsimik takutitsinissamik aaqqissueqataasoq KNR-imut taama oqarpoq.

Peqqissutsimut Pitsaaliuinermullu Aqutsisoqarfimmeersut peqqissutsimullu naalakkersuisoqarfimmit maanna Aasianniinnerat iluatsillugu akerliussutsimik takutitsisoqarpoq.