Johanne Jakobsen Paula Inuk Møllerilu Qaqortumit Nuummut siullerpaallutik erniartortitaapput

Qaqortumi ernisarfik sapaatip akunnerata siuliani matuneqarpoq, tamannalu Johanne Jakobsen Paula Inuk Møllerillu ajuusaarutigaat.
Paula Inuk Møller, Nanortalimmiit Nuummut erniartortoq.
septembarip 03-at 2022 11:34

Johanne Jakobsen illoqarfigisani qimannagu ernisussaagaluarluni, Qaqortumi pilattaasartumik atorfinitsitsisinnaannginneq peqqutaalluni siullerpaat ilaanniilluni pilersaarutaanngitsumik Nuummut erniartortitaavoq.

- Soorunami aliasunnarpoq kiserliornarlunilu, pilersaarutiginngikkaluarparpummi maanngarnissarput, Johanne Jakobsen KNR-mut oqarpoq.

Johannelu kisimi Qaqortumiit erniartortitaanngilaq, Paula Inuk Møllerimi Nanortalimmit Qaqortumut erniartortussaagaluarluni Nuummut aamma erniartortiaavoq.

Taannalu Nuummut erniartornissaminut piareersimasimanngilaq.

- Eqqarsarnaqaaq kikkut ilagissavakka? Ernileruma kikkut ilaassappat? Aap, soorunami uggornaqaaq ilaqutakka ilaginnginnakkit, Paula Inuk Møller KNR-imut oqarpoq.

Taamaammat Paula marlunngormat ernisummat, Johanne Jakobsenip ilagaa. Johannelu pingasunngormat ernivoq, taassuma ilaquttani nuummeersut erninermini najortigai.

Demokraatit: Naak akisussaaffik?

Qaqortumi ernisarfiup matuneqarallarnera, Mimi Karlsenip ataasinngormat nalunaarutigaa. Tamanna Ilaqutariinnermut Peqqissutsimullu ataatsimiititaliami siulittaasup tullia, Anna Wangenheimip nuannaarutiginngeqaa.

- Ilungersunaq, naak akisussaaffik? Aamma eqqugaasut nallinnat.

Nunatsinni sumiiffiit ernisarfillit tallimaapput:

 

Nuna tamakkerlugu Dronning Ingridip Napparsimavissua
 

Immikkoortortaqarfik Ilulissat

 

Immikkoortortaqarfik Sisimiut
 

Tasiilami napparsimavik
 

Qaqortumi immikkoortortaqarfik - maanna januarip tungaanut matuneqarallartoq. 

Anna Wangenheim peqqinnissaqarfimmi sulisussaaleqinerup aaqqiivigineqarnissaa pillugu siornatigut isumaliuutini qaqeqqippaa.

Taassuma Cubamit tikisitsinissaq isumaliuutigaa, Danmarkimimi peqqinnissaqarfimmi aamma sulisussaaleqisoqarnerarpaa.

- Ilungersunartorujussuarmik killiffeqaratta, taamaattumik ujartortariaqarparput nunanit allanit suleqatissarsiornissarput, Anna Wangenheim KNR-imut oqarpoq.

Cubamiulli nunatsinnut suliartussappata oqaatsitigut unammillernatoqartussaassaaq. Kisianni:

- Aap, maannakkumut aaqqiissuteqartoqarallarnerussaaq. Tamatumalu saniatigut aamma piffissaq ungasinnerusoq isigalugu pilersaarusiussaagut.

Ernisussiortut Peqatigiiffiat isornartorsiuisoq

Ernisussiortut siulittaasuata Anne Schurmannip oqarnera naapertorlugu Qaqortumi ernisarfimmi sulisut ernisarfiup matugallarneqarnissaa pillugu qullersaniit ilisimatinneqarsimanngillat.

Ernisarfiit matusut: 

 

Kingullermik Aasianni ernisarfik matuvoq.

 

Taanna piginnaasalinnik sulisussaaleqineq pissutigalugu 2019-imi matuneqarpoq. Matusineq matusigallarnerusoq nalunaarutigineqarnikuuvoq.

 

Uummannami ernisarfik 2017-imi matuneqarpoq.

 

Maniitsumilu ernisarfik 2012-imi matuneqarluni.

- Peqqinnissaqarfimmi aqutsisut tupinnaannartumik pikkorliorput, kujataani naartusunik qanimut sullissisut ilisimatissimanngilaalluunniit, tusagassiuutit aqqutigalugit aatsaat tusarlerneqarput, Anne Schurmann KNR-imut oqarpoq.

Aallartitaanatik Cubamiunit sullinneqarusunnerusut

Paulap Nuummut erniartortitaanani Cubamiunit sullinneqassaguni orniginartinnerugaluarpaa.

- Ilaana ilaquttakka ilaatikkusunneruakka, apeqqutaatinngilara Cubamiumik pilattaasartoqaraluarpat.

Johanne Jakobsenip qaqortumeersup najukkamini erninani Nuummukartitaanini aliasuutigeqaa.

- Aliasuppunga aliasoqaanga ulloq taanna, taava sivitsoriartornerani allatut ajornarmat aallartariaqarnerput akueriinnarpara.