Ernisussiortut peqatigiiffiata Aasiaat ernisarfiujunnaavissinaanera ernumanarteqaat

Aasianni ernisarfik juulip aallaqqaataannit siullermik ukiumi ataatsimi matuneqassaaq. Tamanna Ernisussiortut Kattuffiata ernumanartoqartippaa. Ernisussiortup, Anne Schumannip kattuffik sinnerlugu tamanna oqaatigaa.

- Sapaatip akunneri imminnut najortannginnissaat amerlapput. Angajoqqaatut meeqqallu piffissaannut siullermut kingunerusussat ernumanartoqartippagut. Meeraq inuunermini aallartinnerlukkuni, tamanna inuuneranut sivisuumik kinguneqarsinnaavoq. Ilaquttaniit immaqalu ataataasumiit nuunneq qimaqqanerlu ernisuttumut innarliinertut misiginarsinnaasoq naartunermullu ajornakusoortitsilersinnaasoq Anne Schumannip aamma tikkuarpaa.

- Soorunami maqaasingaatsiartarput aammali ernumanermik uippakajaarnermillu naartunermut ajornakusoortitsilersunik aallartitsisinnaalluni. Pingaartumik anaananngorlaallutik sangiiinnerunerminni, Anne Schumann oqarpoq.

Piukkunnaatilinnik sulisussaaleqineq

Aasianni ernisarfiup ukioq manna januaarip qeqqaniit qaammatini qulini matugallarnissaa aallaqqaammut pilersaarutaagaluarpoq, aalajangiinerli kinguartinneqarpoq qaammatinillu marlunnik sivitsorneqarluni.

ajornartorsiut sulisussanik eqqortunik, ernisarfiup pitsaassusissaanut piumasaqaatinut naammassinnittunik, pissarsisinnaannginnikkut aallartippoq.

Ernisarfimmi pilaalluni ernisitsisinnaasumik erninermilu aanaalernermik passussisinnaasumik  nakorsaqartussaasoq, Peqqinnissamut aqutsisoqarfiup KNR-imut paasissutissiissutigaa.

Peqqinnissamulli aqutsisoqarfimmi nakorsat qullersaata, Berit Bjerre Handbergip Ernisussiortut Kattuffiata ernumassutaa paasilluarpaa.

- Erniartorluni aallartariaqarnermi nalaassinerluttoqarsinnaanera pasilluarparput. Illuatungaanili aamma  assersuutigalugu pilaalluni ernisitsisariaqalissagaanni, taamaasiortoqarsinaanngippallu, aamma kinguneqarnerlussinnaavoq. Taamaammat pitsaassutsip sorliup naammaginartuuneranik qinersineruvoq, Berit Bjerre Handberg oqarpoq, arnarpassuaqartorlu erniartorlutik ullumikkut aallartariaqartartunik erseqqissaatigalugu.

Berit Bjerre Handbergip innersuussinissamut peqqinnissaqarfimmi 2000-ikkut aallartinnerani periuseqalersimaneq innersuussutigaa.

- Kalaallit Nunaanni ernisarfinnut piumasaqaatit atuutsilerneqareerneranni naalungiarsuit toqusut ikilingaatsiarput. Tassalu pitsaassutsip qaffasissusissaanik isumaqatigiissutit nunatsinnut atuuttut naammassiniarlugit taamaaliorpugut, nakorsat qullersaat oqarpoq.

Utaqqiisaasumik aaqqiinerup atuuttualernissaa ernumagineqartoq

Ernisussiortut Kattuffiata Aasianni pisut malinnaaffigeqqissaarpai. Uummannamimi ernisarfiup 2017-imi matuneratulli pisoqaratarsinnaanera ernumagineqarpoq.

- Uummannami naartusut nakorsassaaleqineq pissutigalugu Ilulissanut aallaqqaammut erniartortinneqartaraluarput. Nakorsamilli paarlattaasussamik pissarsiniarneq ajornarsigaluttuinnarmat matuinnissaa aalajangerneqarpoq.

Uummannami ernisarfiup matunera ilutigalugu nakorsat ernisulerisinnaasut kisimik annaaneqanngillat. Illoqarfimmimi juumuutut atuuffik aamma atorunnaarsinneqarpoq, taarsiullugulu peqqinnissamut ikiortimik atorfinitsitsisoqarluni.

- Taamaammat ilaqutariinnut naartusunut kiffartuussinermut tamanna aamma ajornerulersitsivoq, Anne Schumann oqarpoq.

Berit Bjerre Handbergip ernumassut paasilluarsinnaava, Aasiannilu ernisarfiup matuinneqarnissaanut pilersaaruteqannginnertik erseqqissarlugu.

- Kisianni piukkunnartunik sulisussanik amigaateqarneq allannguuteqassanersoq naluarput allanngornissaali ilungersuutigeqaarput. Amigaateqaannassaguttali qanoq iliorluta pitsaassutsimut killiliussanik naammassinnilluta suliatsinnik aaqqissussissanerluta nalilersortuassavarput, nakorsat qullersaat oqarpoq.

Taassuma Aasianni napparsimmaviup peqqissaavinngortinneqarnissaanik pilersaaruteqartoqannginnerarpaa.

Aasianni ernisarfik aasaru matuppat Nunatsinni ernisarfiit tallimaannanngussapput, tassa Sisimiuni, Tasiilami, Qaqortumi, Nuummi Ilulissanilu.