Epstein pillugu allagaatit Trumpip saqqummersinnaanngortikkai
USA-p præsidentiata, Donald Trumpip allagaatit pisoorsuarmut toqukkut qimagunnikumut kinguaassiutitigullu atornerluisimasutut eqqartuussaanikumut Jeffrey Epsteinimut tunngasut, atsiornermini saqqummersinnaanngornissaat akuersissutigaa.
Trump nammineq attaveqatigiittarfiutimini, Truth Socialimi, sisamanngormat taama allappoq.
Inatsisissatut siunnersuutip Kongressimi inatsisartut ataatsimiittartoqatigiivisa, Sinniisoqarfiup aamma Senatip, sapaatip akunnerata aallartinnerani akuersissutigereeraallu, Trumpip atsiornissaa amigaataaginnarnikuvoq.
Inatsiseqarnermut ministereqarfiup allagaatit tamanut saqqummiunnissaannut ullut 30-t maanna periarfissarivaat, tusagassiivik Reuters allappoq.
Donald Trumpip isummani sapaatip-akunnera kingullermi allanngorteriataarpaa, suliamilu allagaatit tamarmik tamanut saqqummiunneqarnissaat kaammattuutigalugu.
Epsteinip kanngunartuliorsimanera Trumpimut qaammatini arlalinni ajornartorsiutaangaarsimavoq, ilaatigut Trumpip Epsteini pillugu ilimatsaassanik uppernarsagaanngitsunik tapersersortiminut ikummarissaaqataanikuunera pissutigalugu.
Pissaanilissuit ilagaat
Epsteinip inunnut pissaanilinnut attaveqarsimanera - tassanilu aamma Trumpimut attaveqarsimanera, præsidentimit taassumalu aqutsisoqarfianit isertorneqarsimasoq, Trumpip qinersisorpassui isumaqarput.
Naak allagaatit maanna saqqummiunneqaleraluartut, allagaatit ilai saqqummiunneqanngisaannarsinnaasut Reuters allappoq.
Inatsisit akuerineqartut naapertorlugit inatsiseqarnermut ministereqarfik Epsteinip pinerlisimasaanut tunngasunik paasissutissanik misissuinerullu ingerlarnganik navianartorsiortitsisinnaasunik isertuussisinnaatitaavoq.
Tamanna Trumpip USA-mi inatsiseqarnermut ministereqarfimmut Epsteinip præsidentiusimasup Bill Clintonip Demokraatineersup attaveqarsimanera pillugu qanittukkut misissuinissamik peqqussutaanut tunngassuteqarpoq.
Trump Epsteinilu 1990-ikkunni 2000-ikkunnilu ikinngutigiipput, Amerikami nunanilu allani pissaanillit allat nereqatigisarlugit.
Trump Epsteinimik ikinnguteqarnini 2000-ikkunni kipisimasoq oqarpoq, Epsteinillu pinerluttuliorneranut attuumassuteqannginnerarpoq.
/ritzau/
