Naalakkersuisut siulittaasuata nittartakkakkut suliffissarsiortarfiup ernumassutigineqarnera ingasattajaarneruneraraa

Nittartakkakkut suliffissarsiortarfissaq nittartakkakkut suliffissarsiortarfiit nalinginnaasut assiginavianngilai, Sermitsiamullu kinguneqarnissaa naalakkersuisut ernummatiginngilaat, Jens-Frederik Nielsen (D) oqarpoq, taamaalillunilu nittartakkakkut suliffissarsiortarfissaq pillugu isornartorsiuineq akerlilerpaa.

Allattoq Birgitte Kjeldsen

novembarip 21-at 2025 07:30

Nutserisoq Medea Olsen, Connie Fontain

Nittartakkakkut suliffissarsiortarfik nutaaq pisortanit pigineqartoq, suliffeqarfinnut namminersortunut, suliffissanik nittarsaassisartunit ernummatigineqartariaqanngilaq.

Nittartakkakkummi suliffissarsiortarfissaq naalakkersuisunit piorsarneqartoq januaarillu aallaqqaataani piareeqqasussaq, nittartakkakkut suliffissarsiortarfiit nalinginnaasut assiginavianngilai.

Jens-Frederik Nielsen (D) sapaatip akunnerani matumani nittartakkakkut suliffissarsiortarfissaq pillugu isornartorsiuinermut taamatut akissuteqarpoq.

- Nitartakkakkut suliffissarsiorfiliornerup suliffeqarfinnut namminersortunut unammillerniarnertut ernumassutigineqarnera paasilluarsinnaavara, tamannali nittartakkakkut suliffissarsiortarfiliorniarnermi siunertarineqanngilaq, taanna oqarpoq.

Aamma atuaruk Nittartakkakkut suliffissarsiortarfik suli isornartorsiorneqartoq: Nittartakkakkut suliffissarsiortarfik pisortanit pigineqartoq namminersortunut ajoqutaasinnaavoq

Ilinniartut suliffeqarfinnik ilinniarfissalinnik nassaarnissaat ajornannginnerulersinniarlugu ilaatigut siunertaasoq taassumap erseqqissaatigaa.

- Nittartakkakkut suliffissarsiorfittut nalinginnaasuunnginnissaa anguniarlugu aaqqiissutissanik periarfissarpassuaqarpoq. Ilinniartut ilinniarnerminnut atatillugu suliffeqarfiit suut ilinniartunut suliffissaqartitsinersut ilinniartunit takuneqarsinnaalernissaa pingaarnerpaavoq, taanna oqarpoq.

Nittartakkakkut suliffissarsiortarfimmut suliami pisut

- Naalakkersuisut pisortat nittartakkakkut suliffissarsiortarfiutissaanik nutaamik naalakkersuisut suliffissarsiortarfigisimasaannut suli.gl-imut taarsiissutaasussamik ineriartortitsinissaq qangali kissaatigaat.

- Nittartakkakkut suliffissarsiortarfiup suliariumannittussarsiuunneqarnera ukioq manna februaarimi unippoq. Suliffeqarfiit “suliffissarsiorfissanik tamanik saqqummiussisoq” aamma “suliffissarsiortunut pingaartumik kalaallinut isumalluutinik atortunillu ikiuinermik neqerooruteqartoq” pilersinniarlugu suliariumannittuuniarsinnaapput. Tamanna paragraf 37-mut akissummi allassimavoq.

- Naalakkersuisut nittartakkakkut suliffissarsiorfiusinnaasutoqaq suli.gl 2025-mi maajip aallaqqaataanni matuaa, Sermitsiap oqarnera naapertorlugu taanna suliffissanut saqqummiisarfimmit Jobindeximit pisiarineqarpoq. Tamatuma kingorna CV-t aamma suliffissat saqqummiussat tamarmik jobindex.gl-imut nuutsinneqarput.

- Jobindex.gl-ili paragraf 37-mut akissut naapertorlugu utaqqiisaasumik aaqqiissutaaginnarpoq, naalakkersuisullu pisortat nittartakkakkut suliffissarsiortarfiannik nutaamik 2026-mi saqqummersitsinissaq pilersaarutaavoq.

- Nittartakkakkut suliffissarsiorfik nutaaq qaammammi matumani politikkikkut pisoqartitsingaatsiarpoq. Aningaasaqarnermut Akileraartarnermullu ataatsimiititaliami isumasiuisoqarnerata kingorna Bentiaraq Ottosen (A) Isumaginninnermut, Suliffeqarnermut, Nunamut imminermut Avatangiisinullu Naalakkersuisutut tunuarpoq.

- Nittartakkakkummi suliffissarsiorfissap nutaap suliarineqarnera 4,9 millionit koruuninik aningaasaliinissap ataatsimiititaliamit akuerineqannginnerani aallartinneqarsimavoq.

- Tamatuma kingorna nittartakkakkut suliffissarsiortarfittaassaq naalakkersuisut ineriartortinniarlugu pilersaarutigisaat isornartorsiorneqalerpoq.

- Tusagassiorfiup Sermitsiap pisortaanerata, Masaana Egedep pisortat nittartakkakkut suliffissarsiorfiata Sermitsiap suliffissanik saqqummiussisarfiata isertitsisarfianut aarlerinartorsiortitsinera pissutigalugu soraarsitsiortortariaqarnissaq aarlerisaarutigaa.

