Qaqortumi ernisarfiup matugallalernera juumuut nalugaat

- Ernisussiortussaaleqisoqarnera uagut nalunngikkaluaripput, Qaqortumili ernisussiortut ilisimatinneqarsimanngillat ukiup sinneranut ernisarfiup matoqqagallarnissaa pillugu, tamanna tusagassiutitigut ippassaq aatsaat paasivaat, ernisussiortut kattuffianni siulittaasoq Anne Schurmann KNR-mut oqarpoq nangipporlu:

- Peqqinnissaqarfimmi aqutsisut tupinnaannartumik pikkorliorput, kujataani naartusunik qanimut sullissisut ilisimatissimanngilaalluunniit, tusagassiutit aqqutigalugit aatsaat tusarlerneqarput, Anne Schurmann KNR-mut oqarpoq.

Peqqissutsimut pisortaqarfik ataasinngormat tusagassiutinut nalunaarpoq, kujataani immikkoortortaqarfimmi naartusut jannuaarimi 2023-p tungaanut Nuummukaanneqartalissammata kujataani ernisarfik matugallarneqassasoq.

AAMMA ATUARUK Pilattaasussaaleqisoqarmat Qaqortumi ernisarfik ukiup sinnerani matoqqassaaq

Nakorsamik naartusumik pilattaasinnaasumik aaqalertoornermiluunniit pinartoqalerneranik immikkut iliuuseqapallassinnaasumik tassa meeqqamut inunngulersumut sillimanani periataarsinnaasumik nakorsaqannginnera tamatumunnga tunngaviuvoq,

Anne Schurmann naapertorlugu Qaqortumi ernisarfimmi sulisut ernisarfiup matugallarneqarnissaa pillugu qullersaniit ilisimatinneqarsimanngillat, tusagassiutitigullu allaaserineqartut aqqutigalugit aatsaat paasitinneqarlutik, taakkuugaluarpullu angajoqqaanngulersunut siulliullutik attaveqaqqaartussaasut kalerriaarneqartussallu.

- Peqqinnissaqarfiup pisortaqarfianiit erseqqissumik nalunaarfigineqanngikkunik, taakku aallartussaanerat pillugu tusagassiutini tusakkatik aqqutigalugit taamaallaat sullitaminnut ilisimatitsisinnaapput, allatigummi nalunaarfigineqanngillat, taanna oqarpoq.

Naartunermi angalaneq annilaanganarsinnaavoq

Anne Schurmannip naartusut aasit taamatut atugaqartussanngortitaanerat iluarinngilaa.

Anne Schurmann Assi © : Jordemoderforeningen

Anne Schurmann. Assiliisoq: Ernisussiortut Kattuffiat

- Ajuusaarnartuuvoq, najukkami iluamik sulisussaqannginnera pillugu naartusut taamatut angalatinneqaqqittussanngornerat, taanna oqarpoq.

Naartusup suminngaanneersuunera apeqqutaalluni, naartusup erniffissani sapaatip akunneri pingasut sisamalluunniit sioqqullugit aallartassaaq, nuanninngitsumillu misigisaasinnaavoq.

- Ilisimavarput, aallartussanngornermi uisakajaartoqalersartoq. Anaanaasoq uisakajaalerpat meeraq naarmiua aamma uisakajaalilssaaq, tamanna meeqqamut kingusinnerusukkut ajoqutaasinnaavoq, annilaangasalerneq pilersinnaavoq, Anne Schurmann oqarpoq.

- Tassanngaannaq periataartoqarneratigut, soorlu ilaqutariit avissaariataarnerisigut meeqqap pinngoqqaalernermini  ilaquttaminut atassuteqaataa meeqqamut pingaaruteqarluinnartuusoq ajoquserneqarsinnaavoq, taanna oqarpoq.

Anne Schurmann erseqqissaavoq, imaanngitsoq naartusut tamarmik taamatut nalaataqassasut, tassami imaassinnaammat naartusup ilaquttani ilagalugit Nuummukartoq imaluunniit Nuummi ilaqutaqartoq.

