Isikkivik alutornartoq aalisartunut kingunerluuteqarsinnaasoq
Nuummi imaanut isikkivipput ulluni makkunani tungujuaarlunilu qillalaaqaaq.
- Aatsaat taamarsuaq takuvunga, siornatigut anisitsisarpoq kisianni taamarsuunngitsoq, Nuummi aalisartut piniartullu peqatigiiffianni NAPP-mi siulittaasoq, Niels Eli Boassen, oqarpoq.
- Aamma assitigut takuneqarsinnaavoq tappavunga ilummut nakkaavia tikillugu suli aniasussaqartoq. Taamaammat piffissami sivisuumi taamaakkallarnissaa naatsorsuutigisariaqarpoq, taanna oqarpoq.
Makku iluliusat Narsap Sermianeersuupput, Nuummilu aalisartunut puulukertitsipput.
- Sunniutaa annertoorujussuanngorsinnaavoq, tassami aalisarfiit aajuku tassa kangerlunniippoq. Nuup kangerlua annertulaartorsuuvoq tamarmik immilerput taamaammat sunniutaa sakkortoorujussuusinnaavoq, Niels Eli Boassen oqarpoq.
Iigartartut aniaffii pingasuusut eqqaanni makku nalinginnaasaraluartut, aatsaallu taama siusitsigisumik sukkatigisumillu sermimik kaanngartoqarnera Pinngortitaleriffimmi Silap Pissusianik Ilisimatusarnermi atorfeqartup John Mortensenip qaqutigoortuunerarpaa.
- Sikup annersaa upernaakkut kaanngaraangami kangerlummiiginnartartoq takukulaneruarput, iluliusallu amerlanerpaartaat Nuup Kangerluata paavanut, Nuup avataanut pitinnatik aareersimasarput. Taamaattumik Nuummi iluliusat takorpiarneq ajorpagut.
- Ukiuni kingullerni qulini Narsap Sermiata anianera aamma sukkatsissimarpasippoq, taamattumillu kangerlummi iluliusat sikkussarlu siaruaassimasoq annertunerulernikuulluni, John Mortensen KNR-imut allappoq.
Inuussutissarsiorneq tamarmi eqqugaasoq
Aalisartut ningittakkersorlutillu saarullinniartut maanna uningaannarallartariaqassapput.
- Inuutissarsiornerat massakkut innarleqqavoq soorunami. Kisianni aamma tassa silarsuaq uagut susinnaannginnatsigu suli naalaganngunnginnatta tassunga, Niels Eli Boassen oqarpoq, nangillunilu:
- Naalaganngornissarput qularnarpoq taamaammat naammagaluguaasit atorpaat.
Naak isikkivik alutornaraluaqisoq taamaaginnassappat inuussutissarsiutilinnut eqquinerlussaaq.
- Tassami taamaarusaaginnassappat uninnganeq sivisooq aningaasarsiornikkut, ilaqutariittut inuunermut aammalu aalisarnermik inuutissarsiuteqartut toqqaannartumik kisimik eqqugaaanavianngillat aamma tunitsivinni sulisut aamma eqqugaassapput.
Nuummi februaarip qaammataani anorersuarlunilu manngunnerata kinguneranik Narsap Sermia 60 kvadratkilometerinik ilanngarpoq, taamaalilluni iluliusat kangerluullu sikuinik Nuup kangerlua puulukerlugu.
