Umiarsuaq ilisimatuussutsikkut misissuutissaq Spaniami sananeqassasoq
Umiarsualiorfimmi Spaniameersoq Balenciaga umiarsuarmik ilisimatuussutsikkut misissuutissamik sanasussatut toqqarneqarpoq. Pinngortitaleriffiup nittartagaani tamanna atuarneqarsinnaavoq.
Pinngortitaleriffiup umiarsuassaanik suliariumannittussarsiuussisoqarmat Balenciaga, Spaniap avannaaneersoq, ajugaavoq. Balenciaga nunatsinni arlalinnik sullissisareerput, Tassami Royal Greenlandip kilisaataanik sanareerput, soorlu aamma Royal Arctic Linep umiarsuaataannik aamma sananikuusut.
AAMMA ATUARUK Pâmiut ukiut 50-t umiartoreerluni atorunnaartussanngortoq
Namminersorlutik Oqartussat aningaasaateqarfillu Aage V. Jensens Fonde aningaasaliissuupput, umiarsuarlu 235 millionit koruuninik akeqartussatut naatsorsuutigineqarpoq.
Umiarsuaq misissuutissaq nutaaq Pinngortitaleriffiup ukiorpanngortuni misissuutigisimasaanik ”Paamiut”-mik taarsiissaaq, nutaalianillu atortulersugaanissani peqqutigalugu misissuinernik nutaanik ilisimatusaatinillu allanik suliaqarsinnaalissalluni.
2021-mi atorneqalernissaa pilersaarutaavoq
Kilisaat ilisimatuussutsikkut misissuutissaq nutaaq 61 meterinik takissuseqassaaq sikusiorsinnaanissamullu immikkut qajannaarsagaassalluni.
Qalut kivisittakkat atorlugit aalisakkanik misissuinerit (raajat, qalerallit saarulliillu) aammalu aalisakkanik immap ikeraniittartunik (avaleraasartuut allallu) misissuisarnernik ingerlatsisoqarsinnaalissaaq.
AAMMA ATUARUK Pâmiut ukiut 50-t umiartoreerluni atorunnaartussanngortoq
Misissuutissaq nutaaq Pinngortitaleriffiup suliassanik pilersaarutaanut 2021-miit upernarneraniit atorneqarsinnaalernissaa pilersaarutaavoq.
