Politiit ullormut nalunaarutaat: Angut imigassartorsimatilluni biilersimasutut Nuummi tigusarineqartoq
Angut Nuummi illoqarfiup qeqqani biilinit ajutoornikunit tallimanngornermi ullaassakkut sisamat missaanni niusoq takuneqarpoq, Kalaallit Nunaanni Politiini sillimasut pisortaat Aputsiaq Hansen oqarpoq.
Angut aalakoorpasimmat takunnittup politiinut nalunaarutigivaa. Biilinik aquttoq tamatuma kingorna tigusarineqarpoq, aaversinnissaatalu tungaanut politiinit tigummigallarneqarluni.
- Angutip biilernerani aava imigassamik qanoq akoqartigisimanera, aavata misissorneqarnerani paasinarsissaaq, angulli ullaaq iperagaavoq, Aputsiaq Hansen oqarpoq.
Angut kisimiilluni ajutoorpoq, sillimasut pisortaat oqarpoq, biilillu aallarunneqarsimanersut imaluunniit inuttaata aqussimanerai politiinit maanna misissorneqarpoq.
Mattak peqquserluutaasoq
Nuummi aqqusinermi ajutoortoqarnerata saniatigut, mattammik Facebookikkut maannakkut tuniniaasuusaartunik peqquserluttoqarnera sillimasut pisortaata eqqaavaa.
- Mattammik peqquserluttoqarneranik arlalinnit nalunaarfigineqarpugut. Inunnit mattammik pisisimagaluarlutik tigusaqanngisaannarsimapput. Taamaattumik inunnit ilisarisimanngisanit Facebookikkut pisiniaraanni mianersornissaq kaammattuutigaara, Aputsiaq Hansen oqarpoq.
Angerlarsimaffinni eqqissiviilliornerit sisamat ullup unnuallu ingerlanerani nalunaarutigineqarsimanerat, taakkunanngalu marluk meerartaqartut, sillimasut pisortaata naggasiilluni oqaatigaa.
