Anaananngulersoq: Taama ungasitsigisumut erniartorluni pikkunarpoq
Peqqinnissaq pillugu Ataatsimiititaliarsuup Peqqinnissaqarfimmi ilungersuasumi pitsanngorsaaniarnermut innersuussutini 119-it sapaatit akunnerani uani ataasinngornermi saqqummiuppai.
Nunatsinni erniartortarfiit marluinnanngortissnnissaat, Peqqinnissaq pillugu Ataatsimiititaliarsuup innersuuttutaannut 119-iusunut ilaavoq.
Tamanna isumatusaannginnerusoq, immikkut ilisimasallit anaanaasullu arlallit isumaqarput.
- Taama ungasitsigisumut erniartorluni pikkunarpoq. Nukippassuit atornarput, sinippiassanani, eqqarsaaterpassuit ilaquttakkalu ilagerusukkaluarlugit ilagisinnaanagit.
Ilaquttani qimallugit Upernavimmiit Nuummut erniartortoq, Katrine-Louise Therkelsen, taama oqarpoq.
Taannalu erniartortuni kisiartaaqqajanngilaq.
Nunatsinni 2021-mi inunngortut 766-iusut affangajaallu najugarisartik qimallugu erniartorsimasut, Nunatta Nakorsaaneqarfia ilisimatitsivoq.
Nunatsinnilu naartusut 70 procentiisa missarluinnaat najugarisartik qimallugu Nuummut erniartortarput. Tamanna ernisarfiit allat sulisussaalatsinerannik peqquteqakkajuppoq, tamannalu erninermi passuttariaqartutut aarlerinaatillit Nuummut erniartortoqartariaqarnerannik kinguneqarpoq.
Najugarisartilli qimallugu erniartortariaqartarnerat kisimi ajornartorsiutaanngilaq. Ilaquttatimmi aappartillu qimallugit kisimiillutik erniartortariaqartarnerat aamma ajornartorsiutaavoq, tamannalu erniartortut erninissaminnut ernumasarnerannut peqqutaaqataasarpoq.
- Kisimiilluni erniartorluni ilaquttat qimallugit, najugarisaq qimallugu uanga innersuussinnaanngilara, Katrine-Louise Therkelsen oqarpoq.
Taannalu kisimi taama isumaqanngilaq.
Najugarisaq qimallugu erniartorneq navinartoq
Najugarisaq qimallugu erniartorneq naartusumut naartumullu uippakajaarnarluni navianarluinnarsinnaaqisoq, Ernisussiortut Kattuffiata siulittaasuat Charlotte Bøgelund oqarpoq.
- Nalunngilarput anaananngortussamut ernumanermik uippakajaarnermillu kinguneqartartoq, tamannalu naartumut aamma malunniuttarpoq. Timermi hormonimik siaruarterfiusarami, tamannalu naartumut aamma malunniuttarpoq, taanna oqarpoq.
Taamaammat Peqqinnissaq pillugu Ataatsimiititaliarsuup erniartortarfiit tallimaasut marluinnanngornissaannik siunnersuutaat akuerinaqassanngitsoq, Katrine-Louise Therkelsenip aamma neriuutigaa:
- Uangaalluni ajorami, taavalu aamma takusinnaallugu erniartoqatikka taamaattut. Meerartaarnissaq erininarsisarpoq, imaluunniit soorlu ernumanartarpoq suna tamarmi. Taava kissaatiginerpaajuara najugarisaq qimallugu erniartortarunnaarnissarput, taanna oqarpoq.
Erniartortarfiit tallimaajunnaarlutik marluinnanngornissaat decembarimi aamma oqallisaavoq.
Ernisarfiit ikilineqalersaanngitsut qanorli amerlatigisut pisariaqarnersut misissortariaqartoq, peqqissutsimut naalakkersuisoq Mimi Karlsen taamani oqarpoq.
