MIO-mit 2025-mut nersornaasiisoqartoq

Kuka Thomassen Hoffmann Kangerlussuarmeersoq MIO-mit 2025-mut nersornaammik nersornaaserneqarpoq.

MIO aamma Meeqqat pillugit siunnersuisoqatigiit Naalagaaffiit Peqatigiit meeqqanut ullorititaanni inummut, peqatigiiffimmut suliffeqarfimmulluunniit meeqqanut pisinnaatitaaffiinullu immikkut suliniuteqarsimasunut ukiut tamaasa nersornaasiisarput.

Meeqqanut. Pinngortitamut kulturimullu maligassiuisoq

MIO-p oqarnera naapertorlugu maligassiuisoq nunatsinni kulturimik pinngortitamillu sulissuteqartoq nersornaaserneqarpoq.

Kuka Thomassen Hoffmannip suliffeqarfini Atorluaasa aqqutigalugu meeqqat inuusuttullu pinngortitami misigisaqartillugillu kalaallit ileqquinik ilisimasaqalernissaat sulissutigisarpaa.

Taassuma meeqqat inuusuttullu piniaqatigisarpai, kalaaliminernik pilinermut ilinniartittarpai, kalaallit naasuutaannik tiiliorneq pinnersaanerlu ilinniartitsissutigisarpai soorlu aamma ammit saarngillu atornissaat ilitsersuutigisaraa. Taassuma suliamini ileqqut nunatsinni inuunermi qitiusimasut qitiutippai, meeqqallu taakkuninnga atuisinnaassasut isumaqarpoq.

Meeqqat oqaaseqartartuat, Stina Sværd Kuka Thomassen Hoffmannip nersornaaserneqarneranut atatillugu ima oqarpoq:

- Meeqqat pillugit siunnersuisoqatigiit Kukap kalaallit kulturiata pinngortitaatalu attanneqarnissaanut - kalaallillu ileqquisa meeqqanut ingerlateqqinneqarnissaannut aallussingaatsiarnera isiginiarsimavaat. Suliaqartarnera meeqqat namminneq kulturiminnik aammalu kulturikkut eqqissisimaarnissaminnullu pisinnaatitaaffiinik naammassinninneruvoq.

Meeqqat angerlarsimaffiup avataanut inissinneqarsimasut immikkut uummateqarfigigai

Inuit arlallit Kuka Thomassen Hoffmann MIO-mit nersornaasiinissamut innersuuppat, taakkulu Kukap meeqqanut angerlarsimaffiup avataanut inissinneqarsimasunut immikkut uummateqarnera erseqqissaatigaat.

Taassumalu suliaqarnermini meeqqat ileqqut malillugit pinngortitami misiginngitsuuligaannik misigisaqarnissaat sulissutigisaraa oqaatigaat.

Stina Sværdip tamatuma saniatigut ukioq manna innersuunneqartorpassuit akornanni nersornaasiiniarneq ajornaatsuinnaasimannginnerarpaa. Inuit, eqimattat peqatigiiffiilluunniit assigiinngitsut 47-t pillugit 90-init amerlanerusunik MIO-mut innersuussuteqartoqarpoq. 

- Naak 2025-mi MIO-p nersornaasiuttagaanut ataasiinnarmik tunniussisinnaagaluarluta, nunatsinni meeqqanut inuusuttunullu sunniuteqarluartumik suliniuteqarsimasunut maligassiuisunut tamanut qujanarujussuaq. Tamatsinnit ullut tamaasa – MIO-p nersornaasiuttagaanik tunniussinermiinnaanngitsoq – nersorniarneqartuartariaqarput, Stina Sværd oqarpoq.

MIO-mit nersornaat Nuna-Fondenimit aningaasaliissutinik 20.000 koruuninik ilaqarpoq.