Tusass immap naqqata misissorneqarnissaanut 66 millionit koruuninik pissarsisoq
Immap naqqata misissorneqarnissaanut EU Tusassimut 66 millionit koruuuninik tunniussivoq.
Tusass tusagassiuutinut taama naunaaruteqarpoq.
Immap naqqatigut kabeli ukiut qulit sinnerlugit atuussimalereerpoq – immallu naqqani kabel 2019-mi aqqusaarneqarnermini ajoqusernera amerlasuut eqqaamassajunnarsivaat. Taamanimi suliarineqarnerani internettertoqarsinnaananilu mobilikkut data atorneqarsinnaanngillat.
Kabeli aasaq iluarsaanneqaqqippoq. Innaallagissap ajoquteqarnera taamani aaqqinniarneqarmat Nuummiit kujammut internetti ajorlunilu arriillivoq.
Millionit immap naqqatigut kabelimut nutaamut atorneqassanngitsut
Immap naqqatigut kabelip aaqqissuuneqarnera
2019-mi immap naqqatigut kabeli pingasoriarluni aaqqissuunneqarpoq.
Sisimiut kujasissortaani 30 kilometerinik ungasissusilimmi januarimi 2019-mi qupivoq.
Qupinerup aappaa Sisimiunit 70 kilometerinik avannarpasitsigisumiippoq.
Qupinerullu pingajuat 2018-mi kujataani pivoq.
Kabeli immap naqqani 300-400 meterinik ititigisumiippoq.
Tusassillu oqaatigaa taamani qupinerit ilaat ataaseq raajarniutip qupigaa.
Isumannaallisaanikkut pilersorneqarnerup pitsaanerulersinneqarsinnaanissaa pillugu nunatta kitaata sineriaani immap naqqa misissorneqassaaq.
- Annertuumik aningaasartuutaasussaassooq, inuiaqatigiilli digitalimik ingerlatsiviusut eqqarsaatigalugit avaqqunneqarsinnaanani, taamaattumik EU-mit aningaasaliissutit aqqutigalugit immap naqqata immakkut kabeleqarfiginissaanut misissuiffiginissaa tamatsinnut isumalerujussuuvoq, Tusassimi siulersuisuni siulittaasoq Ulrik Blidorf oqarpoq.
66 millionit koruunit immap naqqatigut kabelimut nutaamut atorneqassanngillat. Siunissamili immap naqqatigut kabelit ilaqqinneqarsinnaanissaanut periarfissat pillugit immap naqqanik misissuinermut aningaasat atorneqassapput.
AAMMA ATUARUK Esther Petersenip Campus Kujallermi internettip arriippallaarnera ilungersuutigigaa
Naalakkersuisoq Erik Jensen (S) millionerpassuit tunniunneqarmata nuannaarpoq.
- Immakkut kabelit attaveqaasersuutit atorsinnaanissaannut qitiulluinnartuupput nalunaarasuartaateqarnikkut attaveqaqatigiinnermik qulakkeerinnittut, aammali immakkut kabelinik ajornartoorfeqarnikkut attaveqaqatigiinniarnikkut paasissutissanillu pisariaqartunik aallerniarnikkut kipiluttunartoortitsisinnaasut, taanna oqarpoq.
Aalisartut oqaloqatigineqartut
Tusassimi aqutsisut aamma nuannaarput.
- TamannaLU aamma Tusassimut pisussaaffiliivoq tamakkiisumik Kalaallit Nunaata kitaata sineriaani immap naqqanik misissuinissamik ukkataqarnissamut, taamaasillutami nalilersuisinnaalissuugut immakkut kabelit pitsaanerpaamik qanoq aaqqiivigineqarsinnaassanersut. Tusassimut aamma pingaaruteqarpoq aalisartunik ilisimatusaatigalugulu misissuisartunik suleqateqarlutalu oqaloqateqartarnissarput, taamaasiornikkummi sapinngisamik inuiaqatigiinnut tamanut iluaqutaasumik suliamik ingerlatsisinnaassagatta, Tusassip pisortaanera Kristian Reinert Davidsen oqarpoq.
