Aasiaat: Ernisarfiup matunissaa assigiinngitsunit isornartorsiorneqartoq
Naqqiut: Aasianni ernisarfiup matugallarnissaa juunip aallaqqaataaniit atuutsilissaaq.
Aasianni ernisarfiup ukiumi ataatsimi matuneqarnissaa KNR-ip sapaatip akunnerata siuliani oqaluttuarereeraalu Naalakkersuisut assigiinngitsunit isornartorsiorneqalerput. Ernisarfiup matunissaa nakorsanik peqqissaasunillu ernisulerisinnaasunik atorfinitsitsiniarnerup ajornartorsiutaaneranik pissuteqarpoq.
Illuatungiliuttut partiiata, Inuit Ataqatigiit ernisarfiup matugallarneqarnera Kommune Qeqertalimmi innuttaasunut kingunerlussasoraa.
- Aasiaat ernisarfiujunnaarneratigut angajoqqaanngortussat amerlanerit najugarisartik qimallugu erniartortariaqartassapput. Erniartorluni aallartariaqarnermi nalaarsinerluttoqarsinnaanerata meeqqap inunngornermini aallartilluannginneranik kinguneqarsinnaanera aarleqqutigaarput, Inuit Ataqatigiinni isumaginninnermut tunngasunut oqaaseqartartoq Aqqa Samuelsen oqarpoq.
Inuit Ataqatigiit Naalakkersuisunut § 37-mut apeqquteqarlutik ernisarfiup ukiumi ataatsimi matuneqarnissaa itisilerlugu nassuiaateqarfigeqquaat.
Nutaanik isumalioqqusisoq
Oqaaseqartartoq Aqqa Samuelsen kisimi isornartorsiuinngilaq. Kommune Qeqertalimmi borgmesterip, Ane Hansenip ernisarfiup matuneqarnissaa kukkusumik alloriarnerusoraa. Taassuma Inatsisartut Naalakkersuisullu peqqinissamut pissutsinut nutaamik isumalioqquai, taamaalilluni ajornartorsiutaasoq ajornartorsiutaajunnaarsinneqassalluni.
- Nakorsat peqqissaasullu ilinniartitaanerata nalilersoqqinneqarnissaanik piumasaqarnissaq periarfissat ilagaat, peqqinnissaqarfimmi sulisut sulinermi atugaasa pitsanngorsartariaqarnerat avaqqunneqarsinnaanngilaq suliffittut orniginarsassagaanni, Ane Hansen oqarpoq.
AAMMA ATUARUK Ernisussiortut peqatigiiffiata Aasiaat ernisarfiujunnaavissinaanera ernumanarteqaat
Nunatsinni Peqqissaasut Kattuffiata Aasianni ernisarfiup matuneqarnissaa peqqinnissaqarfimmi ajornartorsiutitut angisuutut isigaa. Aasianni ernisarfiup matuneqarnera peqqinnissaqarfimmi oqimaaqatigiittoqarunnaarnissaanik kattuffiup kinguneqassasoraa.
- Nunatsinni sumi najugaqarneq apeqqutaalluni peqqinnissaqarfimmi assigiinngitsoqarnerulissaaq. Ineriartorneq ernumanarpoq politikkikkullu anguniakkap, tassa peqqinnissaqarnikkut tamanut neqeroorutaasut assigiinnissaata, akerlerluinnaraa, Nunatsinni Peqqissaasut Kattuffianni siulittaasoq, Ken Jensen oqarpoq.
Nunatsinniittarnerat sivitsorneqassasoq
Ken Jensenip Ane Hansenitulli peqqissaasut Nunatsinniittarnerat qanoq sivitsorneqarsinnaanersoq ukkatarineqartariaqarsoraa. Peqqinnissamik suliaqartut inuusuttut amerlasuut Nunatsinnut maannakkut misilittagaqariartortarput.
- Ilaat maani inuuneqarnissamut soqutiginnilertarput, ilaat misilittagaqarnerulerlutik angerlartarput. Taamaaliortarnerat ajunngilaq, kisianni ilisimasanik naleqangaartunik tamatigut annaasaqartarpugut, nutaanillu atorfinitsitsisariaqarluta sulinermut ilanngutitsisarpugut, Ken Jensen oqarpoq.
Aasianni ernisarfik juunip aallaqqaataannit ukioq ataaseq matoqqassasoq naatsorsuutigineqarpoq.
