Nittartakkakkut suliffissarsiortarfik suli isornartorsiorneqartoq: Nittartakkakkut suliffissarsiortarfik pisortanit pigineqartoq namminersortunut ajoqutaasinnaavoq
Nuna tamakkerlugu nittartakkakkut suliffissarsiortarfissaq nutaaq pisortanit pigineqartoq piviusunngortinneqarpat, namminersorlutik inuussutissarsiortut suliffissanik inuttassarsiuussisareersut eqqugaasinnaapput.
Naalakkersuisut nittartakkakkut suliffissarsiortarfimmik januaarip aallaqqaataaniit ammaaniarnerat pillugu isorinninneq arlalinneersoq taama nipeqarpoq. Taakkulu ilagaat Naleraq:
- Suliffissanik saqqummiussiniaraanni nittarsaassisartunik namminersortunik arlalinnik peqareerpoq. Sooq pisortat akuliutissappat?
Naleqqami siulittaasoq, Pele Broberg Qanoruumi ataasinngormat apersorneqarnermini oqarpoq.
Erik Jensen ilanngutassiami tassani assingusumik isornartorsiuivoq:
- Namminersorlutik inuussutissarsiutillit pioreersut eqqugaanissaat ernummatigissallugu tunngavissaqarpoq, taanna oqarpoq.
Nittartakkakkut suliffissarsiortarfimmik suliaqartitsinermut akisussaasuusimasoq naalakkersuisuusimasoq Bentiaraq Ottosen (A), aningaasaqarnermut akileraartarnermullu ataatsimiititaliamit avoqqaarneqareerluni sisamanngornermi tunuareersorlu isornartorsiuineq pivoq.
Erik Jensenip (S), ataatsimiititaliami siulittaasup, isumaginninnermut, suliffeqarnermut, nunamut namminermut avatangiisinullu naalakkersuisuusimasoq siunersiunissamut aggersarpaa.
Ataatsimiititaliamit aalajangiineq suli pinngitsoq, suliffeqarfiup nittartakkakkut suliffissarsiortarfimmik suliaqalernissaanut Bentiaraq Ottosenip juunimi akuersisimanera aggersaanermut ilaatigut pissutaavoq.
- Partiit illuatungiliuttut allatut oqalussinnaapput, kisianni piviusoq tassaavoq inuinnakkuluugatta tamatta, tamattalu aamma killissaqartarluta. Kisianni akisussaaffik tassaavoq qimarratigisassaanngitsoq, taamaammat tassanngaanniit tunuarniarlunga nalunaarpunga, Bentiaraq Ottosen tunuaqqammerluni KNR-imut taama oqarpoq.
Naalakkersuisut siulittaasuata Jens-Frederik Nielsenip (D) Bentiaraq Ottosenip tunuarnerata kingorna, Ottosenip akisussaaffeqarfigisimasai oqartussaaffigilerpai, taamaalillunilu Jens-Frederik Nielsenip suliffissarsiornermi nittartakkakkut isertarfik nutaaq aamma akisussaaffigilerpaa.
Sulisitsisut: Pisortat kisermaassinerat ajornartorsiutaavoq
Partiit Siumut aamma Naleraq isornartorsiuisutuaanngillat.
Suliffissarsiornermi nittartakkakkut isertarfiup nutaap tusagassiivimmut Sermitsiamut qanoq kinguneqarsinnaanera pillugu Sermitsiap pisortaata Masaana Egedep sakkortuumik noqqaassutigaa, KNR-imit arfininngormat allaaserineqarpoq.
Sulisitsisut tamatuma kingorna oqaaseqarput.
Nittartakakkut suliffissarsiortarfik nutaaq pillugu toqqaannartumik saaffiginnittoqarsimanngikkaluartoq ernumassuteqarnerartoqarsimanngikkaluartorluunniit, pisortanit pigineqartumik nittartakkakkut suliffissarsiortarfimmik isumassarsineq, pisortap Christian Keldsenip isoraa:
- Suliamut tamatumunnga ilisimasagut killeqarput, namminersortunit taama ittunik niuertumik arsaarinninniarnermut assersuutitut immaqa isikkoqarsinnaavoq. Nittartakkakkut suliffissanik nittarsaassisutut suliallit arlaqarput. Aamma tamatumunnga ingalluni ajornartorsiortitsilerpoq pisortat taama ittunik kisermaassiniarlutik siuinissami pilersitsiniarnerat, Christian Keldsen KNR-imut mailerutimini allappoq.
- Pisortat akileraarutit atorlugit suliaqartuugamik aningaasartuutit sapinngisamik ikinnerpaaffissamiitinniartussaavaat naleqalersitsinissarlu oqimaaqatigiissaarniartussaavaat. Suliffeqarfiit aningaasarsiorsinnaasut inuiaqatigiinni aningaasanik amerlanerusunik kaaviaartitsinerujuassapput, taanna allappoq.
KNR-ip naalakkersuisut siulittaasuat Jens-Frederik Nielsen (D) pingasunngornermi ullaap tungaani apersorpaa, taannalu nittartakkakkut suliffissarsiortarfissaq nutaaq pillugu isornartorsiuinermut akissuteqarpoq. Apersorneqarnera kingusinnerusukkut saqqummiunneqassaaq.
