EU Issittumi atortulersuutinut millionilikkaanik aningaasaliissuteqartoq
Issittumi qarasaasiatigut atortulersuutit pitsanngorsarnissaanut 218 millionit koruuninik aningaasaliisoqarpoq.
Aningaasaliissutit EU-meersuusut, Danmarkimi paasissutissanik pilersuinermut aqutsisoqarfik,tusagassiuutinut nalunaarummi allappoq.
Suliniutit pingasut 'allatut qinigassatut kabelitigut atortulersuinermi' isumannaatsumik pilersuinissamut qulakkeereqataassapput, assersuutigalugu kabelit pioreersut ajoquserneqaraluarpata, aqutsisoqarfik allappoq.
Avannaanit kujataanut kabeli
Suliniutit pingasut ataatsimut katillugit 218 millionit koruuninik aningaasaliiffigineqartut Issittumiipput.
Suliniut siulleq Sverigep Svalbardillu akornannit Asiamut internettikkut attaveqaateqarlersitsisinnaanermut tunngavoq, suliniutip aappaa Europamit Sullualuk aqqusaarlugu Asiamut imaatigut kabelimik pilersitsinermut tunngavoq.
Suliniut kingulleq nunatsinniippoq, tassa Tusassip nunatta iluani avannaanit kujataanut imaatigut kabelimik pilersitsinissaanut aningaasaliissutaavoq.
Aqutsisoqarfiup suliniutit qaqugu aallartinneqarnissaa allanngilaa.