Esther Petersenip Campus Kujallermi internettip arriippallaarnera ilungersuutigigaa
Esther Petersen Campus Kujallermi allaffimini qarasaasiap saaniippoq. Taassuma sulinera pisarnertut sukkatiginngilaq.
Tusassimmi imaatigut kabeli iluarsaatileruttorpaa. Taamaammat Nuup kujataani internettimut attaviit tamarmik aalaakkaananilu arriippoq. Inuit ilaat internettimilluunniit atuisinnaanngillat.
Immap naqqatigut kabelip aaqqissuuneqarnera
2019-mi immap naqqatigut kabeli aamma aaqqissuunneqarpoq. Taamani pingasunik qupineqarpoq.
Sisimiut kujasissortaani 30 kilometerinik ungasissusilimmi januarimi 2019-mi qupivoq.
Qupinerup aappaa Sisimiunit 70 kilometerinik avannarpasitsigisumiippoq.
Qupinerullu pingajuat 2018-mi kujataani pivoq.
Kabeli immap naqqani 300-400 meterinik ititigisumiippoq.
Tusassillu oqaatigaa taamani qupinerit ilaat ataaseq raajarniutip qupigaa.
Tusassip internettimut attaviit inuussutissarsiuteqartunut pitsaanerunissaat salliuppaat – Esther Petersenilu taakkununnga ilaavoq. Taassumali programmip atugassaata ammarniarnera sivisuvoq.
- Ilaatigut sivisusaqaq, ilaatigut sukkaneruleriataarsinnaasarpoq, taanna KNR-imut oqarpoq.
- Suliaqarniarluni kipiluttunaqaaq, suliassat assigiingitsut kinguaraluttuinnartut.
2019-imi attaveeruteqqavinneq
Campus Kujallermi ilinniartut pingasunngorpat ilinniarnermusisussaapput – tamanna Esther Petersenip isumagissavaa.
-Tassa ilimasaarutigineqareerpoq, tusareerparput, aamma IT-lerisugut paasititsilluartaramik.
Internettimulli attaviup aalaakkaannginnera ajornartuussutiginngilaa. Esther Petersenimmi imaatigut kabelip kittorarnerani attaveerutivinneq 2019-imi nalaatereerpaa.
- Tassa allatut ajornaqaaq naammagiinnartariaqarparput.
AAMMA ATUARUK Internetti kigaallissaaq meeqqat DVD-ssapput
Imaatigut kabelip iluarsaannera sapaatiummat aallartinneqarpoq, Tusassillu tamanna katillugit sapaatinik akunnernik marlunnik sivisussuseqarnissaa naatsorsuutigaa. Taamaakkaluartorli qanorpiaq sivisutiginissaa ersarinnerusumik ilisimanagu. Suliaqarnerup ilaa umiarsuarmi ingerlanneqartussaammat suliarinissaanut anorip silallu qanoq innera apeqqutaassaaq.
Imaatigut kabelip immap naqqani 300-init 400 meterinut ititigisumiippoq.
Amerikap avannaani kabelip kipinera
Tusassip oqarnera naapertorlugu angerlarsimmafimmi internetteqartut aningaasanik utertitsiviffigineqarumaarput. Aningaasat qanoq annertutigisut utertinneqassanersut iluarsaassineq naammassippat naatsorsorneqarumaarpoq.
Attaveqaatini unammillernartut ippassaq aamma ilaqqipput, nunatsinniimmi avammut sianertoqarsinnaanngilaq. Tamanna Amerikap Avannaani kabelip kipineranik pissuteqarpoq, tamannalu pissutigalugu nunatsinni ammut oqarasuaatikkut attaviit matunerannik kinguneqarpoq. Tamannali ippassaq unnukkut qulingunngitsiartoq aaqqinneqarpoq.
Nuup kujataani imaatigut kabelimut attavik Islandimut aamma Europamut Danmarkimullu ingerlaartuuvoq. Kabelillu taassuma iluarsarsaanneqarnera pissutigalugu attaveqaatit arriilleqqanera Amerikap avannaanut kabeli nunatta sinnerata pisariaqartilluinnarpaa.
Danskit tv-qarfiinit aallakaatitat ippassaq aamma aallakaatinneqarsinnaanngillat kiisalu Tasiilamut Tasiilamiillu aamma Ittoqqortoormiinut attaveqaatit aamma aalaakkaanatik.
Grafik: Tusass