Peqqinnissaq pillugu ataatsimiititaliarsuaq: Sulisut qimarrattut nakorsallu danskisut oqaasillit

Innersuussutit 119-it.

Peqqinnissaq pillugu ataatsimiititaliarsuup isumaliutissiissut peqqinnissaqarfimmi aaqqissuussinerup qanoq naleqqussarneqarnissaanut pitsanngorsarneqarnissaanullu arlalinnik innersuussuteqarfiusussaq utaqqisaajuarsimasoq ullumi saqqummiuppaa.

Isumaliutissiissut naapertorlugu nunatsinni peqqinnissamik isumaginnittoqarfimmi tunngaviusumik atugassarititaasut pingasut tassaapput; nuna isorartooq amerlasuumik mikisunik inoqarfeqartoq, taakkunanilu kiffartuussisoqassaaq, innuttaasunut sullissivinermi peqqinnissaqarfiullu iluani arlaliinnik oqaaseqartoqassaaq minnerunngitsumillu sulisussaaleqineq aamma avataaniit sulisussarsiortarnermut pisariaqartitsisiuarneq.

350-illu sinnilaarlugit qupperneqartoq qiimmannarpallaanngilaq. KNR-ip ataatsimiitialiarsuup isumaliutissiissutaani maluginiagassat pingasut uteqqinneqartut katersorpai.

Aningaasat, aningaasat, aningaasat

Peqqinnissaqarneq aningaasanut inatsimmi atuiffiunerpaavoq.

Peqqinnissaqarfimmut ukioq manna 1,7 milliardit koruunit immikkoortinneqarput, ataatsimiititaliarsuulli aningaasat annikippallaarnersut siusinnersukkut oqaatigiumanikuunngilaa.

Ataatsimiititaliarsuulli isumaliutissiissummi Peqqinnissaqarfik nalinginnaasumik ilaatigut aningaasaqarnermut atatillugu unammillernartoqartitsisoq allaaseraa.

Ataatsimiititaliarsuup innersuussutaasa aningaasat atorneqarsinnaareersut tunngavigissagai aamma allassimavoq.

Taamaakkaluartorli aningaasanut atatillugu innersuussutit tallimaapput.

Ataatsimiititaliarsuup Nuummi Droninng Ingridip Napparsimmavissuanut ukiunut qulinut aningaasaliinissamut pilersaarusiortoqarnissaa ilaatigut innersuussutigaa. Tassani napparsimmaviup napparsimasunullu tikittunut ineqarfianik sanaartornermut aningaasaliineq kisimi ukkatarineqassanngilaq, napparsimmavimmilu atortorissaarutit pisariaqartinneqartut aamma pineqarlutik.

Tamatuma saniatigut peqqinnissaqarfiup aningaasalersorneqarnera naammannersoq pillugu misissuisoqarnissaa ataatsimiititaliarsuup innersuussutigigaa.

Peqqinnissaqarfimmi sulisut qimarrattut

Peqqinnissaq pillugu ataatsimiititaliarsuaq naapertorlugu nunatsinni peqqinnissaqarfiup unammilligaani annerpaat ataavartullu annerpaat tassaapput sulisussarsiniarneq sulisunillu attassiniarneq.

Nutaanik sulisussanik atorfinitsitsiniarneq ajornakusoorlunilu amerlasuut soraarartarput.

Nunatsinni peqqissaasutut ilinniarsimasut kalaallit katillugit 116-iupput. 2022-mi taakku 200-pput. Ineriartorneq taanna pitsaarpalussinnaagaluarpoq. Kisianni 2014-imi taakku 59 procentii peqqinnissaqarfimmi sulipput, akerlinganillu 2022-mi 47 procentiinnaat sulillutik, isumaliutissiissummi allassimavoq.

Peqqinnissaq pillugu ataatsimiititaliarsuup sooq ilaat suliunnarsimanersoq nammineq nassuiaatigisinnaanngilaa, kisianni tamanna suliffinni allani akissarsiaginnerusinnaanermik sulinermilu atugassarissaarnerunermik pissuteqarsinnaanerarlugu. Ataatsimiititaliarsuulli peqqissaasut ilarpassuisa peqqinnissaqarneq qimalluinnarsimagaat aamma oqaatigaa.

Tamannalu pitssutigalguu atorfinitsitsiniartartut pitsanngorsarneqarnissaat ataatsimiititaliap innersuussutigaa. Atorfinitsitsisoq ilaatigut LinkedInikkut inoqatinullu attaveqaatigigut allatigut ilaatigut ersarinnerussaaq.

Ataatsimiititaliarsuup akissarsiaqartitsineq aamma eqqaavaa:

- Peqqinnissaqarfiup qullersaqarfia akissarsiatigut atorfeqartitsinermilu atugassarititanut atatillugu aqutsisutut periarfissaqarnerusariaqarput.

Kalaaleq nakorsaq danskisut oqaluttoq

Nunatsinni peqqinnissaqarfimmi nakorsap naapitavit danskisuinnaq oqalunnera qaqutigoortuunngilaq.

Institut for Sundhed og Naturimit Droninning Ingridip Napparsimmavissuani 2021-mi misissuinerup oqaatsitigut ajornartorsiutit nakorsiap peqqinnissaqarfimmilu sulisut akornanni attaveqaqatigiinnermut sunniuteqarnerluttartut takutippaa.

Tamatuma saniatigut peqqinnissamut nappaatinullu atatillugu kalaallisut taaguutit amigaataasut misissuinerup aamma ersersippaa, tamannalu pissutigalugu nakorsiat kalaallisut oqaaseqartut eqqugaaqqajaanerullutillu oqalutsinik ilinniarsimasunik pisariaqartitsisarput.

Peqqinnissaq pillugu ataatsimiititaliarsuup taamaammat nakorsiartut peqqinnissaqarfimmilu sulisut akornanni ilinniarsimasunik oqalutseqartitsisoqartarnissaa qulakkeerneqassasoq innersuussutigaa.

Tamatuma saniatigut ataatsimiititaliarsuup napparsimasut qanigisaasalu kingunerluutaasinnaasut toqqagassat itigartitassallu pillugit paasissutissinneqarnermi akuutinneqarnerulernissaat innersuussutaasa pingaarutillit ilagaat.

Nunatsinni napparsimasut pisinnaatitaaffii pillugit inatsimmi allassimavoq napparsimasut paasissutissinneqareerlutik isumaqataallutik akuersinissamut paasissutissinneqarnissamullu pisinnaatitaaffeqartut, ataatsimiititaliarsuarli naapertorlugu nammineq katsorsanerneqarmut akuutinneqarnissamut pisinnaatitaaffiit pillugit inatsiseqanngilaq.