Suliffissarsiornermi isertarfik: Tusagassiuinermi Sulisut Peqatigiiffiata Sermitsiaq taperseraa
- Sermitsiami sipaarniartoqalissagaluarpat tamanna nunatsinni tamarmi malugineqartussaavoq.
Tusagassiuinermi Sulisut Peqatigiiffiata siulittaasua, Arnaq Nielsen Naalakkersuisut suliffissarsiornermut isertarfissamut nutaamut pilersaarutaata saqqummiunneqarneranit sapaatip akunnera qaangiuttoq oqarpoq.
Naalakkersuisoq akisussaasuusoq, Bentiaraq Ottosen (A) tunuaqqaarpoq, tamatuma kingorna suliffeqarfiit arlallit suliffissarsiornermut isertarfik pilersaarut malillugu januaarip aallaqqaataanni piareertussaq isornartorsiorpaat.
Tusagassiorfiup Sermitsiap pisortaanerata, Masaana Egedep pisortat suliffissarsiornermut isertarfeqarnerat tusagassiorfiup isertitsissutigisartagaanut pingaarnerpaamut tassa: Suliffissanut aarlerinartorsiortitsisinnaanera ernumassutigaa.
- Ima ingasatsigisumik oqartariaqarpunga, suliffissarsiornermut isertarfik pilersinneqarpat taamatullu suliffeqarfimmut namminersortumut unammillerpata tusagassiortorpassuit soraarsittariaqalissavagut, tusagassiorfimmi pisortaaneq apersorneqarnermini oqarpoq.
- Tamat oqartussaataanerannut ajornartorsiortitserujussuassaaq, taanna oqarpoq.
TP-p siulittaasuata, Arnaq Nielsenip Sermitsiap pisortaanerata nalunaarutaa taperserpaa.
- Tusagassiorfiit ingerlalluartuunissaat pingaaruteqarpoq. Suliffissarsiornermilu isertarfik ingerlalluartuutitsiunnaaqataassappat ajusaarnartorujussuussaaq, taanna oqarpoq.
Tapersorsuinnginneq ajornartorsiutaasoq
Transparency International Greenland Sermitsiap pisortaanerata isornartorsiuineranut atatillugu aamma oqaaseqarpoq.
Transparency International Greenland “Kalaallit Nunaanni ammasumik peqquserluffiunngitsumillu ingerlatsisoqarnissaa” pillugu suliniuteqartartoq, suliniaqatigiiffiup siulittaasua, Inuk Lundblad mailikkut allappoq.
- Tamanna kiffaanngissuseqartumik nukittuumillu tusagassiorfeqarnissamik pisariaqartitsiviuvoq, taanna allappoq.
Inuk Lundbladip Sermitsiap suliffissanut isertarfik nutaaq pillugu ernumassuteqarnera ajornartorsiutaasumit sunniutaanerarpaa:
- Tusagassiorfitsinnut naammattumik tapiissuteqarlutalu ikiuinianngilagut. Suli.gl-eqarnitsitulli suliffissarsiornermut isertarfimmik nutaamik peqalernissarput ajornartorsiutaasariaqanngikkaluarpoq. Tusagassiorfimmut namminersortumut tapersiissuteqanngippallaarnerput pissutigiinnarlugu tamanna pillugu ernumassuteqarpoq, Inuk Lundblad oqarpoq.
TP-p siulittaasuata, Arnaq Nielsenip nunatsinni tusagassiorfiit ilungersuangaatsiareersut oqaatigaa.
- Nunatsinni tusagassiortut marlunnik oqaaseqartut amigaatigineqareerput. Pissutsit ernumanareerput, taanna oqarpoq.
Taassuma teknologiip ineriartupiloornerani aamma nunatsinnit nunarpullu pillugu paasissutissanik ukiup ataatsip ingerlanerani piumasaqartorujussuanngortoqartoq tatineqarnerulersorlu erseqqissaatigaa.
- Tassunga atatillugu tusagassiornermik tamat oqartussaaqataanerannik kivitsisinnaasut nunarpullu tamaat pillugu tusagassiorneq pitsaanerusoq pingaarnerulerput, TP-p siulittaasua oqarpoq.
Taamaammat Sermitsiami soraarsitsisoqarnissaa pisariaqartinneqannginnerpaasoq, taanna oqarpoq.
- Naalakkersuisut tusagassiorfiit pingaaruteqarnerarlugit oqarunik taava aalajangiinikkut nukittorsaaqataassapput, taanna oqarpoq.
- Tusagassiorfiit nukittorsarniarlugit (naalakkersuisunit aaqq.) oqaaseqarsimagaanni nammineq suliarisatik qanoq kinguneqassanersut eqqumaffigeqqissaartariaqarpaat,
Danmarks Radiomit, TV2-mit tusagassiorfinniillu allanit nunatsinnik ukioq manna sammisaqangaatsiartut nutaarsiassaqartitsinissaat naammanngila?
- Naamik, taanna akissut naatsunnguaq taama oqaatigisinnaavara. Ajunngivippoq nunat allamiut aamma Danmarkimeersut tusagassiorfiit takkuttarmata imaluunniit takkunnerulermata, kisianni aamma pingaaruteqarpoq taama pisoqarnerani nunatsinni tusagassiorfiit nukittorsarneqarnissaat, Arnaq Nielsen oqarpoq.
- Una oqaatigisarparput tusagassiortunit vinkeliliineq tassa sammisat assigiinngitsut aamma nunatsinniittut isaanninngaanniit isigineqarnissaat pingaarutilerujussuusoq, taanna oqarpoq.
Naalakkersuisut ”nutaaliornissamut tamallu oqartussaaqataanerannut nukittorsaanissap inissaqartinnissaa” pissutigalugu tusagassiornermik tapiissutit nutarsarneqarnissaa kissaatigigaat Naalakkersuisoqatigiinnissamut isumaqatigiissutaanni allassimavoq
Tusagassiorfinnut tapiissutit pillugit inatsimmut allannguutissatut siunnersuut piffissami matumani tusarniaassutigineqarpoq. Tusarniaanermut akissuteqarnissamut decembarip arfineq-pingajuat killissaritinneqarpoq.
KNR-ip Sermitsiamit isornartorsiuineq naalakkersuisut siulittaasuannut suliffissarsiornermut isertarfimmut nutaamut akisussaaffimmik tigusigallartumut saqqummiuppaa. Taamaammat KNR-ip suliaq manna pillugu ilanngutassiaq malitseqartissavaa.
