Naalakkersuisoq: Qaqortup ernisarfia ammaqqissaaq
Kujataaneersut naartusut erniniarunik timmisartungaatsiaqqaarlutik ukiortaaq tikillugu erniartortassapput.
Qaqortumimi ernisarfik aappaagu januaari qaammat tikillugu matuneqarpoq. Qaqortumi nakirsamik pilattaasinnaasumik amigaateqarnera tamatuminnga peqqutaavoq - tassa pilatsinnikkut ernisumik isumaginnissinnaasoqanngilaq. Taamaammat pilattaalluni ernisut, aanaarnernik isumaginninnerit kiisalu meeraaqqami inoorlaami allatut naatsorsuutiginngisanik isumagineqartariaqartut isumaginissaqanngillat.
Taamaammat ernisussat Nuummut erniartortinneqartassapput.
- Soorunami misigeqatiginaqaat nuanninngilaq aamma taamaattariaqanngikkaluarpoq. Kisianni tassa meeraq anaanarlu ajornartuussagaluarpata taanna pinaveersaarniarlugu taamaaliortoqartariaqarpoq, peqqissutsimut naalakkersuisoq, Mimi Karlsen (IA) oqarpoq.
Nunatsinni sumiiffiit ernisarfillit tallimaapput:
Nuna tamakkerlugu Dronning Ingridip Napparsimavissua
Immikkoortortaqarfik Ilulissat
Immikkoortortaqarfik Sisimiut
Tasiilami napparsimavik
Qaqortumi immikkoortortaqarfik - maanna januarip tungaanut matuneqarallartoq.
Qaqortumi ernisussiorfimmi sulisussanik amigaateqangaatsiartut, Naamminersorlutik Oqartussat oqaatigaat. Tamatuma kingunerisaanik maanna ernisarfik matuneqarpoq.
Nakorsat allamiut suliartulerpat?
Peqqissutsimut naalakkersuisuusimasoq Demokraatineersoq Anna Wangenheim pisumut qisuariaateqarpoq. Taanna inatsisartuni peqqissutssimut ataatsimiititaliami siulittaasup tulliuvoq.
Taassuma nunatsinni peqqinnissaqarfimmi sulisussaaleqineq aaqqiissuteqarfigalugu nunanit allaneersut soorlu cubameersut peqqinnissaqarfimmi atorfinitsinneqarsinnaasut siunnersuutigaa.
Siunnersuut taanna siuliani siunnersuutigineqareernikuuvoq.
AAMMA ATUARUK Niviaaluup Nuummut erniartornissani paaseqqammerpaa
Mimi Karlsenili allanik takorluugaqarpoq:
- Ukua periarfissat misissorneranni ilaa uagut nunamik allamiunik tikisitsiniarnermi pisarissersuutit assigiinngitsut qanoq pisariillisarnissaat misissorparput, taamaalillugu Cubaminngaanneersuinnaanngitsunik kisianni nunarsuarmiunik allanik aamma nakorsanik aammalu napparsimasunik paarsisunik inuttassarsiuilluta, Mimi Karlsen oqarpoq.
Pissutsilli qanorluunniit isikkoqaraluarpata, maannangaaq Qaqortup ernisarfia matoqqagallarpoq.
26-nik ukiulik Niviaaluk D. Kreutzmann eqqugaasut ilagaat. Taanna aappassaanik naartuvoq, Qaqortumilu najugaqarluni.
Ernisarfiit matusut:
Kingullermik Aasianni ernisarfik matuvoq.
Taanna piginnaasalinnik sulisussaaleqineq pissutigalugu 2019-imi matuneqarpoq. Matusineq matusigallarnerusoq nalunaarutigineqarnikuuvoq.
Uummannami ernisarfik 2017-imi matuneqarpoq.
Maniitsumilu ernisarfik 2012-imi matuneqarluni.
Taanna siorna Qaqortumi pilattaasinnaasumik nakorsaqarallarmat pilatsilluni ernertaarpoq.
-Soorunami tusaqqaarlugu uggornarpoq taamannak aaliangertoqarsimasoq. Pissutigalugu ilaquttat najorusunnartarnermik. Ernisunnermi ingasappoq assorunnermi, taavalu aamma meerartaareernerup kingorna assorornartarnermik, soorunami ilaquttat pisariaqartarnermik, taanna KNR-imut pingasunngormat oqarpoq.
Ukiortaaq sioqqullugu ammaqqissinnaagunartoq
Niviaaluk D. Kreutzmann januaarip arfernani erninissaa killilerneqarsimavoq. Taannali iluatsitseratarsinnaagunarpoq. Peqqissutsimummi naalakkersuisup Qaqortup ernisarfia, Aasianni, Maniitsumi Uummannamitulli ernisarfiup matuinneqannginnissaa neriorsuutigaa. Aasianni ernisarfik sulisukippallaarnera pissutigalugu 2019-imi matuneqarpoq – taamanikkut matusigallaannaraluarput.
- Massakkumut periarfissat tassa taakkuupput, taakkulu allanngunngippata tassa ukiortaami ammartussaavoq. Kisianni aamma imaassinnaavoq nassaarsinnaassagaluarutta periarfissaqassagaluarpat ukiortaanngitsoq suli aamma ernisarneq Qaqortumi pisinnaassasoq, Mimi Karlsen KNR-imut oqarpoq.
