19-inik ukiulik Brian Adolfsen suli maqaasineqartoq

Qaqortumi politiit qatserisartullu 19-inik ukiulik, Brian Adolfsen kingullermik sisamanngornerup tallimanngornerullu unnuaani takuneqartoq suli ujaaraat.

Kalaallit Nunaanni Politiit pigaartuisa pisortaat, Poul Kreutzmann sapaammi ullaaq tungaani oqarpoq.

- Politiit angallataat Nukik Qaqortup, Narsaq nunaqarfiillu akornanniittut akornanni ujaasisussanngortinneqarpoq, taanna oqarpoq.

Qatserisartut Qaqortumi tasersuup eqqaani misissuileruttortut, timmisartuaqqamillu ungasianiit aquttakkamik ujaasisoqartoq, politiit paasissutissiipput.

Nammineq kajumissutsiminnik ujaaseqataarusuttunut kaammattuut

Politiit Brian Adolfsenip ujaarineqarnera arfininngornermi ualikkut saqqummiuppaat, tassanilu angutip inuusuttup sumiissinnaanerannik ilisimannittut politiinut attaveqaqqullugit kajumissaarneqarput.

- Arlalinnik saaffigineqarpugut, taakkuli suliami ingerlaqqinnitsinnik ajoraluartumik kinguneqanngillat, Poul Kreutzmann oqarpoq.

- Taassuma sumunnarnissaa ilisimaneqarani angerlarsimaffimminiit anisimanera ajornakusoortitsivoq.

- Taamaammat Qaqortumi inuit taassuma sumiiffigisinnaasaani quini toqqorsimaffiusinnaasunilu alapernaaqqullugit kaammattorusuppagut, pigaartut pisortaat oqarpoq.

Nammineq kajumissutsiminnik ujaaseqataarusuttut aamma ujaaseqataapput. Inuit ujaaseqataajartoqqullugit Facebookikkut kajumissaarneqarput.

Ujaaseqatigiinneq Qaqortumi tissaluttup eqqaani nalunaaqutaq ataatsinut aallartissaaq.

- Kaammattuut taanna inuinnarnit aaqqissuussaavoq, kisianni ikiuuttoqarnissaa soorunami nuannaarutigaarput, pigaartut pisortaat oqarpoq.