Niviaaluup Nuummut erniartornissani paaseqqammerpaa
Niviaaluk D. Kreutzmann 26-nik ukiulik aappassaanik naartuvoq. Taanna Qaqortumi najugaqarpoq erninissaalu januaarimut killeqarluni.
Taassuma ernera pilatsilluni ernineratigut siorna inunngorpoq. Tamanna Qaqortumi napparsimmavimmi pilattaasumik ikiorteqarneratigut pivoq. Ullumikkulli pilattaasinnaasumik nakorsassaqanngilaq – tassa pilatsinnikkut ernisumik isumaginnissinnaasoqanngilaq. Taamaammat pilattaalluni ernisut, aanaarnernik isumaginninnerit kiisalu meeraaqqami inoorlaami allatut naatsorsuutiginngisanik isumagineqartariaqartut isumaginissaqanngillat.
Taamaammat Nunatta kujataani naartusut tamarmik ukiup sinnerani Nuuliarlutik erniartortassapput.
Pilatsinnikkut erneqqerataarsinnaasoq
Niviaaluk D. Kreutzmannilu pilatsinnikkut erneqqittariaqaratarsinnaavoq.
Nunatsinni sumiiffiit ernisarfillit tallimaapput:
Nuna tamakkerlugu Dronning Ingridip Napparsimavissua
Immikkoortortaqarfik Ilulissat
Immikkoortortaqarfik Sisimiut
Tasiilami napparsimavik
Qaqortumi immikkoortortaqarfik - maanna januarip tungaanut matuneqarallartoq.
- Sooorunami tusaqqaarlugu uggornarpoq taamannak aaliangertoqarsimasoq. Pissutigalugu ilaquttat najorusunnartarnermik. Ernisunnermi ingasappoq assorunnermi, taavalu aamma meerartaareernerup kingorna assorornartarnermik, soorunami ilaquttat pisariaqartarnermik.
- Soorunami pissanganarpoq, kisiat qujanartumik anaanaga, angajuga soraluaralu Nuummi najugaqarput, taanna qujamasuutigersuaarpara Nuummiinerat, tassa taanna saammarsaatigiinarpara, Niviaaluk oqarpoq.
Qaqortumi aappaagu januaarimit ernisoqaqqissinnaalernissaa neriuutigineqarpoq.
”Piffissami sivitsortumi ilungersorluni sulisussarsiortoqaraluartoq, ajoraluartumik 2022-mi ukiakkut piffissat ilaanni, Peqqinnissaqarfik Kujataani nakorsanik qulaanilu taaneqartunik pilattaanermik piginnaasaqartunik misilittagalinnillu sulilersitsinissaq ajornarsimavoq”, Namminersorlutik Oqartussat ataasinngormat taama nalunaaruteqarput.
AAMMA ATUARUK Qaqortumi ernisarfiup matugallalernera juumuut nalugaat
Peqqinnissamullu naalakkersuisoq, Mimi Karlsen (IA) ima oqarpoq:
- Peqqinnissaqarfik ernisarnermi sullissinermi piffissaq sivikitsoq atorlugu kalerriinikkut naleqqussaasariaqalernera ajuusaarnarpoq, peqqinnissamut naalakkersuisoq, Mimi Karlsen (IA) oqarpoq.
Ilaquttami ilaginissaanut sipaartoq
Namminersorlutik Oqartussat oqarnerat naapertorlugu peqqinnissaqarfiup ernisoqarnissaanut piareersimasunut pilattaasartumik naleqquttunik piginnaasaqartumik atorfinitsitsinissaq suli sulissutigaa.
Tamatuma saniatigut Niviaaluk D. Kreutzmann aappanilu sipaarniarsaripput, aappaa ernerallu taamaalillutik Niviaaluup erninissaanut illoqarfiit pingaarnersaannukaqataasinnaassallutik.
Ernisarfiit matusut:
Kingullermik Aasianni ernisarfik matuvoq.
Taanna piginnaasalinnik sulisussaaleqineq pissutigalugu 2019-imi matuneqarpoq. Matusineq matusigallarnerusoq nalunaarutigineqarnikuuvoq.
Uummannami ernisarfik 2017-imi matuneqarpoq.
Maniitsumilu ernisarfik 2012-imi matuneqarluni.
Taassuma ernisarfiup ernisoqarnerani pilattaanermik suliaqarsinnaasumik nakorsassaqannginnera pissutigalugu ammasinnaannginnera paasisinnaalluarpaa. Taamaakkaluartorli pisariaqartillugu pilattaanikkut ernisoqarnissaanik isumaginnissinnaasumik nakorsaqaqqilernissaa neriuutigaa.
- Neriuppunga pilaasartoqalipallakkumaartoq, pissutigalugu uanga aamma aappassaannik naartunera soorunami ulorianartoqarsinnaagami, siullermik pilatsinnikuunera pissutigalugu.
AAMMA ATUARUK Pilattaasussaaleqisoqarmat Qaqortumi ernisarfik ukiup sinnerani matoqqassaaq
Peqqinnissaqarfik sulisussaaleqineq pissutiglaugu ernisarfimmik aatsaat siullermeertumik matusigallartariaqalinngilaq.
Kingullermik Aasianni ernisarfik sulisussaaleqineq pissutigalugu 2019-imi matuneqarpoq. Matusineq matusigallarneruinnaraluarpoq, ernisarfillu suli ammaqqinngilaq.
