Ernisussiortut ernumasut: Qaqortumi napparsimmavik peqqissaavinngorsinnaavoq
Kujataani naartusut Nuummuut erniartortarnissaat ukiortaamuinnaq atuuppoq.
Peqqissutsimut Naalakkersuisoqarfiup nalunaarutaa taamaappoq. Peqqissutsimut Aqutsisoqarfiup ilaatigut erninerni pisariusuni passussisinaasunik Qaqortumi pilattaasartussarsiuminaatsirtsimmat taamaappoq.
Ernisussiortut Kattuffiatalli taama pineq nuna immikkoortuani nappparsimmaviup piginnaasaanik millilerilernersuarmut aallarnisaataasutut aarleqqutigaa.
Qaqortumi ernisarfik 2023-mi januaari tikillugu matugallarneqartoq Peqqissutsimut Naalakkersuisoqarfiup aggustimi nalunaarutigaa.
Peqqinnissamut aqutsisut piffissami sivitsortumi nunap immikkoortuani napparsimmavimmut pilattaasartumik atorfinitsitsiniarnerat iluatsissimanngilaq.
Napparsimmavimmi pilattaalluni ernisitsisinnaanisunik, aanaarnermik isumaginnissinnaasunik kiisalu meeraaqqami inoorlaami allatut naatsorsuutiginngisanik isumaginnissinnaasumik pilattaasussaqanngilaq.
Tassunga taarsiullugu nunatta kujataani naartusut Nuummut Dronning Ingridip Napparsimmavissuanut ukiortaap tungaanut erniartortassapput.
- Ernisarfinnik matusigallarneq nalaattareerparput. Uummannami, Aasianni maannalu Qaqortumi taama pisoqarpoq. Uummannami Aasiannilu ernisarfiit ammaqqinneqanngisaannarput. Nunatsinni ernisussiornermi periaatsip ineriartornerani tamanna alianarpoq, Ernisussiortut Kattuffianni siulittaasoq, Anne Schurmann oqarpoq.
Sulisut ernisitsisartut allanik nakorsiaateqartunut ikiuutaartut
Anne Schurmannip oqarnera naapertorlugu ernisarfik matuppat - matugallaannaraluarpalluunniit nakorsuanut allanut sunniuteqallassinnaavoq.
Tassami peqqinnissamik suliallit, erninermik passusseriaannaasut, aamma immikkut ilisimasalinnik ilaqartarput, aamma nakorsianik allanik passussinermi peqataasartunik.
- Ernisussiuisut ikiuutigasuartussanik ilaqartariaqarput: ernisusiortoqasssaq, aammik misissuisartoqassaaq, peqqissaasoqarluni pilattaarnermillu misilittaagalimmik nakorsaqarluni. Ernisussiuisarunnaaraanni, inunnik taama piginnaasalinnik sulisoqarnissaq pisariaarutissaaq, Anne Schurmann oqarpoq.
AAMMA ATUARUK Pilattaasussaaleqisoqarmat Qaqortumi ernisarfik ukiup sinnerani matoqqassaaq
Napparsimmavik assersuutigalugu pilattaalluni ernisitsilertorsinnaasumik nakorsaqanngippat. napparsimmavik taanna aamma aseruuttoorsimasumik inalugaaraarsisinnaasumik amigaateqalissaaq.
Pilatatasinnaasumillu nakorsaqanngikkaanni sinitsitsisinnaasumik peqqissaasoqarnissamik posariaqartitsineq aamma minnerussaaq.
- Ernisarfimmik matusoqaraangat inuit tamarmik eqqorneqarnarput, Anne Schurmann oqarpoq.
Taassuma ernisarfiup matuneratigut sulisut aallaralernisaat Kujataatalu Qaqortumi napparsimmaviani allanik passussisarunnaarnissaq arleqqutigaa.
- Napparsimmaviup siunissami peqqissaavinngornissaa aarleqqutigaarput, taanna oqarpoq.
Siulittaasoq: Politikerit sulisunik minnerpaaffiliisariaqarput
Qaqortumi ernisarfiup ukioq naallugu matoqqanissaa PPK, Peqqinnissaq pillugu Kattuffiit ernumanartoqartillugu oqareerput. Taakkua Naalakkersuisoqarfik matusigallarnissamik nalunaartiganik sulisunik ilisimatitsisimanngimmat isornartorsiorpaat.
Kujataatali tamarmi nunap immikkoortuata NMapparsimmaviata qanoiq ittumik siunissaqarnera suli ernumanarnerusoq, PPK-p siulittaasua, Ken Jensen tusagassiuutinut allappoq.
- PPK-p siulittaasuisa ernisussiortut peqatigiiffiat assigalugu napparsimmaviup sulisussaaleqineq pissutigalugu peqqissaavinngortinneqarsinnaanera ernumassutigaat.
Nunap immikkoortuani nakorsaanerit ataasiakkaat napparsimmavinni peqqissaavinnilu kikkut atorfinitsinneqarnissaat aalajangertarpaat.
AAMMA ATUARUK Naalakkersuisoq: Qaqortup ernisarfia ammaqqissaaq
Ernisussiortut Kattuffialli aalajangiisinnaagaluaruni politikerit peqqinnissaqarfimmi sulisunik kattuffinnillu suleqateqarlutik napparsimmavinni peqqissaavinnilu tamani atuuffiit ikinnerpaaffigisassaannut pilersaarusiortariaqaraluarput.
Tamanna nunap immikkoortuani nakorsaanerit pisariaqartinneqarnerpaanit allanik atorfinitsitsinnginnissaannik qulakkeereqataassaaq.
Siunnersuulli nunatta politikeriinit suli qisuariarfineqanngitsoq, Anne Schurmannip oqaatigaa.
Nunap immikkoortuani Avannaani nakorsaaneq, Peter Vedsted soraarluni Danmarkimut nuulersoq KNR-imit ataasinngornermi saqqummiupparput. Taamaalilluni nunatsinni nunap immikkoortuani nakorsaanertut atuuffinnit tallimanit marluinnaat atuuffigineqalissapput.
AAMMA ATUARUK Nakorsaq suliunnaalersoq: Allamiunik nakorsaqarneq aaqqiissutaanavianngilaq
Taassuma peqqinnissaqarfiit suliffissarsiorfissatut pilerinarsarneqarnissaannut politikerit salliussisannginnerannik isornartorsiorpai.
- Nakorsat suliffimmi soqutiginartumiikkusupput. Politikerilli suliffinnik soqutiginarsaanermut aningaasaliissuteqarpallaanngillat. Suliffiup soqutiginartuunissaanut pitsaassuseq appasippallaaleqqavoq, taamaalillunilu atorfinititsiniarneq ajornakusoorluni, Peter Vedsted oqarpoq.
KNR-ip peqqissutsimut naalakkersuisoq, Mimi Karlsen (IA) isornartorsiuineq pillugu oqaaseqartinniarsaraa.
