Nakorsaaneq tunillatsissimasut amerlanerat pillugu: Omikron juullinngitsorli annguppoq
Coronavirusip allannguutaa omikron nunatsinnut juullinngitsiartoq annguppoq, taamaalillunilu juullip ukiortaallu akornanni aaqqissuussisoqarnera ilutigalugu tunillaassuutilertorluni.
Taamaammat tunillatsissimasut pingaartumik Nuummi Ilulissanilu januaarimi amerlangaatsiarput. Nakorsaaneq, Henrik L. Hansen taama nassuiaateqarpoq.
Nakorsaanerup misissugassat Danmarkimi misissuiffigeqqissaarneqartut pingasunngornermi akissutissarsivai. Taakkulu omikronip nunatsinnut juullinnginnerani anngussimaneranik takutitsipput.
Nunatsinni coronamik tunillatsissimasut aatsaat taama amerlatigisut
Tunillatsissimasut ullup kingulliup ingerlanerani paasineqartut nutaat 457-iupput.
Taakku tunillatsissimasunit ippassaq paasineqartunit 524-unit 67-inik ikinnerupput.
Tunillatsissimasut ataatsimut qanoq amerlatigineri saqqummiunneqartarunnaarput.
Tamanna misissuinermi periutsip allanngorneranik pissuteqarpoq. Tunillatsissimasorpassuaqarnera pissutigalugu misissuisarfiit malinnaasinnaajunnaaqqapput. Taamaammat kikkut tamarmik PCR-imik misissorneqarsinnaajunnaarput.
Maannakkut utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. Aamma inuit angerlarsimaffimminni sukkasuumik misissuutinit tunillatsissimasutut takussutisserneqartut.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
- Omrikron tamatuma kingornatigut pingaartumik Nuummi Ilulissanilu siaruaatingaatsiarluni tunillaannera qularutissaanngilaq, Henrik L. Hansen oqarpoq.
AAMMA ATUARUK Corona pillugu ullumikkut kisitsisit: Tunillatsissimasut nutaat 457-it
Nunatsinnut tuniluunnerup annikinnerpaaffissaaniitsinniarnera eqqarsaatigalugu Omikronip juullilaataani anngunnerata piffissaa pitsaanerpaanngilaq.
Piffissaq pitsaanerpaanngitsoq
Juullimmi ukiortaallu akornanni angallattoqangaatsiarlunilu inuiaqatigiinni aaqqissuussisoqarpoq. Tamannalu tuniluutianerusup omikronip siaruarnissaanut periarfissiilluarsimasoq, Henrik L. Hansen oqarpoq.
Nakorsaaneq tunillatsissimasut januaarimi amerlangaatsiarnerat pillugu oqarpoq:
- Omikronip nunatsinnut anngussimanera pissutaanerpaasoq qularutissaanngilaq, Henrik L. Hansen oqarpoq, nangillunilu:
- Aappaattut juullerlunilu ukiortaanera aamma pissutaavoq. Tassa imaappoq tuniluutianerusoq juullikkunni angalasut ilutigalugit anngunnerata nalaani juullip ukiortaallu akornanni inuiaqatigiinni aaqqissuussinerpassuarni tuniluutingaatsiarnissamut periarfissarsivoq. Tamanna maanna tuniluutingaatsiartoqarneranik kinguneqarpoq.
Tuniluunneq sukkatsingaatsiartoq
Henrik L. Hansenip Nuummi tuniluunneq sukkatsingaatsiartutut tunillatsittoqassusaata takutippaa.
Nuummi tuniluunnerup siaruaannera Danmarkimi kommunini tunillatsissimasoqarnerpaanit marloriaammit pingasoriaammillu annertuneruvoq.
- Taamaammat tuniluutilertupallattorujussuuvoq. Tamanna nunani avannarlerni nunanut sanilliullugu isigineqaruni omikronip anngunnerani killilersuutit annikitsuararsuupput. Taamaalilluni tuniluunneq annertuumik siaruaannissamut periarfissaqarpoq, nakorsaaneq oqarpoq.
AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq
Nuummi angalasussanut piumasaqaatit juullikkut nalaanni oqartussanit qasukkarneqarput. Decembarimmi 25-annit januaarip pingajuannut angalasussat tunillatsissimannginnermut uppernarsaateqartariaqanngillat.
Tamanna tunillatsissimasut amerlassusaannut aamma sunniuteqaqataasoq, Henrik L. Hansen naliliivoq.
- Timmisartuni timmisartunullu ilaasuni tunillaasoqartarlunilu tunillatsissimasoqartartoq ilisimavarput. Akiuussuserneqarsimanngitsunik piffissami tassani misissuisoqannginnerani nunatsinni sumiiffinnut allanut aamma siaruarnera qularutissaanngilaq, nakorsaaneq oqarpoq, itisiliillunilu:
- Tamannali piffissap ilaani takkuttussaareerpoq. Illoqarfimmiit illoqarfimmut siaruaannissaa pinngitsoortissinnaanngilarput, Henrik L. Hansen oqarpoq.
Danmarkimut timmisartumut ilaasuni aamma tunillatsisismasoqartoq Henrik L. Hansenip eqqaavaa. Danskimmi oqartussaasuisa nunatsinnit angalasunit tunillatsissimasorpaaluit paasivaat.
Isumalluartoq
Naalli Nuuk 2020-mi marsimisulli matuneqaraluarpat omikronip nunatsinnut anngunnissaa pinngitsoortissinnaanngikkipput, Henrik L. Hansen isumaqarpoq. Sumiiffinnummi tamanut tuniluuppoq.
- Kinap tuniluunneq unitsinniarlugu illoqarfik millioninik innuttaasoqartoq matuniarsarigaluaraat takusinnaavarput. Taamaaliortoqarsinnaanngilarli. Virusimimi tuniluutiasoq tunillaassuuttussaavoq.
Nakorsaanerli neriulluarpoq.
Naak omikron tuniluutiangaatsiaraluartoq covid-19-imut akiuussutissaq napparsimarululinnginnissamut illersuutaavoq.
- Omikron napparsimarululersitsinnginnerusartoq nalunngilarput. Aamma akiuussutissaq napparsimarululinnginnissamut illersuutaasoq nalunngilarput, Henrik L. Hansen oqarpoq.
- Akiuussutissat tunillatsinnginnissamut illersuinerluppoq, piffissamilu sivikitsumi napparsimalertoqarsinnaavoq, kisianni covid-19-imik tunillatsissinnerup napparsimarulussutigilinnginnissaanut illelrsuutaavoq. Taamaammat ataatsimut isigalugu qaangiilluarnissatsinnut neriuutissaqarpoq, nakorsaaneq oqarpoq.
