Sermitsiap isummersorluni allaffiusinnaasoq atorunnaarsikkaa

- Isumaqarpunga allannguut ajunngitsuusoq, Ulla Nielsen oqarpoq, taamaaliornerlu 'eqqortumik aalajangiinerusoq' Jenny Dahl isumaqarpoq.

Inoqatinut attaveqaqtigiittarfitsigut isummersorluni allaffiusinnaasup Sermitsiap atorunnaarsippa, allannguinerlu ajunngitsuusoq Ulla Nielsen isumaqarpoq. Assi © : Henriette Simonsen / KNR

Tusagassiorfiullu Sermitsiap facebookikkut quppernerminni isummersorluni allaffiusinnaasut matuneqarnerat Ida Abelsen Hansenip allannguut allatut isummerfigaa.

- Uggornarpoq taamatut peersimassappassuk, pissutigalugu inuit kiffaanngissuseqarlutik isummersinnaanerat tassaniittarami aamma, Ida Abelsen Hansen oqarpoq.

Isummersorluni allaffiusinnaasup atorunnaarsinneqarnera, iluaqutaasinnaasunik utertitsiviginninnermi amigaateqartoqalissasoq Ida Abelsen Hansen isumaqarpoq. Assi © : Henriette Simonsen / KNR

Nakkutigineqanngitsoq

KNR-imiit inuit aqqusinermi naapitatta, isummersorluni allatat nakkutigineqannginnerat arajutsisimanngilaat.

- Kommentaariisut ilaat negativiusarnermik, positivinik saqqummiigaluarlutik negativerpassuit taava oqaluuserisaq taanna allamut sangutikkiartuaarneqaruusaartarami, Jenny Dahl oqarpoq.

Allaffissalli peerneqarnera iluaqutaasinnaasunik utertitsiviginninnermi amigaateqartoqalissasoq, Ida Abelsen Hansen isumaqarpoq.

Kisianni Nutaarsiassaqartitsivik Sermitsiaq naapertorlugu quppernerminni inuit isummersortut oqallinnatik sakkortuumik isummersorsinnaasarnerat, allaffissap matuneqarneranut aamma pissutaavoq.

- Allaaserisamut immaqaluunniit oqallisigisamut tunnganngiivittunik kommentarinik ulikkaartarami tassani takusarpagut allamiuluartut ammip qalipaataanik aallaavilinnik nakkarsaasut, taavalu aaamma nikaginnillutik allaaserinnittut inuk toqqaannarlugu nakkarsaasut allaaserisamullu tunnganngiivittunik allaaserinnittut.

Nutaarsiassaqartitsivik Sermitsiami pisortaq, Masaana Egede oqarpoq.

- Avissaartuutsitsineq annertoorujussuaq pilersarpoq. Taamatut nikassaalluta ammip qalipaatanik aallaaveqartumik aamma nikassaagaagatta. Taanna avissaartuutsitsisuuvoq taamaalilluni aamma oqallinneq ajunngittoq imaluunniit ataqqinnittoq atorunnaartarluni, taanna oqarpoq.

Ammaqqinneqassanngitsoq

Taamaammat isummersorluni allaffissaq ammaqqinneqassanngitsoq, Masaana Egede oqaluttuarpoq.

Jenny Dahlillu Sermitsiap facebookikkut quppernerani allaffissaq maqaasissannginnerarpaa.

- Naa, naamik maqaasissanngilara, kisianni soorunami tamatta isumaqaratta assingiinngitsunik isumagut annittoortaratsigit kisianni overskriftia qimattooraanni nuanniillisoortarami taamaammat maqaasissanngilara, Jenny Dahl oqarpoq.

Inoqatinut attaveqaqtigiittarfitsigut isummersorluni allaffissap atorunnaarsinneqarnera 'eqqortumik aalajangiinerusoq', Jenny Dahl isumqarpoq. Assi © : Henriette Simonsen / KNR