Pâmiut ukiut 50-t umiartoreerluni atorunnaartussanngortoq
Umiarsuup naliliiffifigineqarluni misissuiffigineqarnerani kingullermi paasineqarpoq ilisimatuussutsikkut imaani misissuutitut atoqqissappat allatut ajornartumik annertuumik akisuupilussuarmillu iluarsartuuteqqaarneqassasoq.
Umiarsuup R/V Pâmiup aserfallatsaalineqarnissaa imminut akilersinnaanngitsoq, Pinngortitaleriffiup nalilerpaa, Kalaallit Nunaata imartaani aalisakkanik misissuutitut atorsinnaajunnaartutut nalilerneqarluni.
Naalakkersuisut pisumik ilisimatinneqareerput.
Aalisakkanik misissuutip Pâmiut inuttaasalu pikkorilluinnartut misilittagartuullu nunatsinni inuussutissarsiutit pingaarnerpaartaannik aalisagaqassutsinik - pingaartumik raajanik, saarullinnik qaleralinnillu - ukiumoortumik missuisarnerit pingaaruteqarluinnartut ingerlattarsimavaat.
Misissuisarnerit taamaattut ingerlaannarnissaat pingaaruteqartupilussuuvoq, tassami taamatut utikattumik ukiorpassuarni ukiumut misissuinngitsoortoqarani misissuisarnerit sivitsoriartornerani nalitusiartortarmata Kalaallit Nunaannullu ilisimatusartarnerit eqqarsaatigalugit tunngaviusumik pingaaruteqartupilussuullutik.
