Motzfeldt innuttaasunut eqqissisaallunilu Aki-Matilda akerlileraa: - Naleqqap paasissutissat qujaannarfigai

Vivian Motzfeldtip isumaqatigiissut matoqqasumik isumaqatigiissutigineqarsimannginnerarpaa, Nalerarlu peqataanissamut qaaqquneqarsimagaluarluni qujaannarsimasoq erseqqissaatigalugu.

Allattoq Markus Valentin

oktobarip 14-at 2025 16:31

Nutserisoq Connie Fontain

Aki-Matilda Høegh-Damip (Naleraq) naalakkersuisut Issittoq pillugu isumaqatigiissut 2-mut nutaamut atatillugu kisermaassisumik iliuuseqarsimanerarpai.

Illuatungiliuttut suliaq inatsisitigut inuiaallu pisinnaatitaaffii naapertorlugit kinguneqartitsisoqarnissaa piumasaraat.

Taassumali malittarisassat naalakkersuisunit unioqqutinneqarsimassasut suuneri erseqqissumik saqqummiutinngilai.

Nunanut allanut naalakkersuisoq, Vivian Motzfeldt (S) naalakkersuisunut isornartorsiuinermut atatillugu Qanoruukkut akissuteqarpoq.

Taassumalu Inatsisartut partiillu Danmarkimut illersornissamut isumaqatigiissummi nutaami ilaatinneqarsimannginneqarnerat eqqortuunnginnerarpaa.

- Taanna ilumuunngilaq. Siullertut maannakkut suliarisagut Naalakkersuisooqatigiit isumaqatigiissutaani aamma tunngaveqarput. Tassa qinigaaffiup siuliani suliat ingerlanneqartut taakkua nanginneqassasut.

- Taanna siullertut oqaatigeriarlugu suliap ingerlanneqarnerani ataatsimiititaliaq susassaqartoq, tassa nunanut allanut sillimaniarnermullu ataatsimiititaliaq, taanna peqatigalugu suliat ingerlappagut. Suliap ingerlanneqarnerani paasissutissanik avitseqatigisarlugit, aammalu ataatsimiitsitaliap pineqartup kissaatai tunngavitsinni tunngavilersuutitut ineriartortitsinitsinni atorlugit.

Issittoq pillugu isumaqatigiissut 2-mi suliniutit

Danmark Issittup aamma Atlantikup avannaata illersorneqarneranut 27,4 milliardit koruuninik aningaasaliissuteqarpoq. Suliniutit ilaat uani ataani allassimapput.
Kalaallit Nunaata Danmarkillu akornanni imaatigut kabelimik pilersitsisoqassaaq.
Timmisartuaqqanik inuttaqanngitsunik illersornermut nakkutilliinermullu 2,1 milliardit koruunit atorneqarput.
Dronit (timmisartuaqqat inuttaqanngitsut aaqq.) nutaat nukittorsaataassapput “pisuni takunnissinnaanermik”, pisuni nutaani, Illersornissaqarfiup najukkani oqartussat tapersersuleraangagit, Savalimmiuni aamma Kalaallit Nunaanni.
Tamatuma saniatigut issittumi umiarsuit marlunnik timmisartunillu imaani nakkutilliissutit ilaneqassapput.
Issittumi Sakkutooqarfik Nuummi nutaamik qullersaqarfiliorneqassaaq.
Issittumi sakkutooqatigiinnik nutaanik immikkut piginnaanilinnik pilersitsisoqassaaq, taakku Issittumi Sakkutooqarfiup ataaniittussapput.

Paasissutissarsiffik: Ritzau/Forsvarsministeriet

Allisiguk

Naleqqallu paasissutissiiffigineqarsimannginnerarneqarnertik Vivian Motzfeldtip tupaallaatiginngilaa. Naalakkersuisummi oqarnera naapertorlugu partiip isumaqatigiinniarnerup ingerlaneranut atatillugu paasissutissanik pissarsisannginnissartik nammineq aalajangernikuuaa.

Naallu partiip paasissutissarsinissaq qujaannarfigigaluaraa, Vivian Motzfeldtip atuagassat nassiuttaannarsimallugit oqaatigaa.

- Suliap ingerlanneqarnerani paasissutissanik avitseqatigisarlugit, aammalu ataatsimiitsitaliap pineqartup kissaatai tunngavitsinni tunngavilersuutitut ineriartortitsinitsinni atorlugit.

