Eqiterinerup meeqqat inuuneri annaappai
Naalungiarsuit inunngornerminnut atasumik toqusartut siusinnerusumut naleqqiullugu ikinnerupput. Tamatuma iluaqutaanera peqqissutsimut naalakkersuisup Dorisa Jakobsenip parteeqamminut Suka K. Fredriksenimut akissummini pingaartippaa.
Paragraf 37 naapertorlugu apeqquteqaammut Suka K. Fredriksenip nunap immikkoortuini napparsimmavinnut erniartortitsisarnerit ilaqutariinnut kinguneqarnerlorujussuarsinnaaneri eqqaavai.
Ernisussat napparsimmavinnut immikkut ilinniarsimasunik sulisulinnut aallartinneqartarnerisa tigussaasunik ajunngequteqarnerannut uppernarsaatissaqarnersut apeqquteqartup paaserusuppaa.
- Nunap immikkoortuini napparsimmavinnut aammalu Dronning Ingridip Napparsimmavissuanut erniartortitsisarnerit inunngornerminni toqusartut aammalu inunngornerminniit sapaatip akunnerata iluani toqusartut ikilisissimagaat, Doris Jakobsen nassuiaavoq.
Peqqissutsimut naalakkersuisup akissummini erseqqissarpaa peqqissutsimut sulinermut tunngatillugu paasineqarsimasoq, ernisitsisarnerit pilaasarnerilluunnit amerlasuut suliarisaraanni taava suliaq pitsaanerulersartoq.
Oqarporlu arnat ernisussat ukiumut 200-it missaanniittut inoqarfik najugartik qimallugu nunap immikkoortuini napparsimmavinnut erniartartartut.
Tamannalu kinguneqarluartarpoq. Namminersorlutik Oqartussat 2002-mi nutaanik aalajangersaammatali ajortoqassagaluarpat immikkut ilinniarsimasut aalajangersimasunik amerlassusillit piareersimallutik najuuttartussaapput.
Taama iliortarnerli akikitsuinnaanngilaq. Napparsimmavinnut anginernut arnat 200-it ernisikkiartortinneqartarneri ukiumut napparsimaveqarfimmut 5 millioner koruuninik akeqartarpoq.
Arnalli najukkatik qimallugit ernisikkiartortinneqartarnerat akisugaluartoq pingaarnerpaasoq tassaaavoq Nunatsinni meeqqat toqusartut ikilisinnissaat, peqqissutsimut naalakkersuisoq oqarpoq, ilanngullugulu oqarluni siammaanissaq pilersaarutigineqanngittoq.
