Suliffissanut isertarfik pillugu kusanaatsuliortoqarnera naalakkersuisup tunuarneranik kinguneqartoq

Suliffeqarfiup politikkikkut akuerineqaqqaarani aallartissinnaatinneqarsimanerata saqqummiunneqarnera pissutigalugu Bentiaraq Ottosen (A) tunuarnissaminik nalunaaruteqarpoq.

Allattoq Markus Valentin

novembarip 13-at 2025 11:08

Ilanngutassiaq Bentiaraq Ottosenip qisuariarneranik nalunaaqutaq 12.25 nutarterneqarpoq.

Bentiaraq Ottosen (A) Isumaginninnermut, Suliffeqarnermut, Nunamut Namminermut Avatangiisinullu Naalakkersuisutut tunuarpoq.

Taassuma tamanna Facebookikkut allakkami paasissutissiissutigaa.

- Akisussaaffimmik tigusillunga, maanna nalunaarutigaara. Suliaq annertooq oqimaattoq ingerlassimasara tulluusimaarutigivara, partiittalu anguniagai toqqaannartumik aallussimallugit, Bentiaraq Ottosen allappoq.

Taassuma tunuarnera Erik Jensenip (S) Aningaasaqarnermut Akileraartarnermullu ataatsimiititaliami siulittaasutut ippassaq tamanut ammasumik siunersiuinissamut aggeqqusinerata kingunerisaanik pivoq.

Suliaq suliffissanut isertarfimmut nutaamut januaarip aallaqqaataanni piareertussamut tunngassuteqarpoq.

Ataatsimiititalialli suliap ingerlaneranik misissuinermini malittarisassat malinneqarsimanngitsut paasivaa.

Eqqartuussivilersuussinissamik sioorasaarut

Isumasiuinissamut aggersaaneq naapertorlugu naalakkersuisut suliffissanut isertarfimmut nutaamik pilersitsinissamut aningaasaliissuteqarnissamut inassuteqarput.

Ataatsimiititalialli inassuteqaammik oktobarip arfineq-pingajuanni isumaginninnerani aningaasaliissuteqarnissaq akuerineqanngilaq.

Tamatumalu kingorna isumasiuinissamut aggersaaneq naapertorlugu naalakkersuisup suliffeqarfik, Knowit Experience Danmark suliamik juunip aqqaneq-aappaani – tassa ataatsimiititaliami suli aalajangiisoqanngitsoq aallartissinnaatissimagaa paasinarsivoq.

Knowit ataatsimiititaliap itigartitsinerata aqaguani suliaminnik unitsitseqquneqarsimanertik paasissutissiivoq.

Suliffeqarfiullu eqqartuussissuserisua naalakkersuisoqarfik suliniummut erngertumik aallartinneqaqqinngippat eqqartuussivilersuussinissaq sioorasaarutigalugu aalajangiinermit sapaatit akunneri marluk qaangiuttut, tassa oktobarip 24-anni saaffiginnippoq.

Bentiaraq Ottosen naalakkersuisunngormat taassuma Inatsisartuni atuuffia Knud Kleemanimit (A) atuuffigineqalerpoq. Bentiaraq Ottosen Inatsisartuniileqqissanersoq suli inissinneqanngilaq.

Bentiaraq qisuariaateqartoq

KNR-ip nalunaaruteqaqqammitsiarnerup kingunitsianngua Bentiaraq Ottosen naalakkersuisutut tunuarnissaminik aalajangernera pillugu qisuariaateqartinniarlugu naapippaa.

Taassumalu kukkussuteqarsimanani erseqqissaatigaa, kisianni kinguneranik akisussaasutut soorunami tigusilluni.

- Taamatut tunuarniuteqarnera isumaqarpunga pingaaruteqartorujussuusoq. Partiit illuatungiliuttut allatut oqalussinnaapput, kisianni piviusoq uaniippoq inuinnakkuluuvugut tamatta, tamattalu aamma killissaqartarpugut. Kisianni akisussaaffik tassaavoq qimarratigisassaanngitsoq, taamaammat tassanngaanniit tunuarniarlunga oqariartuuteqarsimavunga, Bentiaraq Ottosen oqarpoq.

Taassumalu Aningaasaqarnermut Akileraartarnermullu ataatsimiititaliami ippassaq siunersiuisoqarnerani kukkuneq ilisimasangu erseqqissaatigisimallugu oqaatigaa.

- Allaffissornikkut Ilisimanngisannik annertuumik kukkusoqarsimanera ataatsimiititaliaq peqatigalugu ippassaq siunersioqatigiinnermi oqariartuutigivara.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.