Tusass EU-Kommissionimit 225 millioninik aningaasaliiffigineqartoq
Tusass 225 millionit koruuninik aningaasaliiffigineqarnermini aatsaat taama aningaasaliiffigineqartigivoq. Aningaasat Aasiaat Qaqortullu akornanni immap naqqatigut kabelimik sillimmatitut atorneqartussamik pilersitsinermut atorneqassapput.
Tusass tusagassiuutinut nalunaarummi allappoq.
- Tusassip ukiuni tullernguuttuni attaveqaatitigut pilersuisussaatitaanermut isumannaatsuutitsinermi, immap naqqatigut kabelinik, qaammataasatigullu attavilersuinikkut pitsanngorsaanissaminik aningaasanik annertuunik illikartitsisimavoq. Taama suliniutinut annertutigisunut aningaasartuutaangaatsiartussanullu Tusass kisimiilluni aningaasatigut matussusiisinnaanngilaq. Qaqortumiillu Aasiaat tungaanut immap naqqatigut kabeliliinissamut, tamatumalu Ilulissanut ingerlateqqinneqarsinnaasussianngortussamut aningaasaliiniarneq allanit aatsaat taperserneqaqqaarluni piviusunngorsinnaasussaalluni, Tusassimi Pisortaanerup tullersortaa Jonas Hasselriis tusagassiuutinut nalunaarummi oqarpoq.
Tusass immap naqqatigut kabelinut suliniutinut tunngatillugu aatsaat aningaasaliiffigineqanngilaq.
Siullermik 2022-mi 66 millionit koruuninik aningaasaliiffigineqarpoq. Aningaasat taakku Aasiaat Qaqortullu akornanni nunatta kitaata imartaata naqqa assiliortuinissamut atorneqartussaanikuupput.
Tusass EU-Kommissionimit ukiuni kingullerni sisamani katillugit 409 millionit koruuninik aningaasaliiffigineqarpoq.
Attaviit pitsaanerusut
Tapiissutaasoq EU-Kommissionimi Connecting Europe Facility Digital-imiit, tassa EU-p digitalitigut attaveqaasersuinermut ukiuni 2021-2027 sanaartornermut tapiissutigisartagaaanneersuuvoq. Suliniut taanna attaveqaasersuinermi fibernet-inut, 5G-mut immallu naqqatigut kabelinik suliniuteqartartuuvoq.
Tusassip siulersuisuini siulittaasup, Bodil Marie Damgaardip tapiissuteqartoqarnera ima oqaaseqarfigaa:
- Europamiittaaq Nunarput aammalu isittumi inissisimavipput Europamit annertunerusumik eqqumaffigineqaleriartuinnartoq tassani takutinneqarpoq, taanna tusagassiuutinut nalunaarummi oqarpoq.
Illoqarfiit marluk akornganni digitalitigut attavilersuinermut pitsaanngorsaasinnaanermut, immap naqqatigut kabeliliisoqarsinnaanissaanut periarfissiisoqartoq Tusassip oqaatigaa.
- Taperneqarnitsigut Nunatsinni angunikkatta qaffassinnaanissaannut, tassa innuttaasut aamma suliffeqarfiit pitsaanerusunik mutiunerusunillu attavilersuuteqarnissaat angusinnaanissaat qulakkeersinnaalissagipput, Bodil Marie Damgaard oqarpoq.
EU-Kommissionip Attaveqaqatigiinnermi, Imarisamut aamma teknologimi pisortaanerup tullersortaa, Renate Nikolay EU-mit tapiissuteqarnermut atatillugu ima oqaaseqarpoq:
- EU-mi inuiaqatigiinnut aamma OLT-niittuni tamanut, attavinnut qajannaatsunut isumalluuteqarsinnaanissaq qanoq pingaartinneqartiginersoq, taamatullu Qaqortumiit Aasiannut immap naqqatigut kabelilersuinissami suliniutip, uaguttaaq pimoorussinerput takutippaa, taanna tusagassiuutinut nalunaarummi oqarpoq.