Taamatuttaaq Nuummi Dronning Ingridip Napparsimavissua ernisussat amerlavallaalerpata tamaviaartinneqalersinnaavoq. Kujataaneersut naartusut arfineq-marluk Nuummut erniartortussaapput, taakkualu saniatigut aamma allat aallartinneqareertussaallutik.

- Erniartortitsiniaraanni taava aamma eqqaamasariaqarpoq, erniartorfigisami sulisut amerlanerusut pisariaqartinneqartussanngussammata, Anne Schurmann oqarpoq.

2019-mi aamma taama pisoqarpoq

Taamatulli periuseqarneq aatsaat siullermiilinngilaq.

2019-mi Aasianni sulisunik amigaateqarneq pissutaalluni ernisarfik matuneqarpoq. Matusineq matusigallarnerugaluartoq, periusitoqaq uteqqinngilaq.

 - Ernumassutigissavarput Qaqortumi ernisussiortunut atorfiit kingusinnerusukkut ajornartorsiorfiulersinnaanerat, misilittagaqarfigaarpummi taamatut erniartortitsisarnerit piffissamut tasinneqartariaqalernerat, Anne Schurmann oqarpoq.

Taannami naapertorlugu juumuut atorfinni pigiinnarsinnaanissaat apeqquserneqartariaqalissaaq, tassami ernisussiortut ernisussaqanngippat allatut eqqarsalersinnaapput.

- Sakkortuumik erseqqissaatigerusupparput ernisussiortunik peqarnissaq pingaaruteqarluinnarmat, qanorluunniit ernisussaqanngikkaluarpat. Tassanngaannarmi pisoqariataarsinnaasarpoq, ernivissatut naatsorsuutigisaq sioqqullugu ernisoqariataarsinnaasarmat.

Qaammatini qulingiluani naartunerup iluani aamma ajornakusoorutinik takkuttoqariaannaavoq, ernisussiortup pinngitsoorani najuuffigisassaanik, taanna oqarpoq.

Nakorsatut ilinniarfik allaanerulaaqqunartoq

Anne Schurmann nangilluni aamma oqarpoq, kinguaassiutitigut atuartitsinernut tunngatillugu ernisussiortut aamma atorneqarsinnaagaluartut.

Assi © : Lui D. Thomsen

Qaqortumi napparsimavik. Assiliisoq: Lui D. Thomsen.

Anne Schurmann isumaqarpoq, siunissami ajornartorsiutip qanoq aaqqinneqarsinnaanera pillugu maannangaaq eqqarsartoqartariaqalersoq.

Taanna siunnersuivoq, nakorsat Danmarkimeersut allamiluunniit nunameersut nunatsinni atorfinitsinneqarnerminni, napparsimavimmi ernisoqarfiulluartumi  ullulluunniit 14-t missaanni sulisinneqaqqaartassagaluartut.

Taamaalillutimmi pilatsillutik meerartaartitsinerit misilittagaqarfiginerulaalissagaluarpaat, aammalu aaqalernerit qanoq pisassaanerat aqunnerusinnaassagaluarpaat, immaqalu taamaalillutik nunatsinni sinerissami ernisussiullaqqinnerulersinnaallutik.

Taassuma taamaaliortoqartuuppat nakorsatut ilinniarsimasut issittumi nakorsaanissaminnut naleqqussarsinnaalissagaluarmata.

- Nakorsatut ilinniakkat immikkut aalajangersimasunut ilinniarajuttarput, matumani taava siammasinnerusumik misilittakkat pisinnaalissagaluarput, tamanna Kalaallit Nunaatut ittuni atorfissaqartinneqarpoq, Anne Schurmann oqarpoq.

Maannakkorpiaq Ernisussiortut Kattuffiata peqqinnissaqarfiup aqutsisoqarfia attavigaa qinnuigalugillu ilaasortatik tamatuminnga ilisimateqqullugit.

- Mimi Karlsen aamma attavigissavara ataatsimeeqatigiumassavara eqqarsaatitsinnillu apuuffigissallugu, Anne Schurmann oqarpoq.