Inuusuttut apeqqutinut akissutissarserusuttut
Nunatsinni inuusuttut ilinniarfiini ilinniartut namminersulivinnissaq pillugu apeqqutinik akisassartalinnik KNR-imit immersugassinneqarput, nunarpullu maanna namminiilivittariaqanngitsoq amerlanerussutillit isumaqarput.
Tina Damip, Unicef Kalaallit Nunaanni allaffeqarfimmi suliniutinut pisortap, isumasiuinermi inernerit uissuummissutiginngilai:
- Inuusuttut naammattumik peqataatinneq ajorpavut, naak siunissaat pineqaraluartoq, taanna oqarpoq.
Tamatta immitsinnut paasissutissiinerunissamik akisussaaffeqartugut taanna isumaqarpoq. Politikerilli ersarinnerusut taassuma aamma ujartorpai:
- Politikerit paasissutissiinissamut pikkorinnerusariaqarput - pingaartumik paasiuminaassinnaasut pillugit - inuusuttut aalajangernissaminnut tunngavissinneqarsinnaaniassammata, Tina Dam oqarpoq.
Emma Lennertip, Kalaallit Nunaanni inuusuttut siunnersuisoqatigiiffianni siulittaasup, Tina Dam isumaqatigaa:
- Paasissutissanik annertunerusunik amigaateqarput. Taannaavorlu aamma politikkikkut massakkut siuttut aamma naalakkersuisoqarfiup akisussaaffigisariaqagaa inuusuttunik peqataatitsinerulernissaq, Emma Lennert oqarpoq.
Akissutissat amerlanerusut – anguniakkallu ikinnerusut
Ilinniartummi KNR-ip oqaloqatigisamasai namminiilivinnissaq pillugu akissutikinnerullutik apeqqutissaqarnerupput.
Hjørdis Christiansen Stæhr, ilinniartitsisunngorniartoq, IIlisimatusarfimmi ilinniartoq, paasissutissanik sukumiinerusunik ujartuivoq:
– Misigisimavunga paasissutissiinerit amerlanerusinnaasut, soorlu namminiilivikkutta suut isumagisassaappat, suullu piareersimaffigisassaappat, taanna aperivoq.
Nicolai Lennart, inuiaqatigiilerinermik Ilisimatusarfimmi ilinniartoq isumaqarpoq namminiilivinnissaq pillugu apeqqut akiuminaatsoq:
- Apeqqut akiuminaappoq, namminiilivinnissallu tungaanut anguniagassat suli amerlapput, sulilu akissutissarsineqanngitsut, taanna oqarpoq.
Pimoorussineq inuiaqatigiinnik nukittunerulersitsisarpoq
Inuusuttut inuiaqatigiinnut tunngasuni pingaarutilinnut oqallinnernut peqataatinneqarnerunissaat pingaaruteqartoq Tina Dam isumaqarpoq, inuusuttut paasissutissinneqarnerunermikkut aalajangiisinnaaniassammata, inuiaqatigiinnullumi peqataatinneqartutut aamam misiginiassammata.
- Inuusuttut ilanngutitinneqartutut misigisimanissaat pingaaruteqarpoq, tusaaniarneqartutut misiginiassammata, taanna oqarpoq, nangipporlu: - Inuusuttut inuit oqartussaaqataanerannut peqataatinneqarpata tamanna inuiaqatigiinnut nukittorsaaqataassaaq, taanna oqarpoq.
Birger Poppelip, inuiaqatigiilerinermik Ilisimatusarfimmi ilisimatusarsimasup, Tina Dam isumaqatigaa. Paasissutissiinerusoqarnera aallaavigalugu aalajangiisinnaaneq pingaaruteqartoq taanna aamma isumaqarpoq, inuillu sapinngisamik amerlasuut inuit oqartussaaqataanerannut peqataanerat pingaaruteqarnerarlugu.
Tusagassiorfiilli inuiaqatigiinnut paasissutissiinerunissamut pingaaruteqartut taanna isumaqarpoq:
- Politikerit isummersortussaapput. Tusagassiorfiillu ilinniarfiillu paasissutissiisussaallutik, innuttaasullu oqallinnermut peqataasussaallutik, taanna oqarpoq.
Nino Brønlundip, aamma ilinniartitsisunngorniartup, Ilisimatusarfimmi ilinniartoqatini isumaqatigai. Taanna isumaqarpoq apeqqutissarpassuaqartoq suli akissutissarsineqartariaqartunik. Tusagassiorfiilli paasissutissiinissamut pikkorinnerusariaqartut taanna isumaqarpoq:
- Naammattumik paasissutissinneqarsimanngitsutut misigisimavunga. Tusagassiorfiit paasissutissiinissamut pisussaaffeqartut isumaqarpunga, taanna oqarpoq.
Emma Lennert, Kalaallit Nunaanni meeqqat inuusuttut siunnersuisoqatigiiffianni Sorlammi siulittaasoq, inuusuttunut kaammattuuteqarpoq:
- Soorunami namminneerlutik peqataanerulernissaq akisussaaffigivaat,oqartussaaqataaneq inuiaqatigiinniippoq, taamaattumik inuusuttut qinersinissap tulliani qinersiartornissaat kaammattuutiginartorujussuuvoq, Emma Lennert oqarpoq.