- Kisiat aamma ersareqqissaartumik Partii Naleqqamiit suliat uku ingerlanneqarneranni ilisimatinneqarnikuuvugut illersornissamut isumaqatigiinniarnermut ilaannginnamik, peqataarusunnginnamik paasissutissanik pajuttorneqarnissartik aallaat kissaatiginagu, Vivian Motzfeldt oqarpoq.

Naleraq marlunngornermi ualikkut nassiussaa tusagassiuutinut nalunaarummi allappoq:

- Naalakkersuisoq salluvoq – Naleraq isumaqatigiissusiornissamut qaaqqusaanikuunngilaq.

Issittumi Sakkutooqarfimmut allaffik nutaaq – sakkutooqarfiunngitsorlu

TV2-p sakkutuut Nuummi nutaamik qullersaqarfiliuunnissaa pilersaarusiorneqartoq isumaqatigiissutip saqqummiunneqarnissaanut ullut marluk sioqqullugit saqqummiuppaa.

Tamannalu Naleqqap isornartorsiuineranut pissutaasut ilagaat, partiimmi isumaqatigiissut pissutigalugu Nuuk sorsuttoqalissagaluarpat sakkutooqarnikkut saassunneqaratarsinnaanera ernumassutigaa.

Aamma atuarukAki-Matildap illersornissaqarfiup qullersaqarfissaata nutaap Nuummiinnissaa isornartorsioraa: - Inuunermik navianartorsiortitsineruvoq

Isumaqatigiissulli tallimanngormat saqqummiunneqarmat sakkutooqarfimmik saqqummiussisoqanngilaq. Issittumi Sakkutooqarfilli nutaamik allaffiliorneqarnissaa pineqarluni.

- Uani ersarissarusutara tassaavoq sakkutooqarfimmik pilersitsiniartoqanngimmat. Ullumikkut maani Nuummi Arktisk Kommandop najuunnerani allaffik maani pigineqareerpoq, attartorluni ingerlanneqartoq, Vivian Motzfeldt oqarpoq.

Ernumassutissaqartoqanngitsoq

Sakkutuut aasaanerani sungiusarneranni fregattit arlallit Nuummi talissimapput.

Vivian Motzfeldtillu oqarnera naapertorlugu tamanna umiarsualiveqarfimmi ilungersuassutaavoq, taamaammat Illersornissaqarfiup umiarsuinut nutaamik talittarfiliortoqarnissaa isumaqatigiissummi nutaami ilaatinneqarpoq.

Taamaammat Aki-Matilda Høegh-Damip naalakkersuisut innuttaasunit eqqortinnaveeqquteqartitsiniartutut oqaatigai. Umiarsualivimmi taama inissaqartitsisoqarnera sakkutooqarnikkut aamma eqquiniaasoqarneranik kinguneqarsinnaasoq taanna isumaqarpoq.

Aamma atuarukMinisteri illersornissamut isumaqatigiissut pillugu: - Najukkami innuttaasut tamani eqqarsaatigaagut

Aki-Matilda Høegh -Damip ernumassutigisorujussuuaa sakkutuut umiarsuaat Nuummut tulattalerpata sorsuttoqariataalissagaluarpat taakkua siullerpaatillugit eqqorneqarsinnaanerat. Aki-Matilda Høegh-Dam ernumassuteqarnissaminut pissutissaqarpa?

- Isumaqanngilanga ernumanissaminut pissutissaqartoq. Massakkut suliarisagut ima qiviarneqartariaqarput, tassa piginnaasat massakkumut isumaqatigiinniarnermi naammassineqartut, piginnaasallu nunap pigisariaqagai qangali naammassineqareertussaagaluit massakkut naammassineqarput. Aamma ullumikkut Artisk Kommandop maani nunatsinni najuunera ullumikkullu ingerlatsineq taamaareerpoq, Vivian Motzfeldt oqarpoq, nangillunilu:

- Sakkutuut umiarsui sinerissatsinni nakkutilliillutik paarsillutik, upalungaarsimanermi suliaqarlutik, illersornissamullu annaassiniarnernut assigiinngitsorpassuarnut suliatik ingerlatereerpaat. Taakkulu aamma talittarfitsinnut sumiikkaluartunut aamma talittarput. Uanilu angorusunneqartoq tassaavoq talittarfinnut piusunut, aammalu tattoqikaaffiusunut annertunerusumik oqimaaloqutaarusunnatik talittarfiup allinissaannut aningaasaleeqataarusupput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.