Misissuinerup takutippaa: Angerlarsimaffimmut qanittumi erninermi ikiuisoqarsinnaanissaa periarfissaallunilu pingaaruteqartoq

Tunumi arnat naartusut 1.344-t ajornakusuunngitsumik ernisartut amerlanerpaallu Nuummukartinneqarnatik tunumiiginnartartut misissuinerup nutaap takutippaa.

Tunumi arnat naartusut 85 procentii tunumiiginnarlutik ernisarput. Tassa imaappoq naartusut 15 procentiinnaat Nuummut erniartortarput. Nunatsinni tamarmi ernisussat illoqarfiit pingaarnersaannut erniartortinneqartut qanoq amerlatigineri eqqarsaatigigaanni taakku 40 procentii sinneqarput.

- Peqqinnissakkut pinaveersaartitsinermik suliniuteqarluarneq, ernisussiortumik najuuttoqarnera pilaallunilu ernisoqarneranut atatillugu ikiuilluarneq pingaartumilli peqqinnissamut pitsanngorsaataasunik suliniuteqarneq ilaqutariit namminneq illloqarfianni tapersiisinnaanermut ernisinnaanerannullu pitsaasuusoq takutinneqarpoq, misissuinermi allaaserinnittuni pingaarneq, Susanne Houd oqarpoq.

Tunumi naartusut 93 procentii ajornakusuunngitsumik pilattaasoqartariaqanngitsumillu ernisarput.

Angerlarsimaffimmut qanittumi erninissaq pingaaruteqartoq

Erninissap qanillinerani tunumit Nuummut nuutsinneqartariaqarneq arnanut ajuallaataasinnaasoq, Susanne Houd oqarpoq. Tamanna pingaartumik meeqqamut ataataasup ilaanissaanut timmisartumut billettit akisoorujussuusinnaaneranik ilaatigut pissuteqarpoq.

- Ilaqutariinnut atassuteqaasiisarpoq aamma angutip aappaasullu nuliami aapparmiluunniit erninerani najuunnerani atassuteqaateqalersitsisarpoq, tamannalu ernisussap Nuummukartinneqarnerani amerlasuutigut pinngitsoorneqartarpoq. Arnallu tunumiit Nuummut erniartoraangamik kiserliungaatsiarsinnaapput. Taakkumi Nuummi ilaqutaqartuni ikinnerpaapput, Susanne Houd oqarpoq.

Arnallu angerlarsimaffimminnut qanittumi ernisut taama amerlatigitillugit amerlanerpaallu ajornakusoortortaqanngitsumik ernisarnerata naartusut allamut erniartortinnagit periarfissaqartoq tamatumani takutinneqartoq, Susanna Houd oqarpoq.

Pisariaqartut pingasuinnaapput: Ernisussiortoqarnera, nakorsamik pilaasinnaasoqarnera sinitsitsisoqarsinnaaneralu.

- Ernisussat aniatinnginnissaat inuiaqatigiinnut pingaaruteqarluinnarpoq. Sumiiffigisaminniiginnarnissaat isumaqarluinnarpoq. Taamaaliortoqarsinnaasorlu misissuineq una aqqutigalugu takutikkipput isumaqarpunga, Susanne Houd oqarpoq.

Taassuma tamatuma saniatigut meeqqat siusippallaartumik inunngortut toqunnginnissaat pissutigalugu ernisarfiit eqiterneqarnerat eqqarsaatigineqarpat anguniagaq uniorneqarsoraa.

Erniartortitsinerit erninissamut sapaatit akunneri pingasut sioqqullugit pisartut siusippallaartumik ernisut suli siusinnerusumi pisarput. Taamaammat Susanne Houdip oqarnera naapertorlugu tamanna ajornartorsiutaasumik aaqqiissutaanavianngilaq. Ernisussiortoqarnerali peqqinnissamillu suliniuteqarneq aaqqiissutissaapput.

Eqiterineq annikinnerusoq

Nunatsinni ernisarfiit ukiuni kingullerni ikilisinneqarlutik illoqarfinni tallimaannarniilerput tassalu; Nuummi, Ilulissani, Sisimiuni, Tasiilami Qaqortumilu.

Ernisarfiit matuneqartut ilaatigut ukunaniipput: Maniitsoq, Upernavik Uummannarlu.

Ernisarfiit ikippallaartut, nunatsinni Ernisussiortut Kattuffiata siulittaasuaq, Charlotte Bøgelund isumaqarpoq.

Taassuma oqarnera naapertorlugu tumi misissuinerit inerneri atorluarlugit nunatta sinneranut sanilliunneqarsinnaapput. Tunumi arnat aallarnatik sumiiffigisaminni ernisinnaagunik sumiiffinni allani eqiterineq pissutigalugu ernisarfinnik matooraaffiusuni aamma ernisoqarsinnaavoq.

- Tunumi atortulersuutit ajornakusoornerpaagunarput. Tunumi nakorsatut ernisussiortutullu atorfiit inuttalerneqarsinnaapput, tassa ernisoqarnissaanut upalungaarsimasussaatitaqartoqarluni. Sumiiffinni allani ernisarfiit matunerannik kinguneqarfiusuni atorfinitsitsinngitsoorfiusuni tamanna immaqa ilinniarfigineqarsinnaavoq, Charlotte Bøgelund oqarpoq.

Taassuma oqarnera naapertorlugu misissuinerup ernisussiortut kattuffiata anguniartuagaanut tunngaviliivoq. Tassa ernisussiortut amerlassusaata salliutinneqarnissaa ernisarfiillu eqiterutereeqisut eqiteqqinneqassanngitsut.

Ernisussiortut Kattuffiata peqqissaaviit ernisarfinngortinneqarnissaat kissaatiginngilaa, sumiiffiilli atorfinitsitsisoqarnissamut periarfissaqartut upalungaarsimasunillu attassiinnarnissamut periarfissaqartut ernisarfeqassasut.

- Nunap immikkoortuisa napparsimmaviini peqqinnissaqarfiit immikkoortortalerneqarneratulli ernisarfeqartinneqarnissaat kissaatiginerpaavarput. Tassa imaappoq Aasianni ernisarfiup atulerseqqinneqarnissaa pissutigalugu tassanngaanniit ernisussat Nuummukartinneqanngikkunik Ilulissanukartinneqarlutik isumalluutit amerlasuut atorneqartarmata. Tamanna Ilulissat napparsimmavianut ernisussiortuinullu aamma ulapititsingaatsiartarpoq, Charlotte Bøgelund oqarpoq.

Ernisoqartarneranik sullissinermut periarfissanut killiliinernullu ilisimasaqarnerulernissaq pillugu misissuinermik Naalakkersuisut aallartitaqarnikuupput. Misissuineq politikerit ernisarfiit pillugit siunissamut pilersaarutaannut atorneqassaaq taannalu 2023-mi saqqummiunneqarnissaa pilersaarutaavoq.