Ernisussiortut Kattuffiata ernisarfinnik matusinnginnissaq eqqissiallassutigaa
Ernisussiortut Kattuffiata oqarnera naapertorlugu Peqqinnissamut aqutsisut nunatsinni ernisarfinnik ikilisaalluni eqiterutitsinissamik oqaaseqarnerat aalassassutigineqarpoq.
Peqqinnissqarfiup aqutsisuisa isumasioqatigiinneranni Dronning Ingridip Napparsimmavissuani Ilulissanilu kisimi 2035-mit ernisoqarsinnaalissasoq saqqummiussisoqarsimaneraasoqarpoq.
Tamanna Ernissussiortut Kattuffiata Sermitsiaq.AG-kkut isornartorsiungaatsiarpaa.
Peqqinnissamulli naalakkersuisup Mimi Karlsenip (IA) tamatuma kingorna taama takorluugaqartoqannginnerarpaa.
Nunatsinni peqqinnissaqarfiup ernisarfiit tallimat:
Dronning Ingridip napparsimmavissua
Ilulissani Peqqinnissaqarfik Avannaani qitiusumik napparsimmavik
Sisimiuni Peqqinnissaqarfik Qeqqani qitiusumik napparsimmavik
Tasiilami Peqqissaavik
Qaqortumi Peqqinnissaqarfik Kujataani qitiusumik napparsimmavik
marsip tungaanut ammagallassaaq
- Nunatsinni ernisarfiit 2035-mi marluinnanngortinneqarnissaanik pilersaarummik Peqqinnissamut Aqutsisunit Naalakkersuisunut saqqummiusisoqarnikuunngilaq, Mimi Karlsen Anna Wangenheimip paragraph 37-mut apeqquteqaataanut akissuteqarluni allappoq.
Taava sooq Ernisussiortut Kattuffiat naalakkersuisup Mimi Karlsenip ilumuunnginneragaanut takorluukkamik isornartorsiuiva?
Ernisussiortut Kattuffianni siulittaasuugallartup, Charlotte Bøgelundip oqarnera naapertorlugu kattuffiup ilaasortaasa sinerissamiittut ernisarfiit siunissami ikilineqarlutillu eqiterneqarnissaat Sisimiuni Ilulisssanilu immikkoortortami aqutsisunit tusarsimavaat.
AAMMA ATUARUK Ernisarfiit nunatsinni marluinnanngornissaat Mimi Karlsenip ilumuunnginnerarpaa
Nunap immikkoortuani aqutsisut taakku marluk aqutsisut isumasioqatigiinneranni, tassa siunissamut pilersaarutinik saqqummiiiviusumi peqataasimapput.
Charlotte Bøgelund Ernisussiortut Kattuffianni siulittaasuugallarpoq.
- Sinerissami ilaasortatsinnit ernisarfiit arlallit matuneqarsinnaanissaannut sinerissamilu ernisarfimmik ataasiinnarmik attassiniarnissaq pillugu aqutsisuminnit toqqaannartumik nalunaarfigineqarsimasunit saaffigineqaratta taava soorunami kattuffittut tamanna qisuariarfigivarput, Charlotte Bøgelund KNR-imut oqarpoq.
Attaveqaqatigiinnermi eqqissiviilliorneq
Sooq Naalakkersuisut aamma Sisimiuni Ilulissanilu immikkoortortami aqutsisut Peqqinnissamut Aqutsisut isumasioqatigiinneranni siunissamut takorluukkanik assigiinngitsunik marlunnik tusagaqarsimanersut Charlotte Bøgelundip akissuteqarfigisinnaanngilaa.
Taassumali peqqinnissamut naalakkersuisup, Mimi Karlsenip tamanna politikkikkut takorluugaanngitsoq oqaatigimmagu nuannaarutigaa.
- Nunatsinni nunap immikkoortuani napparsimmaviit ingerlanneqarnerata siunissaami taama pilersaaruteqarfineqannginnerat Naalakkersuisup nalunaarutigimmagu soorunami nuannaaqaagut. Taamaattumik oqaatigineqartumut politikkikkullu pilersaarummut atatillugu soorunami eqqissisimaneruvugut, Charlotte Bøgelund oqarpoq.
Kattuffiulli Peqqinnissamut Aqutsisut ernisarfiit siunissaannut takorluukkaminnut atatillugu iluminni attaveqaqatigiinnerminni erseqqinnerulernissaat kissaatigaa.
- Nunap immikkoortuani pineqartuni atorfeqartunut qanoq nalunaaruteqarnissamut atatillugu pilersaarusiorluarnerusinnaapput, tamannami sulisut akornanni eqqissisimanerulersitsisinnaassammat, taanna oqarpoq, nangillunilu:
- Sulisunut ernisussiortunullu immaqa oqaluttoortoqarsimanera tusaatissatut tigusimassagaat ilimagissavarput.
Ernisarfiit misissorneqarlutillu isumaliutigineqassasut
Qaqortumi nunap immikkoortuani napparsimmaviup ernisarfia ukiup sinnerani matoqqassasoq aggustimi nalunaarutigineqarmat, ernisarfiit pillugit oqallinneq aallarteqqippoq.
Pilertortumik passuttariaqarlutik ernisut pillugit pilattaasinnaasumik nakorsassaaleqineq pissutigalugu ernisarfik matuneqarallarpoq.
Pilattaasinnaasumillu atorfinititsisoqarallarnera juullinngitsiartoq KNR-imit oqaluttuaraarput. Taannali marsip 24-ata tungaannaanut atorfeqassaaq. Taamalilluni upernaap ingerlanerani ernisussat kujataani najugallit Nuummukaratik Qaqortumi ernisinnaapput.
AAMMA ATUARUK Qaqortumi ernisoqarsinnaaleqqissasoq – Ernisussiortut Kattuffialli suli ernumasoq
Naalakkersuisulli nunatsinni ernisussanik sullissinermik misissuititsipput. Mimi Karlsen naapertorlugu peqqinnissaqarfimmi sulisut aamma naartusut ilaqutaasalu atugaat aallaavigalgut 'periarfissat aporfiillu' pillugit ilisimasaqarnerulernissaq misissuinermi siunertaavoq.
Misissuineq politikerit siunissami ernisarfiit pillugit pilersaarusiornissaanut atorneqassaaq.
