Sermitsiaq: Ugeavis saqqummersinneqartarunnaassallunilu AG Sermitsiarlu kattunneqarput
- Atuartartut, ussassaarutinik saqqummiussisartut sulisullu Nuuk Ugeavisip immikkuullarinneranik pilersitseqataasut tamaasa qutsavigaagut.
Tusagassiorfimmi Sermitsiami pisortaq aaqqissuisullu pisortaat, Masaana Egede tusagassiuutinut nalunaarummi oqarpoq.
Tusagassiorfik ulluni makkunani allannguuteqarfiungaatsialerpoq.
Naalli pisortap sapaatip akunneranut naqitanngorlugit saqqummersinneqartartut oqaluttuarisaanermi pingaaruteqaraluartut naqitanngorlugit saqqummersittaannarnissaat akilersinnaajunnaartoq erseqqissaatigaa.
- Niuernerulli ineriartornera pissutaalluni aningaasaqarnikkut imminut napatissinnaanera periarfissaajunnaarsimavoq.
Masaana Egedep KNR-imit apersorneqarnermini digitalikkut ineriartorneq pissutigalugu Nuuk Ugeavisip aningaasaqarniarneq ajornakusuulersimasoq oqaatigaa.
Ugeaviisi akeqanngilaq tamallu oqartussaaqataaneranni paasissutissanut pingaaruteqarluni. Unitsinneqarnera qanoq kinguneqassava?
- Nuummut, najukkami inuunermut inuussutissarsiornermullu pingaaruteqangaatsiarnikuuvoq. Aningaasalli qiviarutsigit ussassaarutinit akilerneqartarput. Aningaasat taakku Googlemut, big techimut inoqatinullu attaveqaatinut allanut nuupput. Taamaammat imminut akilersinnaajunnaarfianiippugut.
Attatiinnarniarlugu nittartakkatigut saqqummertartunngornissaa imaliutigineqarnikuua?
- Aap, soorunami. Kisianni saqqummersitsikkatsinni Nuuk pillugu oqaluttuatsialaateqareerpugut. Nuummut tunngasunik saqqummersitsarunnaarnavianngilagut. Nuuk Ugeavisimilu saqqummertartut digitalikkut saqqummertartooreerput.
Aviisit marluk ataasinngortinneqartut
Sermitsiami allannguuteqarneq ugeavisimut kisimi tunnganngilaq.
Aviisit marluk AG aamma Sermitsiaq aviisitut ataatsimut sapaatip akunnerata naanerani saqqummertalissapput.
- Atuartartutsinnut naqitamik pitsaanerusumik pilersitsiniarluta ataqatigiissaarivugut. Sapaatit-akunnerisa naaneranni aviisimi nuna tamakkerlugu oqaluttuat pingaarutillit, inuussutissarsiornermut tunngasut aamma AG-p silarsuaani inunnut qaninnerusumik oqaluttuat ataatsimoortillugit atuarneqarsinnaalissapput, Masaana Egede tusagassiuutinut nalunaarummi allappoq.
AG-p atuarnissaa suli periarfissaassaaq. Taanna aviisip Sermitsiap iluani ilanngunneqartalissaaq.
Allanngortitsineq nutaaq tusagassiuutinut nalunaarut naapertorlugu digitalinngorsaanermut annermut ilaavoq:
"Tusagassiorfimmi digitalikkut ineriartortitsineq suli aallunneqassaaq, nittartakkamilu Sermitsiaq AG-lu e-aviisitut immikkut atuarsinnaaneqarumaarlutik. Naqitanik saqqummersitsisarneq ataatsimoortinneqassaaq, aviisilli tamarmik imarisaat kinaassusiallu attatiinnarneqassallutik."
Sapaatip akunneranut saqqummertartussaq nutaaq 2026-mi januaarimi siullermeertumik saqqummersinneqassaaq.