Allisiguk

Tusagassiivimmi Sermitsiami pisortaq, Masaana Egede, nittartakkakkut suliffissarsiortarfissaq pillugu isornartorsiueqqaartut ilagaat. Suliffissanik nittarsaassisarfimminnit aningaasat isertittakkatik appassappata sulisunik soraarsitsinissaq taassumap ernummatigaa.

Sermitsiap kaaviiaartitaasa pingajorarterutaat suliffissanik nittarsaassisarneranit pissarsiarineqartarput.

- Tamanna tamat oqartussaaqataanerannut ajornartorsiutaangaassaaq, KNR-imit sapaatiummat apersorneqarluni oqarpoq.

Aamma atuaruk Pisortaq: Suliffissarsiornermut isertarfik Sermitsiamut ernumatitsillunilu tamat oqartussaaqataanerannut ajornartorsiutaangaatsiarpoq

Naalakkersuisut siulittaasuata ernumaneq paasilluarsinnaavaa, Sermitsiarli annilaangassutissaqarsorinngilaa.

- Namminersorlutik Oqartussat Sermitsiami ussassaarutinut 2,5 millionit koruuninik siorna atuisimapput, taamaattumik isertitat taakku annaanissaat ernummatigippassuk paasisinnaavara, Jens-Frederik Nielsen (D) oqarpoq.

Namminerli ernumanngilaq.

- Nittartagaanngilaq suliffissanik nittarsakkanik allanillu alakkarteriffissaq. Tamanna siunertarineqanngilaq, taanna oqarpoq.

Tamat oqartussaaqataanerata ajornartorsiulernissaa aarlerineqanngilaq

Kalaallit Nunaanni tusagassiortut ikinnerussappata tamanna ajornartorsiutaassasoq, Jens-Frederik Nielsenip (D) isumaqataaffigaa. Ajornartorsiulli tamanna oqartussat nittartakkakkut suliffissarsiortarfeqalerneranni pinngornavianngitsoq isumaqarpoq.

- Tusagassiortut ikinneruleraluarpata tamanna tamat oqartussaaqataanerannut soorunami ajorluinnartuussaaq. Kisianni ingasattajaarnerusoraara, taanna oqarpoq.

Jens-Frederik Nielsenip suliffeqarfiit ilinniartullu imminnut nassaarisinnaanissaat nittartakkakkut suliffissarsiorfiup siunertaani annerpaanerusoq oqariartuutini uteqqippaa.

Suliffissanik saqqummiussisartut namminersortut suliffeqarfinnik ilinniartussarsiortunik saqqummersitsisinnaanerannut periarfissaqartissimanerai KNR-ip apeqqutigimmagu naalakkersuisut siulittaasuat ima akissuteqarpoq.

- Una neqeroortitsisarnermi inatsisit aallaavigeqqissaarlugit suliarineqarpoq, taannalu tunngavigalugu suliarinnittussarsiorneq ingerlanikuulluni.

Aamma atuaruk Suliffissarsiornermi isertarfik: Tusagassiuinermi Sulisut Peqatigiiffiata Sermitsiaq taperseraa

Naalakkersuisooqatigiinnissamut isumaqatigiissummi naalakkersuisut nunatsinni tusagassiorfinnik pitsanngorsaaniartut allassimavoq. Suliaq taanna sumut killippa?

- Tassa suliat ingerlappagut. Maannakkut aningaasaqarnikkut inissisimaffipput imaannaanngitsorujussuunera eqqarsaatigalugu soorunami assat pussuinnarlugit naammassineqarsinnaanngilaq, taanna oqarpoq.

- Kisianni naalakkersuisuninngaanniit isumaqarpugut soorunami tusagassiorfitsigut tusagassiorneq nunatsinni nukittusariaqartoq, taanna tamat oqartussaaqataanerannut qitiulluinnarpoq.

Sermitsiaq ilanngunneqanngitsoq

KNR-ip Jens-Frederik Nielsen apersoreeramiuk Sermitsiap pisortaanera Masaana Egedep nittartakkakkut suliffissarsiorfimmut nutaamut suliarinnittussarsiuussisoqarnerani ilaasimanersoq apeqquteqarfigaa. Ilaasimanatillu akissutigaa.

- Naamik, allanut unammillereersut unammillernissarput kissaatiginngilarput, Masaana Egede oqarpoq.

- Pisortat atorluarsinnaasaannik neqerooruteqareersugut amerlavugut. Pisortat ineriartortitsivigerusullugit piumaffigisinnaasaat amerlareerpugut, taanna oqarpoq.

Sermitsiaq nittartakkakkut suliffissarsiornissap ineriartortinneqarnissaanut apeqqummut ilaatinneqartutut misigisimava?

- Naamik. Soorunami suliariumannittussarsiuussisoqarpoq, tamannali neqerooruteqarfigerusunngilarput, tassanimi naligiinngitsumik unammillernissarput kissaatiginngilarput, taanna oqarpoq, nangillunilu:

- Kisianni ilanngunneqarsimanersugut aperiguit taava naamik, ilanngunneqarsimanngitsugut isumaqarpunga. Nittartakkakkut suliffissarsiorfissamut suliami tukattoqangaatsiartoq isumaqarpunga. Aamma neqerooruteqartoqanngikkallarmat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.