Pisortaq: Suliffissarsiornermut isertarfik Sermitsiamut ernumatitsillunilu tamat oqartussaaqataanerannut ajornartorsiutaangaatsiarpoq

Aningaasaqarnermut Akileraartarnermullu ataatsimiititaliap siulittaasua, Erik Jensen (S) suliffissarsiornermut isertarfik nutaaq pillugu siunersiuinissamut pingasunngornermi ualikkut aggersaavoq.

Tamannalu maanna naalakkersuisuusimasup, Bentiaraq Ottosenip (IA) tunuarneranik kinguneqarpoq. Suliamullu tunngatillugu maanna allanngortoqaqqippoq Naalakkersuisut suliffissarsiornermi isertarfimmik nutaamik pilersitsinissamut maanna suliaqarnialerput.

Suliffissarsiornermut isertarfiup 2026-mi januaarip aallaqqaataanni piareernissaa pilersaarutaavoq. Tamannalu pissutigalugu Sermitsiap pisortaa, Masaana Egede mianersoqqussuteqarpoq.

Sermitsiammi suliffissarsiornermut isertarfik aningaasanik isaatitsissutigisaani pingaarnerpaavoq, taamaammallu suliffissarsiornermi isertarfimmik nutaamik ammaasoqarnissaa imminnut kingunerluuteqangaatsiassasoq pisortap paasissutissiissutigaa.

- Ima ingasatsigisumik oqartariaqarpunga, suliffissarsiornermut isertarfik pilersinneqarpat taamatullu suliffeqarfimmut namminersortumut unammillerpata tusagassiortorpassuit soraarsittariaqalissavagut, Masaana Egede KNR-imut oqarpoq.

Taama pisoqassappat tamanna tamat oqartussaaqataanerannut ajoqusiingaatsiassaaq. Tamanna Odensemi tusagassiornermik ilinniarfimmi ilinniartitsisup, aamma Ilisimatusarfimmi Tusagassiornermik Immikkoortortami lektorip, Ralf Anderssonip erseqqissaatigaa.

- Nunatsinni tusagassiorfiit – tassa KNR aamma Sermitsiaq – aamma tusagassiortut nunatsinni innutaasunut pingaaruteqarluinnartuupput. Kalaallit tusagassiorfii kiffaanngissuseqartumik isornartorsiuillutillu assigiinngiiaartumik isummersorsinnaasut aatsaat taama pingaaruteqartigipput, Ralf Andersson oqarpoq.

Ilisimatusarfiup Tusagassiornermik Immikkoortortaqarfiani lektorip, Ralf Anderssonip nunatta ukiuni kingullerni inissisimaffigiligaani isornartorsiuillutik tusagassiorsinnaanissaat immikkut ittumik pingaaruteqarnerarpaa. Taamaammat Sermitsiaq tusagassiortunik soraarsitsisariaqalissappat imaluunniit matusariaqalissappat ajornartorsiutaangaatsiassasoq, taanna oqarpoq. Assi © : Ilisimatusarfik

Taassuma tusagassiorfiit tamarmik immikkut ukiuni kingullerni unammilliuteqarlutillu ilungersuuteqartut  “marluinnaanerat” pissutsini ajornakusoortuneereersoq erseqqissaatigaa.

- Sermitsiaq sipaarniarfigineqassaguni imaluunniit matusariaqalissaguni tamanna kingunerluuteqangaatsiassaaq, tamannalu tamat oqartussaaqataanerannut aamma ajornartorsiutaangaatsiarluni. Oqaatsit ingasattut atoraluarpai, taamali isumaqarpunga, taanna erseqqissaavoq.

Tamat oqartussaaqataanerannut ajornartorsiortitsissasoq

Masaana Egede assinganik aamma oqariartuuteqarpoq.

- Tamat oqartussaataanerannut annertuumik ajornartorsiortitsissaaq, taanna oqarpoq, taassumalu nunarput USA-p tigusinissamik sioorasaaruteqarnerani kiisalu qinersisoqarnerani sunniiviginninniartoqarnerani tusagassiornerup ukioq manna qanoq pingaaruteqartiginera erseqqissaatigaa:

- Oqartoqarsinnaavormi tusagassiarisartakkavut sipaarniarfigisariaqalissagutsigit, ukiuni kingullermi pisut eqqarsaatigalugit tusagassiinerit pitsaasumik suliarineqartut uagut KNR-miillu saqqummiuttakkagut innarlerneqarujussuassasut, tusagassiorfiup pisortaa oqarpoq.

Lektorip, Ralf Anderssonip oqarnera naapertorlugu naalakkersuisut Sermitsiap tusagassiortunik soraarsitsisariaqalinnginnissaa matusariaqalinnginnissaalu namminneerlutik qulakkeerniarusuttariaqarpaat.

- Tamanna soqutigineraat taakkununnga apeqqutigineqartariaqartoq isumaqarpunga:

- Inuiaqatigiinni tamat oqartussaaqataaffigisaanni tusagassiuutit kiffaanngissuseqartut pingaaruteqarluinnarput. Tamanna qinikkat arlaannaalluunnit isumaqataanngitsoq ilimaginngilara.

- Tusagassiortut taama ilanngarterneqassappata tamanna inuit ilisimasanik, paasissutissanik pissarsisinnaanerannut aalajangiinissamullu periarfissanut sunniuteqaratarsinnaavoq, Ralf Andersson oqarpoq.

Namminersorlutik Oqartussani ataatsimiinneq

Masaana Egedep Namminersorlutik Oqartussanut ataatsimiigiarsimanini Sermitsiallu siunissaanut tunngatillugu ernumassuteqarnini politikerinit tusaatissatut tiguneqartoq paasissutissiissutigaa.

Pisortap Naalakkersuisunit allaniillu suliffissarsiornermut isertarfinnik neqerooruteqartunik oqaloqateqarnissani neriuutigaa.

- Neriuppunga silattorlutik suliniut unitsissagaat.

Suliffissarsiornermut isertarfinnit ussassaarutinik aningaasassarsisarputit. Kissaatigisattut pissarsisinnaanngeq pillugu tamat oqartussaaqataanerannik oqalunnissaq peqqusersuasaarnerulaanngila?

- Suliffissarsiornermut isertarfinnik suliaqartut suliffeqarfiillu namminersortut amerlaqaat. Taamaaliornikkut Naalakkersuisut suliffeqarfinnut namminersortunut ingerlalluartunut aserorterinerat assersuutitsialaanngilaq, Masaana Egede akivoq.

KNR-ip naalakkersuisut siulittaasuat, Jens-Frederik Nielsen (D) suliffissarsiortunut isertarfimmut nutaamut akisussaaffimmik tigusisoq Masaana Egedep ernumassuteqarneranut atatillugu oqaaseqartinniarlugu attavigaa. Taanna isornartorsiuinermut atatillugu ataasinngornermi akissuteqassaaq.