Umiarsuarmut misissuummut nutaamut 200 millioninik aningaasaliisoqalersoq
Umiarsuup imaani ilisimatuussutsikkut misissuinissamut atorneqalernissaa Pinngortitaleriffiup qilanaaraa:
- Nutaarluinnarmut ikaarsaalerpugullusooq, tassami misissuut nutaaq atuleriarpat aalisakkanik immap ikeraniittartunik, imaanit isumalluutigisatta nutaartaannik, ilisimatuussutsikkut misissuisoqarsinnaalissaaq, Pinngortitaleriffiup siulersuisuini siulittaasoq Gert Mulvad oqarpoq.
Umiarsuup imaani pisuussutinik misissuutissap 2020-p naajartornerani piareerneqarnissaa naatsorsuutigineqarpoq, Pinngortitaleriffiullu misissuutitaassaata misissuutitoqaq immap naqqasiornermi kilisaataasoq ”Pâmiut” taarsissavaa, upernaaq ukiut 47-t siullermik KGH-p kilisaataatut ukiullu kingulliit 27-t ilisimatuussutsikkut imaani misissuisarnerni atorneqarsimalluni pisoqalivallaarluni atorneqarunnaartoq.
AAMMA ATUARUK Pâmiut ukiut 50-t umiartoreerluni atorunnaartussanngortoq
Kilisaataasimasoq ”Pâmiut” atorlugu misissuisarnerpassuarni avataani raajat, qalerallit saarulliillu pillugit biologit siunnersuisarnerini tunngaviusartut paasissutissat pinngitsoorneqarsinnaanngitsut ukiorpassuit ingerlanerini pissarsiarineqarnikuupput, misissuisarnerillu inuiaqatigiinnut pingaaruteqartupilussuusut Pinngortitaleriffiup oqaatigaa.
Umiarsuarmik nutaamik sanasoqarnissaanut naalakkersuinikkut aatsaat taama sukkatigisumik tapersiisoqarnera pissutaalluni, ukioq manna suliariumannittussarsiuussisoqarsinnaalereermat Pinngortitaleriffiup nuannaarutigaa.
