Naalakkersuisoq Ernisarfiup ammaqqinnissaa nalunarpoq
Nukaaraq Larsen, Aasianneersoq, illoqarfigisani qimallugu oktobarimi erniartortariaqarpoq:
- Inuunerput allanngorujussualersoq, aatsaavissuaq misigilerlugu, ilaquttamma akornanniissinnaannanga artornartorujussuuvoq, Nukaaraq Larsen, Inuiaat Tillernerannut oqarpoq.
Aasianni ernisarfik juunip aallaqqaataaniit ukiumi ataatsimi matoqqagallassaaq.
Siunissamili ammaqqissanersoq suli nalornissutigineqarpoq, ammatinneqassappammi ernisussiortoqartariaqartoq, peqqissutsimut naalakkersuisoq oqarpoq.
AAMMA ATUARUK Ernisarfiup matunissaa assigiinngitsunit isornartorsiorneqartoq
- Naliliinerit takutikkumaarpaat. Qaammatit qulit qaangiuppata nalilersuisoqarumaarpoq qanoq ingerlaqqittoqassanersoq. Kisianni massakkuugallartoq inuit taakkua pigitinnagit ammatinneqarsinnaanngilaq, peqqissutsimut naalakkersuisoq Martha Abelsen oqarpoq.
Nunatsinni ernisarfiit 2011-miit 2019-imut matuneqartut
2011: Qasigiannguit, Qeqertarsuaq, Paamiut, Narsaq,
Nanortalik aamma Upernavik
2012: Maniitsoq
2017: Uummannaq
2019: Aasiaat
Kisitsisit: Kalaallit Nunaanni Peqqinnissaqarfik
Nunatsinni ernisarfiit 2011-mi 14-iupput. Ukiut ingerlanerini ikiliartuinnarput, Aasianniittorlu matuneqarpat tallimaannanngussapput.
Naalungiarsuit inunngornerminnut atasumik toqusartut ikilinissaat anguniarlugu tamanna pivoq.
- Erninissamut piumasaqaatit taakkua attatiinassagutsigit, politikkikkullu attassiinnassagutta, allatut ajornaqaaq ikiliartuinnassapput, ajornarsigaluttuinnarmat taamatut ilinniarsimasut piumasarineqatut peqqinnissaqarfinni taakkunani sulisinniarneri, ajornartorsiutaareerlunilu allaat, peqqissutsimut naalakkersuisoq oqarpoq.
AAMMA ATUARUK Eqiterinerup meeqqat inuuneri annaappai
Aasianni naartusut, juunip kingorna ernisussat, Nuummut Ilulissanulluunniit erniartussapput. Ilaquttatik ilaasalu aapparisatik qimallugit.
Nukaaraq aapparisanilu Nuummukassapput, ilaquttanili pisariaqartikkaluaqai.
- Taakku assorujussuaq avitseqatigerusukkaluarpakka tapersersuisoralugillu, Nukaaraq Larsen oqarpoq.
